ନିର୍ବାଚନ ଜିତିବାକୁ ମୋଦୀଙ୍କ ଗୁରୁମନ୍ତ୍ର

କନକ ବ୍ୟୁରୋ : ଦୁଇ ଦିନିଆ ବିହାର ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଗତକାଲି ପାଟନାରେ ଏକ ବିଶାଳ ରାଲିର ଆୟୋଜନ ହୋଇଥିଲା । ଏହା ପରେ, ପ୍ରଧାନମନ୍ତ୍ରୀ ମୋଦୀ ବିହାରର ବିଜେପି ରାଜ୍ୟ ମୁଖ୍ୟାଳୟରେ ପ୍ରାୟ ଏକ ଘଣ୍ଟା ଧରି ଦଳୀୟ ନେତା ଏବଂ କର୍ମୀମାନଙ୍କ ସହ ଆଲୋଚନା କରିଥିଲେ । ସେହି ଆଲୋଚନା ସାମାନ୍ୟ ନ ଥିଲା । ଏହା ଥିଲା ଚଳିତ ବର୍ଷ ଶେଷରେ ବିହାରରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ବିଜୟର ଗୁରୁମନ୍ତ୍ର । ସାଂସଦ, ବିଧାୟକ ଏବଂ କର୍ମୀମାନେ କିପରି ନିର୍ବାଚନ ଜିତିବେ ତାହାର ଗୁରୁମନ୍ତ୍ର ଦେଇଥିଲେ ମୋଦୀ । ନିର୍ବାଚନ ଜିତିବା ପାଇଁ କେଉଁ ରଣନୀତି ବ୍ୟବହାର କରାଯିବା ଉଚିତ ତାହା ମଧ୍ୟ କହିଥିଲେ ।

Advertisment

ବିହାର ନିର୍ବାଚନ ଜିତିବା ପାଇଁ ମୋଦୀଙ୍କ ଗୁରୁମନ୍ତ୍ର

ଧୈର୍ଯ୍ୟ ରଖିବା ଦ୍ୱାରା ସଫଳତା ମିଳେ
ବୁଥ୍‌କୁ ମଜଭୁତ କରିବା ପାଇଁ କାମ କରନ୍ତୁ
ବୁଥ୍‌ ବିଜୟ ପାଇଁ ୧୦୦ଟି ଭିଡିଓ ତିଆରି କରନ୍ତୁ
ସୋସିଆଲ୍ ମିଡିଆରେ ସକ୍ରିୟ ରୁହନ୍ତୁ
ଲୋକଙ୍କ ସମସ୍ୟା ଶୁଣନ୍ତୁ ଏବଂ ତୁରନ୍ତ ସେଗୁଡ଼ିକୁ ସମାଧାନ କରନ୍ତୁ
ଅହଂକାରୀ ନ ହେବାକୁ ପରାମର୍ଶ
ବିକାଶର ସବୁ ଯୋଜନା ସମସ୍ତଙ୍କ ପାଖରେ ପହଞ୍ଚାନ୍ତୁ

ଟିକେଟ ଚାହୁଥିବା ଲୋକଙ୍କ ପାଇଁ ଦେଲେ ସ୍ପଷ୍ଟ ବାର୍ତ୍ତା

ପ୍ରଧାନମନ୍ତ୍ରୀ ମୋଦୀ ଦଳୀୟ କର୍ମୀମାନଙ୍କୁ କହିଥିଲେ ଯେ ରାଜନୀତିରେ ସଫଳ ହେବା ପାଇଁ ଧୈର୍ଯ୍ୟ ବହୁତ ଗୁରୁତ୍ୱପୂର୍ଣ୍ଣ । କିଛି ଲୋକ ଟିକେଟ୍‌ ନ ପାଇଲେ ନିର୍ବାଚନ ସମୟରେ ଦଳ ପରିବର୍ତ୍ତନ କରନ୍ତି, ଏପରି ଲୋକଙ୍କର ଧୈର୍ଯ୍ୟ ନାହିଁ । କର୍ମୀମାନଙ୍କୁ ନିଜର ଉଦାହରଣ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ସେ ଦେଢ଼ ଦଶନ୍ଧି ପର୍ଯ୍ୟନ୍ତ ପଛ ଧାଡ଼ିରେ ରହିଥିଲେ । ଏହା ପରେ ହିଁ ସେ ଆଗକୁ ଆସିଲେ ।

ମୋଦୀ ବିଧାୟକ, ସାଂସଦ ଏବଂ କର୍ମୀମାନଙ୍କୁ କହିଛନ୍ତି ଯେ ସମସ୍ତ ବିକାଶ ଯୋଜନା ଶେଷ ବ୍ୟକ୍ତି ପର୍ଯ୍ୟନ୍ତ ପହଞ୍ଚିବା ପାଇଁ ବିଶେଷ ଧ୍ୟାନ ଦିଅନ୍ତୁ । ସୋସିଆଲ ମିଡିଆ ମାଧ୍ୟମରେ ସରକାରଙ୍କ ସଫଳତା ଏବଂ ନୀତିକୁ ଯୁବକମାନଙ୍କ ପାଖରେ ପହଞ୍ଚାନ୍ତୁ । ଲୋକଙ୍କ ସମସ୍ୟା ଶୁଣନ୍ତୁ ଏବଂ ସେଗୁଡ଼ିକର ସମାଧାନ କରନ୍ତୁ । ସଂଗଠନର ଶକ୍ତି ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଛନ୍ତି ଯେ ବିଜେପି-ଏନଡିଏ ମେଣ୍ଟକୁ ଆହୁରି ମଜଭୁତ କରିବା ଉପରେ ଧ୍ୟାନ ଦିଅନ୍ତୁ ।

ସେ ଆହୁରି ମଧ୍ୟ କହିଛନ୍ତି,୪ ମାସ ମଧ୍ୟରେ ନିର୍ବାଚନ ହେବାକୁ ଯାଉଛି, ତେଣୁ ବୁଥ୍ ମଜଭୁତ କରିବା ଉପରେ ଧ୍ୟାନ ଦିଅନ୍ତୁ । ସେଠାକାର ଲୋକଙ୍କୁ ଭେଟିବା ଆରମ୍ଭ କରନ୍ତୁ । ଖାଲି ସେତିକି ନୁହେଁ ବିରୋଧୀଙ୍କ ଶାସନକାଳ ସମ୍ପର୍କରେ ନୂଆପିଢ଼ି ବା ଯୁବକମାନଙ୍କୁ କହିବା ପାଇଁ ପରାମର୍ଶ ଦେଇଛନ୍ତି ପ୍ରଧାମନ୍ତ୍ରୀ ମୋଦୀ ।