ବିହାର ନିର୍ବାଚନ; କଂଗ୍ରେସ-ତେଜସ୍ୱୀ ଅଲଗା, ନା ଏକାଠି?

କନକ ବ୍ୟୁରୋ: ବିହାର ବିଧାନସଭା ନିର୍ବାଚନ ଯେତିକି ଯେତିକି ପାଖୋଉଛି, ବିହାରରେ ନିର୍ବାଚନୀ ମାହୋଲ ମଧ୍ୟ ସେତିକି ସରଗରମ ହେବାରେ ଲାଗିଛି । ଆପଣମାନେ ନିଶ୍ଚୟ ଜାଣିଥିବେ ଯେ, ବିହାର ନିର୍ବାଚନର କେନ୍ଦ୍ରବିନ୍ଦୁରେ ଏଥର ଦୁଇଟି ମେଣ୍ଟ ରହିଛନ୍ତି, ଗୋଟିଏ ହେଉଛି ଏନଡିଏ ଏବଂ ଅନ୍ୟଟି ହେଉଛି ମହାମେଣ୍ଟ । ଏନଡିଏ ନୀତିଶ କୁମାରଙ୍କ ନେତୃତ୍ୱରେ ଏବଂ ମୋଦୀଙ୍କ ଚେହେରା ନେଇ ଏଥର ମୈଦାନକୁ ଓହ୍ଲାଉଥିବାବେଳେ, ମହାମେଣ୍ଟରେ କିନ୍ତୁ କଥା ଛିଣ୍ଡିପାରିନି । କଂଗ୍ରେସ ଏବେ ଯାଏଁ ଆରଜେଡି ନେତୃତ୍ୱରେ ମହାମେଣ୍ଟ ନିର୍ବାଚନ ଲଢ଼ିବା ନେଇ କହୁଥିଲେ ବି, ସେମିତି କିଛି ବି କଥା କାମରେ ଦେଖିବାକୁ ମିଳୁନି ।

କଂଗ୍ରେସ-ଆରଜେଡି କଥା ଛିଣ୍ଡୁନି

ମହାମେଣ୍ଟରେ ଥିବା ଦୁଇ ଦଳ କଂଗ୍ରେସ- ଆରଜେଡି ଭିତରେ ତୁ ତୁ ମେଁ ମେଁ ଲାଗି ରହିଛି । ଖାସ୍ କରି ମହାମେଣ୍ଟରେ ମୁଖ୍ୟମନ୍ତ୍ରୀ ଚେହେରାକୁ ନେଇ ଏବେ ବି ଦ୍ୱନ୍ଦ୍ୱ ଲାଗି ରହିଛି । ଗୋଟିଏ ପଟେ ଆରଜେଡି ତେଜସ୍ୱୀଙ୍କୁ ସାମ୍ନାରେ ରଖି ନିର୍ବାଚନ ଲଢ଼ିବାକୁ କହୁଥିବାବେଳେ, କଂଗ୍ରେସ କିନ୍ତୁ ବିନା ମୁଖ୍ୟମନ୍ତ୍ରୀ ଚେହେରାରୁ ମୈଦାନକୁ ଓହ୍ଲାଇବା ଭଳି କଥା କହୁଛି । ସେପଟେ କହ୍ନୈୟା କୁମାରଙ୍କ ଉତ୍ଥାନ ଲାଲୁ ଯାଦବଙ୍କ ପାଇଁ ଅଡ଼ୁଆ ସୃଷ୍ଟି କରିଛି । ଭବିଷ୍ୟତରେ କହ୍ନୈୟା କାଳେ ତେଜସ୍ୱୀଙ୍କ ପାଇଁ ଅଡ଼ୁଆ ହେବେ, ସେହି କଥାକୁ ଚିନ୍ତା କରୁଛନ୍ତି ଲାଲୁ ଯାଦବ । 

କହ୍ନୈୟାଙ୍କ ବିବାଦୀୟ କଥା, ମେଣ୍ଟକୁ ଅଡ଼ୁଆ

ଗତ କିଛି ଦିନ ଧରି ବିହାରରେ ଗୋଟିଏ ପରେ ଗୋଟିଏ ବିବାଦୀୟ ବୟାନ ଦେଇଚାଲିଛନ୍ତି କଂଗ୍ରେସ ନେତା କହ୍ନୈୟା କୁମାର । ଖାସ୍ କରି ସଂଘ ଅର୍ଥାତ ଆରଏସଏସର ଲୋକଙ୍କୁ ଗାଳି କରିବା ସହିତ ସଂଘର ପ୍ରତିଟି ସଦସ୍ୟ ଆତଙ୍କବାଦୀ ବୋଲି କହିଥିଲେ କହ୍ନୈୟା । ଏହାପରେ ତାଙ୍କ ବିରୋଧରେ ବିଜେପି ନେତା ଦାନିଶ ଇକବାଲ ଥାନାରେ ମାମଲା ମଧ୍ୟ ରୁଜୁ କରିଥିଲେ । ହେଲେ କହ୍ନୈୟାଙ୍କ ଏହି ବୟାନ କିନ୍ତୁ ବିହାର ରାଜନୀତିକୁ ସରଗରମ କରିଥିଲା ।

ଗୁରୁତ୍ୱପୂର୍ଣ୍ଣ କଥା ହେଲା, କଂଗ୍ରେସ ଏଥର ସତ୍ତା ବିରୋଧୀ ହାଓ୍ୱାରୁ ଫାଇଦା ନେବାକୁ ଚେଷ୍ଟା କରୁଛି । ବିଜେପିକୁ ଭୋଟ୍ ଦେଉଥିବା ସାଧାରଣ ବର୍ଗର ଲୋକଙ୍କୁ ନିଜ ପକ୍ଷକୁ ଆଣିବାକୁ ଅଙ୍କ କଷୁଛନ୍ତି କଂଗ୍ରେସ ନେତା । ହେଲେ ଏତିକିବେଳେ କିନ୍ତୁ କହ୍ନୈୟାଙ୍କ ଏପରି ବୟାନ କଂଗ୍ରେସକୁ ଅଡ଼ୁଆରେ ପକାଇପାରେ । ସେହିପରି ତହବ୍ବୁର ରାଣା ପ୍ରସଙ୍ଗରେ ମଧ୍ୟ କହ୍ନୈୟାଙ୍କ ବୟାନ ବିବାଦ ସୃଷ୍ଟି କରିଥିଲା ।