ଦିଲ୍ଲୀରୁ ବୁଲା କୁକୁର ହଟାଇବାକୁ ନେଇ ଆପତ୍ତି ଉଠାଇଲେ ବଲିଉଡ୍ ଷ୍ଟାର୍ : ଭୂମିଙ୍କ ଠାରୁ ଆରମ୍ଭ କରି ଜାହ୍ନବୀ, ଜନ୍ , ବରୁଣ ପର୍ଯ୍ୟନ୍ତ କିଏ , କହିଲେ , କ’ଣ?

କନକ ବ୍ୟୁରୋ : ସୁପ୍ରିମକୋର୍ଟ ଦିଲ୍ଲୀ-ଏନସିଆରର ରାସ୍ତାରୁ ବୁଲା କୁକୁରଙ୍କୁ ହଟାଇବାକୁ ନିଷ୍ପତ୍ତି ନେଇଛନ୍ତି । କୋର୍ଟଙ୍କ ଏହି ନିଷ୍ପତ୍ତି ପରେ ସୋସିଆଲ ମିଡିଆଠାରୁ ଆରମ୍ଭ କରି ସାଧାରଣ ଜନତାଙ୍କ ମଧ୍ୟରେ ଚହଳ ପଡ଼ିଯାଇଛି । କିଛି ଲୋକ ଏହାକୁ ସମର୍ଥନ କରୁଥିବା ବେଳେ କିଛି ଲୋକ ଆପତ୍ତି ଉଠାଉଛନ୍ତି । ଏହି ସମୟରେ ସୋସିଆଲ ମିଡିଆରେ ଡଗ୍ ଲଭର୍ସ ବଲିଉଡ ତାରକାମାନେ ମଧ୍ୟ ନିଜର ପ୍ରତିକ୍ରିୟା ସେୟାର କରିଛନ୍ତି । ସେମାନଙ୍କ ମଧ୍ୟରୁ ଭୂମି ପେଡନେକର ଅନ୍ୟତମ, ଯିଏ ଲମ୍ବା ଚଉଡ଼ା ପୋଷ୍ଟ ସହିତ ଏହି ନିଷ୍ପତ୍ତି ଉପରେ ନିଜର ମତ ରଖିଛନ୍ତି । ଭୂମି ନିଜର ଇନଷ୍ଟାଗ୍ରାମ ପୋଷ୍ଟରେ ନିଜ କୁକୁରର ଫଟୋ ଏବଂ ଭିଡିଓ ସେୟାର କରିଛନ୍ତି । ବହୁତ କମ୍ ଲୋକ ଜାଣିଥିବେ ଯେ ଭୂମିଙ୍କର ପୋଷା କୁକୁର ତାଙ୍କୁ ଏକ ରାସ୍ତାକଡ଼ରୁ ଆହତ ଅବସ୍ଥାରେ ମିଳିଥିଲା । କୁକୁରଟିକୁ କେହି ମରଣାନ୍ତକ ଆକ୍ରମଣ କରି ଦରମରା ଅବସ୍ଥାରେ ଛାଡ଼ି ଦେଇଥିଲେ । ଅଭିନେତ୍ରୀ ନିଜ ପୋଷ୍ଟରେ ଲେଖିଛନ୍ତି, “ମୋର ବ୍ରୁନୋ ବାବା ଆମ ଜୀବନକୁ ସେତେବେଳେ ଆସିଥିଲା, ଯେତେବେଳେ ତା’କୁ ମାତ୍ର ଚାରି ମାସ ହୋଇଥିଲା । ସେତେବେଳେ ସେ ଗୁରୁତର ଭାବରେ ଆହତ ଏବଂ ଆଘାତ ହୋଇଥିଲେ । ତା’ର ପାଟିରେ ଆଘାତ ଲାଗିଥିଲା, ଲାଞ୍ଜ ପୋଡ଼ି ଯାଇଥିଲା... ତଥାପି ତା’ର ସାହସ ଜଣେ ଯୋଦ୍ଧା ପରି ଥିଲା ।”

ଅଭିନେତ୍ରୀ ପୋଷ୍ଟରେ ଆଗକୁ ଲେଖିଛନ୍ତି ଏସବୁ ସେହି ଛୋଟ ପିଲାମାନେ କରିଥିଲେ, ଯେଉଁମାନେ ଏକ ନିରୀହ ପ୍ରାଣୀକୁ ହଇରାଣ କରିବାରେ ମଜା ପାଉଥିଲେ । ସେମାନଙ୍କର କୌଣସି ଭୁଲ୍ ନାହିଁ...ଏହା ଆମର ଭୁଲ୍, କାରଣ ଆମେ ନିଜ ଭିତରେ ସହାନୁଭୂତି ଏବଂ ଦୟାର ଭାବନା ଜାଗ୍ରତ କରିପାରିଲୁ ନାହିଁ । ବ୍ରୁନୋ ଏକ ବୁଦ୍ଧିମାନ କୁକୁର । ମାନ୍ୟବର ସୁପ୍ରିମକୋର୍ଟଙ୍କର ସେହି ନିଷ୍ପତ୍ତି ଶୁଣିବା ପରେ ଯେଉଁଥିରେ ଦିଲ୍ଲୀର ୩,୦୦,୦୦୦ କୁକୁରଙ୍କୁ ଉଠାଇ ଆଶ୍ରୟସ୍ଥଳୀରେ ରଖିବାକୁ ଅନୁମତି ଦିଆଯାଇଛି ମୁଁ ବ୍ରୁନୋ ବିଷୟରେ ଚିନ୍ତା କରିବାକୁ ନିଜକୁ ଅଟକାଇ ପାରୁନାହିଁ... ଏବଂ ସେହି ସମସ୍ତ ଭାରତୀୟଙ୍କ ବିଷୟରେ ମଧ୍ୟ ଯେଉଁମାନେ ସେହି ରାସ୍ତା ବ୍ୟତୀତ ଅନ୍ୟ କିଛି ଜାଣିନାହାନ୍ତି । ଯାହାକୁ ସେମାନେ ନିଜର ଘର ବୋଲି କୁହନ୍ତି । “ଦଶନ୍ଧି ଧରି, ଗଳିର କୁକୁରମାନଙ୍କୁ ଖାଇବାକୁ ଦେଉଥିବା ଲୋକ ସେମାନଙ୍କର ସମର୍ଥକ ହୋଇ ରହିଆସିଛନ୍ତି, ସେମାନଙ୍କୁ ଖାଇବାକୁ ଦିଅନ୍ତି, ସେମାନଙ୍କ ଆଘାତର ଯତ୍ନ ନିଅନ୍ତି, ବନ୍ଧ୍ୟାକରଣ କରନ୍ତି ଏବଂ ନିଜ ପକେଟରୁ ଟଙ୍କା ଖର୍ଚ୍ଚ କରି ସେମାନଙ୍କର ଟୀକାକରଣ କରନ୍ତି । ସେମାନଙ୍କ ଅସ୍ତିତ୍ୱକୁ ଅପରାଧୀ କରିବା କିମ୍ବା ସେମାନଙ୍କର ଯତ୍ନ ନେଉଥିବା ଲୋକଙ୍କୁ ଦଣ୍ଡ ଦେବା ପରିବର୍ତ୍ତେ, ମୁଁ ଆଶା କରୁଛି ଯେ ଆମେ ଆହୁରି ଶକ୍ତିଶାଳୀ ସୁଧାର ଏବଂ ବ୍ୟବସ୍ଥା କରିବା ।

ଭୂମିଙ୍କ ବ୍ୟତୀତ ବଲିଉଡର ଅନ୍ୟ ଷ୍ଟାରମାନେ ମଧ୍ୟ ଏହି ନିଷ୍ପତ୍ତି ଉପରେ ନିଜର ଆପତ୍ତି ଜାହିର କରିଛନ୍ତି । ଜାହ୍ନବୀ କପୁର କୋର୍ଟଙ୍କ ନିଷ୍ପତ୍ତି ଉପରେ ଅସନ୍ତୋଷ ଜାହିର କରି ଇନଷ୍ଟା ଷ୍ଟୋରୀରେ ଏକ ପୋଷ୍ଟ ସେୟାର କରିଥିଲେ ଯେଉଁଥିରେ ଲେଖାଥିଲା ଯେ କିଛି ଲୋକ କୁକୁରକୁ ବିପଦ ମାନୁଛନ୍ତି ଏବଂ ଆମେ ଏହାକୁ ହୃଦୟର ସ୍ପନ୍ଦନ ମାନୁଛୁ । ବରୁଣ ଧୱନ ମଧ୍ୟ ଜାହ୍ନବୀଙ୍କର ସେହି ସମାନ ପୋଷ୍ଟକୁ ନିଜର ଇନଷ୍ଟା ଷ୍ଟୋରୀରେ ସେୟାର କରିଥିଲେ । ଜନ ଆବ୍ରାହମ କୋର୍ଟଙ୍କ ନିଷ୍ପତ୍ତି ଉପରେ ମୁଖ୍ୟ ବିଚାରପତି ବିଆର ଗୱାଇଙ୍କୁ ଚିଠି ଲେଖିଛନ୍ତି । ସେ କହିଛନ୍ତି ଯେ ମୁଁ ଆଶା କରୁଛି ଆପଣ ଏହି କଥାକୁ ସ୍ୱୀକାର କରିବେ ଯେ ଦିଲ୍ଲୀର କୁକୁର ବୁଲା ନୁହଁନ୍ତି । ଯେଉଁମାନଙ୍କୁ ଅନେକ ଲୋକ ସମ୍ମାନ ଏବଂ ଭଲପାଇବା ଦିଅନ୍ତି ସେମାନେ ବୁଲା କେମିତି ହୋଇପାରିବେ ? ଏମାନେ ଦିଲ୍ଲୀରେ ଦୀର୍ଘ ସମୟ ଧରି ଲୋକଙ୍କ ପଡ଼ୋଶୀ ଭାବରେ ରହି ଆସୁଛନ୍ତି ।