କନକ ବ୍ୟୁରୋ: ବିଏମ୍‌ସି ପାଖରେ ଅର୍ଥର ଅଭାବ । ଗୋଟେ ପଟେ ରାଜସ୍ୱ ହରାଉଛନ୍ତି, ଅନ୍ୟପଟେ ଟଙ୍କା ମାଗୁଛନ୍ତି । କିଛି ଏଭଳି ସ୍ଥିତିରେ ଗତି କରୁଛି ଭୁବନେଶ୍ୱର ମହାନଗର ନିଗମ । ଅଧପନ୍ତରିଆ ହୋଇ ପଡ଼ିରହିଛି ଅନେକ ବିକାଶମୂଳକ କାମ । ଏଭଳି ସ୍ଥିତିରେ କେମିତି ସ୍ମାର୍ଟ ହେବ ଭୁବନେଶ୍ୱର, ତାକୁ ନେଇ ଉଠିଛି ପ୍ରଶ୍ନ ।

କେତେବେଳେ ସ୍ବେରେଜ ସମସ୍ୟା ତ ପୁଣି କେତେବେଳେ ଅସରାଏ ବର୍ଷାରେ କୃତ୍ରିମ ବନ୍ୟା ପରିସ୍ଥିତି । ସାମାନ୍ୟ ବର୍ଷାରେ ରାସ୍ତାଘାଟ, ନାଳନର୍ଦ୍ଦମା ସବୁ ଏକାକାର । ଏହା ସହରବାସୀଙ୍କ ଜୀବନଶୈଳୀକୁ ପ୍ରଭାବିତ କରିଛି । ସେପଟେ ଚିନ୍ତା ବଢ଼ାଉଛି ଆବର୍ଜନା । ବୈଠକ ପରେ ବୈଠକ ବସୁଛି, ସମୀକ୍ଷା ବି ହେଉଛି, ହେଲେ ବାହାରି ପାରୁନି ସମାଧାନର ବାଟ । ଅନ୍ୟପଟେ ବିକାଶମୂଳକ କାମରେ ବାଧକ ସାଜିଛି ଅର୍ଥ । ଏନେଇ ରାଜ୍ୟ ସରକାରଙ୍କୁ ସହାୟତା ପାଇଁ ନିବେଦନ କରିଛନ୍ତି ମେୟର ।

ଗୋଟେ ପଟେ କୋଟି କୋଟି ଟଙ୍କାର ରାଜସ୍ୱ ଛାଡ଼ୁଛି ବିଏମ୍‌ସି । ହୋର୍ଡିଂ ଟେଣ୍ଡର ନେଇଥିବା ୨୫ଟି ଘରୋଇ ଓ ୪ଟି ସରକାରୀ ସଂସ୍ଥା ଉପରେ ଥିବା ବକେୟା ଅର୍ଥ ଆଦାୟକୁ ଏବେ ଗୁରୁତ୍ୱ ଦେଇଛି ବିଏମ୍‌ସି । ଦୁଇ ମାସ ଭିତରେ ବକେୟା ପୈଠ କରିବାକୁ ନିର୍ଦ୍ଦେଶ ଦିଆଯାଇଛି । ସେପଟେ ନୂଆ କମିସନର କିଛି ନୂଆ କରିବେ ଆଉ ସମାଧାନର ବାଟ ବାହାର କରିବେ ବୋଲି କହିଛନ୍ତି କଂଗ୍ରେସ ନେତା ସୁରେଶ କୁମାର ରାଉତରାୟ । ସମୟ ଗଡ଼ୁଛି, ସମସ୍ୟା ବଢ଼ୁଛି। ହେଲେ ବାହାରିପାରୁନି ସମାଧାନର ବାଟ । ଫଳରେ ହନ୍ତସନ୍ତ ହେଉଛନ୍ତି ରାଜଧାନୀବାସୀ। ।