ଡରାଇଲା ରିପୋର୍ଟ : ଏହି ରାଜ୍ୟରେ  ଅଧିକ ମଦ୍ୟପାନ କରୁଛନ୍ତି ମହିଳା !

କନକ ବ୍ୟୁରୋ: ଯେତେବେଳେ ବି ଦେଶରେ ନିଶା କାରବାର କଥା ଆସେ, ସମସ୍ତଙ୍କ ମନରେ ପ୍ରଥମେ 'ଉଡ଼ନ୍ତା ପଞ୍ଜାବ'ର ଚିତ୍ର ଭାସିଉଠେ । କିନ୍ତୁ ବାସ୍ତବତା ହେଉଛି ଯେ ନିଶା କେବଳ ପଞ୍ଜାବର ସମସ୍ୟା ହୋଇ ରହିନାହିଁ, ବରଂ ଏହାର କାୟା ଦେଶର କେନ୍ଦ୍ରାଞ୍ଚଳକୁ ମଧ୍ୟ ଗ୍ରାସ କରିସାରିଛି । ସଦ୍ୟତମ ତଥ୍ୟ ଏକ ଚିନ୍ତାଜନକ ସ୍ଥିତିକୁ ସାମ୍ନାକୁ ଆଣିଛି, ଯେଉଁଥିରୁ ଜଣାପଡ଼ିଛି ଯେ ଦେଶର ହୃଦୟ ଭାବେ ପରିଚିତ  ମଧ୍ୟ ପ୍ରଦେଶ  ନିଶା ସେବନରେ ନୂଆ ଗଡ଼ ପାଲଟିଛି । ରାଜ୍ୟଟି ଦିନକୁ ଦିନ ନିଶାର ଏକ ପ୍ରମୁଖ ଗଡ଼ ପାଲଟିବାରେ ଲାଗିଛି । ଏଠାରେ ପ୍ରାୟ ପ୍ରତିଦିନ ରାଜ୍ୟର ବିଭିନ୍ନ ଜିଲ୍ଲାରୁ ନିଶା ଜାତୀୟ ପଦାର୍ଥ ଜବତ ହେଉଥିବା ଖବର ସାମ୍ନାକୁ ଆସୁଛି । ଏହା ସ୍ପଷ୍ଟ କରୁଛି ଯେ ରାଜ୍ୟରେ ନିଶା କାରବାରର ଚେର ବହୁତ ଗଭୀରକୁ ବ୍ୟାପିଛି। ପ୍ରଶାସନର କାର୍ଯ୍ୟାନୁଷ୍ଠାନ ସତ୍ତ୍ୱେ ନିଶା ମାଫିଆମାନେ ସକ୍ରିୟ ରହିଛନ୍ତି ଏବଂ ଯୁବପିଢ଼ିଙ୍କୁ ନିଜର ଶିକାର ବନାଉଛନ୍ତି ।

ଏହି କ୍ରମରେ, ନିକଟରେ ରାଜଧାନୀ ଭୋପାଳରେ ପୁଣି ଥରେ ଏକ ବେଆଇନ ନିଶା କାରଖାନାର ପର୍ଦ୍ଦାଫାଶ ହୋଇଛି । ଏହି ଘଟଣା ସମଗ୍ର ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି ଏବଂ ପ୍ରଶାସନର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ରାଜଧାନୀ ଭଳି ଏକ ଗୁରୁତ୍ୱପୂର୍ଣ୍ଣ ସ୍ଥାନରେ ଏଭଳି ବେଆଇନ କାରଖାନା ଚାଲିବା ନିଶ୍ଚିତ ଭାବେ ଚିନ୍ତାର ବିଷୟ। 

ମଧ୍ୟପ୍ରଦେଶରେ ନିଶାର କାୟା: ୯୨ କୋଟିର ଡ୍ରଗ୍ସ ଜବତ ସହ ମହିଳାଙ୍କ ମଦ୍ୟପାନକୁ ନେଇ ଚିନ୍ତାଜନକ ତଥ୍ୟ
ମଧ୍ୟପ୍ରଦେଶ, ଯାହାକୁ 'ଦେଶର ହୃଦୟ' କୁହାଯାଏ, ତାହା ବର୍ତ୍ତମାନ ନିଶାର କବଳରେ ପଡିଥିବା ପରି ମନେହେଉଛି । ଗୋଟିଏ ପଟେ ରାଜ୍ୟରେ ବେଆଇନ ନିଶା କାରବାର ବୃଦ୍ଧି ପାଉଥିବାବେଳେ, ଅନ୍ୟପଟେ ଜାତୀୟ ପରିବାର ସ୍ୱାସ୍ଥ୍ୟ ସର୍ବେକ୍ଷଣ (NFHS)ର ରିପୋର୍ଟ ମଧ୍ୟ ଏକ ଚିନ୍ତାଜନକ ଚିତ୍ର ସାମ୍ନାକୁ ଆଣିଛି ।  

ରାଜଧାନୀ ଭୋପାଳରୁ ୯୨ କୋଟି ଟଙ୍କାର ଡ୍ରଗ୍ସ ଜବତ
ନିକଟରେ ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ (DRI) ଭୋପାଳରେ ଏକ ବଡ଼ ଧରଣର କାର୍ଯ୍ୟାନୁଷ୍ଠାନ କରିଛି। "ଅପରେସନ୍ କ୍ରିଷ୍ଟାଲ୍ ବ୍ରେକ୍" ନାମକ ଏକ ସ୍ୱତନ୍ତ୍ର ଅଭିଯାନରେ, ଅଧିକାରୀମାନେ ଭୋପାଳର ଜଗଦୀଶପୁର (ଇସଲାମନଗର)ରେ ଥିବା ଏକ ବେଆଇନ କାରଖାନାରୁ ୬୧.୨ କିଲୋଗ୍ରାମ ଏମଡି (ମେଫେଡ୍ରୋନ୍) ଡ୍ରଗ୍ସ ଜବତ କରିଛନ୍ତି, ଯାହାର ଆନୁମାନିକ ମୂଲ୍ୟ ପ୍ରାୟ ୯୨ କୋଟି ଟଙ୍କା ହେବ।  ଏହି ଘଟଣାରେ ଏକ ଆନ୍ତର୍ଜାତୀୟ ଡ୍ରଗ୍ସ ସିଣ୍ଡିକେଟ୍ ସହ ଜଡ଼ିତ ସାତ ଜଣଙ୍କୁ ଗିରଫ କରାଯାଇଛି ।  

ଏହି କାରଖାନାରୁ ୫୪୧ କିଲୋଗ୍ରାମରୁ ଅଧିକ କଞ୍ଚାମାଲ ମଧ୍ୟ ଜବତ କରାଯାଇଛି । ଏହି ଘଟଣା ରାଜ୍ୟରେ ନିଶା କାରବାରର ବ୍ୟାପକତାକୁ ପଦାରେ ପକାଇଛି । ରିପୋର୍ଟ ଅନୁସାରେ  ବର୍ତ୍ତମାନ ମଧ୍ୟ ପ୍ରଦେଶରେ ୧.୬ ପ୍ରତିଶତ  ମହିଳା ମଦ୍ୟପାନ କରୁଛନ୍ତି । ବର୍ଷ ୨୦୧୫-୧୬  ଏକ ରିପୋର୍ଟ ଅନୁସାରେ ଗ୍ରାମୀଣ କ୍ଷେତ୍ରରେ ୧.୫ ପ୍ରତିଶତ ମହିଳା ମଦ୍ୟପାନ କରୁଥିଲେ । ଜାତୀୟ ପରିବାର ସ୍ୱାସ୍ଥ୍ୟ ସର୍ବେକ୍ଷଣ (NFHS)ର ତଥ୍ୟ ମଧ୍ୟପ୍ରଦେଶରେ ମହିଳାଙ୍କ ମଦ୍ୟପାନକୁ ନେଇ ଏକ ଚିନ୍ତାଜନକ ସ୍ଥିତି ଦର୍ଶାଉଛି । ଏହି ତଥ୍ୟରୁ ସ୍ପଷ୍ଟ ହେଉଛି ଯେ NFHS-4 ତୁଳନାରେ NFHS-5 ସୁଦ୍ଧା ରାଜ୍ୟରେ ମହିଳାଙ୍କ ମଦ୍ୟପାନ ସେବନ ହାର ଦୁଇ ଗୁଣରୁ ଅଧିକ ବୃଦ୍ଧି ପାଇଛି । 

 ଗୋଟିଏ ପଟେ କୋଟି କୋଟି ଟଙ୍କାର ଡ୍ରଗ୍ସ ଜବତ ଏବଂ ଅନ୍ୟପଟେ ମହିଳାଙ୍କ ମଧ୍ୟରେ ବଢୁଥିବା ମଦ୍ୟପାନର ପ୍ରଚଳନ ମଧ୍ୟପ୍ରଦେଶର ସାମାଜିକ ସ୍ୱାସ୍ଥ୍ୟ ପାଇଁ ଏକ ବଡ଼ ଆହ୍ୱାନ ସୃଷ୍ଟି କରିଛି ।  ଯଦିଓ ସରକାରୀ ସ୍ତରରେ ନିଶା ବିରୋଧୀ ଅଭିଯାନ ଚାଲୁରହିଛି, ତଥାପି ଏହି ତଥ୍ୟଗୁଡିକ ଦର୍ଶାଉଛି ଯେ ଏହି ସମସ୍ୟାର ମୁକାବିଲା ପାଇଁ ଆହୁରି ଅଧିକ କଠୋର ଓ ବ୍ୟାପକ ପଦକ୍ଷେପ ନେବାର ଆବଶ୍ୟକତା ରହିଛି ।