ଅଧାରେ ପଡିଛି ଭାର୍ଗବୀ ପୋଲ: ୨୫ ବର୍ଷ ପରେ ବି ସରୁନି କାମ

କନକ ବ୍ୟୁରୋ: ଅଭିଶପ୍ତ ପାଲଟିଛି ଅଧାଗଢ଼ା ଭାର୍ଗବୀ ପୋଲ । ୨୫ ବର୍ଷ ହେଲା କାମ ସମ୍ପୂର୍ଣ୍ଣ ହୋଇପାରୁନି । ପୁରୀ ଚନ୍ଦନପୁର ନିକଟ କୃଷ୍ଣାଜହ୍ନପୁରରେ ଥିବା ଅଧାଗଢ଼ା ଭାର୍ଗବୀ ସେତୁ । କୋଟି କୋଟି ଟଙ୍କା ଖର୍ଚ୍ଚ ହୋଇଛି । ହେଲେ କାମ ସରିବ କଣ । ତା ପୂର୍ବରୁ  ନଷ୍ଟ ହେବାକୁ ବସିଲାଣି ବ୍ରିଜ । ଦୀର୍ଘ ୨୫ ବର୍ଷରେ ହୋଇଛି ମାତ୍ର ୨ଟି ଖୁଣ୍ଟି । ୧୫ ପଂଚାୟତର ୫୦ ହଜାର ଲୋକେ ଏହି ପୋଲ ପାଇଁ ଚାହି ବସିଛନ୍ତି  । ହେଲେ ପୋଲ କାମ ସରିପାରୁନି । ଗାଁର ଲୋକମାନେ ବାଧ୍ୟ ହୋଇ ୭ କିଲୋମିଟର ରାସ୍ତା ଦେଇ ବୁଲିଯିବାକୁ ବାଧ୍ୟ ହେଉଛନ୍ତି । ଯନ୍ତ୍ରୀଙ୍କଠାରୁ ଠିକାଦାର, ଅନେକ ଥର ବଦଳି ସାରିଲେଣି ହେଲେ ପୋଲ କାମ ସରୁନି କି ୧୫ ପଂଚାୟତ ଲୋକଙ୍କ ସମସ୍ୟା ବି ସରିପାରୁନି । 

କେବଳ ସ୍ଥାନୀୟ ଲୋକ ନୁହେଁ ଚାଷୀଙ୍କ ଭରସା ଏହି ଭାର୍ଗବୀ ପୋଲ । ପ୍ରତିଦିନ କିଛି ନା କିଛି କାମ ପାଇଁ ଲୋକେ ମାଇଲ ମାଇଲ ବାଟ ବୁଲି ଯାଉଛନ୍ତି । ଏପଟେ ଚାଷୀଙ୍କର ମଧ୍ୟ ପୋଲ ଆରପଟେ ଚାଷ ଜମି ଥିବାରୁ ନଦୀ ପାର ହୋଇ ଯାଉଛନ୍ତି । ଖରା ବର୍ଷା ସବୁ ସମୟରେ ଏହି ସମାନ ସମସ୍ୟା । ନଦୀ ପାର ହୋଇ ଆରପଟକୁ ଗଲେ ଜମିରେ ଚାଷ କାମ କରନ୍ତି । ସମସ୍ୟା ନେଇ ବହୁବାର ଜଣାଯାଇଥିଲେ ବି ସମାଧାନ ହେଉନି ।  

ବର୍ତ୍ତମାନ ଅଧା ଗଢ଼ା ବ୍ରିଜ ପାଇଁ ନଦୀର ଉଭୟ ପାର୍ଶ୍ୱ ନଷ୍ଟ ହେବାରେ ଲାଗିଲାଣି । ଯଦି ନଦୀ ବନ୍ଧ ଭାଙ୍ଗେ ତେବେ ଲୋକଙ୍କ ପାଇଁ ଏହା ବିପଦ ଡାକି ଆଣିବ ।