କନକ ବ୍ୟୁରୋ: ’ଭାରତ ଭାରତ ହିଁ ରହିବା ଉଚିତ । ସାରା ବିଶ୍ବରେ ଭାରତର ସ୍ବତନ୍ତ୍ର ସମ୍ମାନ ରହିଛି କାରଣ ଏହା ଭାରତ । ସାରା ଦେଶବାସୀ ସତର୍କ ରହିବା ଉଚିତ ଯେପରି ଭାରତର ଅନୁବାଦ ନହୁଏ । ଏପରି ହେବା ଅର୍ଥ ଦେଶ ନିଜର ପରିଚୟ ହରାଇବା । ଯଦି ଆପଣ ନିଜର ପରିଚୟ ହରାଇ ଦିଅନ୍ତି, ଆପଣଙ୍କର ଯେତେ ବି ଭଲ ଗୁଣ ଥାଉ ପଛେ ଦୁନିଆର କେଉଁଠି ବି ନା ସମ୍ମାନ ମିଳିବ ନା ସୁରକ୍ଷା । ଭାରତକୁ ଅନେକ ଇଣ୍ଡିଆ ବୋଲି କହୁଛନ୍ତି । କିନ୍ତୁ ଯେତେବେଳେ ଆମେ ଏହା ବିଷୟରେ କିଛି ବିତର୍କ କରୁ ବା ଲେଖୁ ଭାରତ ସବୁବେଳେ ଭାରତ ହିଁ ରହିବା ଉଚିତ । ଭାରତର ସଂଜ୍ଞା ବ୍ୟକ୍ତିଗତଠାରୁ ଆରମ୍ଭ କରି ସାମୁହିକ ମହତ୍ତ୍ବକୁ ବହନ କରେ । ଏହା ଆମ ଦେଶ ’ଭାରତ’ର ମୂଳ ସିଦ୍ଧାନ୍ତ  । ଆରଏସଏସର ରାଷ୍ଟ୍ରୀୟ ଶିକ୍ଷା ସମ୍ମିଳନୀରେ ଏଭଳି କହି ଦେଶବାସୀଙ୍କୁ ସମ୍ବୋଧନ କରିଛନ୍ତି  ସଙ୍ଗଠନ ମୁଖ୍ୟ ମୋହନ ଭାଗବତ୍ ।

Advertisment

ଭାଗବତ୍ ଆହୁରି ମଧ୍ୟ କହିଛନ୍ତି, ’ବିଶ୍ବ ଶକ୍ତିର ଭାଷା ବୁଝେ । ଏହାକୁ ଦୃଷ୍ଟିରେ ରଖି ଭାରତକୁ ଆର୍ଥିକ ଦୃଷ୍ଟିରୁ ମଧ୍ୟ ଶକ୍ତିଶାଳୀ ଓ ସମୃଦ୍ଧ ହେବାକୁ ପଡ଼ିବ । ଭାରତକୁ ଆଉ ସୁନାର ଚଢ଼େଇ ହେବାର ଆବଶ୍ୟକତା ନାହିଁ ବରଂ ସିଂହପରି ପରାକ୍ରମୀ ହେବାକୁ ପଡ଼ିବ। ବିଶ୍ବକୁ ଡରାଇବା ନୁହେଁ ବରଂ ଅନ୍ୟ ଦେଶମାନଙ୍କୁ ସାହାଯ୍ୟ କରିବାକୁ ଭାରତକୁ ଶକ୍ତିଶାଳୀ ହେବାକୁ ପଡ଼ିବ’ ।

ଶିକ୍ଷାର ପ୍ରକୃତ ଉଦ୍ଦେଶ୍ୟ ଉପରେ ମଧ୍ୟ ଆଲୋକପାତ କରିଛନ୍ତି ଭାଗବତ୍ ।କହିଛନ୍ତି, ’ଶିକ୍ଷା କେବଳ ବିଦ୍ୟାଳୟର ଦାୟିତ୍ବ ନୁହେଁ ବରଂ ଏହା ଘରୁ ଆରମ୍ଭ ହେବା ଉଚିତ । ଯାହା ମଣିଷକୁ ସ୍ବାର୍ଥପର କରିଦିଏ ତାହା ଶିକ୍ଷା ନୁହେଁ ବରଂ ଶିକ୍ଷା ଏପରି ହେବା ଉଚିତ ଯାହା ପିଲାଙ୍କୁ ପରୋପକାରୀ ତଥା ଅନ୍ୟ ପାଇଁ ବଞ୍ଚିବା ଶିଖାଇବ । ବିଶ୍ବର ଯେକୌଣସି ସ୍ଥାନରେ ରହି ଆତ୍ମନିର୍ଭରଶୀଳ ହେବାକୁ ସମର୍ଥ କରିବ। ଶିଶୁକୁ ଆତ୍ମବିଶ୍ବାସୀ ଓ ଦୃଢ଼ମନୋବଳର ଅଧିକାରୀ ଶିକ୍ଷା ହିଁ ପ୍ରକୃତ ଶିକ୍ଷା’ ।