କନକ ବ୍ୟୁରୋ: ଭାରତ ବିପକ୍ଷରେ ଗୁରୁବାରଠାରୁ ଆରମ୍ଭ ହେବାକୁ ଥିବା ଓଭାଲ ଟେଷ୍ଟ ପୂର୍ବରୁ ଇଂଲଣ୍ଡ ଦଳକୁ ଏକ ବଡ଼ ଝଟକା ଲାଗିଛି । ଦଳର ଅଧିନାୟକ ତଥା ଷ୍ଟାର ଅଲରାଉଣ୍ଡର ବେନ୍ ଷ୍ଟୋକ୍ସ ଆହତ କାରଣରୁ ଏହି ଗୁରୁତ୍ୱପୂର୍ଣ୍ଣ ମ୍ୟାଚରୁ ବାଦ୍ ପଡ଼ିଛନ୍ତି । ତାଙ୍କ ଅନୁପସ୍ଥିତିରେ ଓଲି ପୋପ୍ ଦଳର ନେତୃତ୍ୱ ନେବେ ।
ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ECB) ପକ୍ଷରୁ ଜାରି ଏକ ବିବୃତ୍ତି ଅନୁଯାୟୀ, ଷ୍ଟୋକ୍ସଙ୍କ ଡାହାଣ କାନ୍ଧରେ ଆଘାତ ଲାଗିଥିବାରୁ ସେ ଏହି ମ୍ୟାଚ୍ ଖେଳିପାରିବେ ନାହିଁ । ଚଳିତ ସିରିଜରେ ଷ୍ଟୋକ୍ସ ବ୍ୟାଟ୍ ଓ ବଲ୍ ଉଭୟରେ ଦଳ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ତାଙ୍କ ଅନୁପସ୍ଥିତି ଦଳକୁ ବଡ଼ କ୍ଷତି ପହଞ୍ଚାଇପାରେ ।
ଷ୍ଟୋକ୍ସଙ୍କ ବାଦ୍ ପଡ଼ିବା ସହ ଇଂଲଣ୍ଡ ତା'ର ଚୂଡ଼ାନ୍ତ ଏକାଦଶରେ ଚାରୋଟି ବଡ଼ ପରିବର୍ତ୍ତନ କରିଛି । ଷ୍ଟୋକ୍ସଙ୍କ ସମେତ ସ୍ପିନର ଲିଆମ୍ ଡସନ୍ ଏବଂ ଦ୍ରୁତ ବୋଲର ଜୋଫ୍ରା ଆର୍ଚର ଓ ବ୍ରାଇଡନ୍ କାର୍ସ ମଧ୍ୟ ଦଳରୁ ବାଦ୍ ପଡ଼ିଛନ୍ତି । ତାଙ୍କ ସ୍ଥାନରେ ଯୁବ ଖେଳାଳି ଜ୍ୟାକବ୍ ବେଥେଲଙ୍କୁ ସୁଯୋଗ ଦିଆଯାଇଛି, ଯିଏକି ୬ ନମ୍ବର ସ୍ଥାନରେ ବ୍ୟାଟିଂ କରିବେ । ଏହାଛଡ଼ା ଦ୍ରୁତ ବୋଲିଂ ବିଭାଗକୁ ମଜବୁତ୍ କରିବା ପାଇଁ ଗସ୍ ଆଟକିନସନ୍, ଜେମି ଓଭରଟନ୍ ଏବଂ ଜୋଶ୍ ଟଙ୍ଗଙ୍କୁ ଦଳରେ ସାମିଲ କରାଯାଇଛି ।
ଇଂଲଣ୍ଡର ଚୂଡ଼ାନ୍ତ ଏକାଦଶ:
ଜ୍ୟାକ୍ କ୍ରଲି, ବେନ୍ ଡକେଟ୍, ଓଲି ପୋପ୍ (ଅଧିନାୟକ), ଜୋ ରୁଟ୍, ହ୍ୟାରି ବ୍ରୁକ୍, ଜ୍ୟାକବ୍ ବେଥେଲ, ଜେମି ସ୍ମିଥ୍ (ୱିକେଟ୍ କିପର), କ୍ରିସ୍ ୱକ୍ସ, ଗସ୍ ଆଟକିନସନ୍, ଜେମି ଓଭରଟନ୍, ଜୋଶ୍ ଟଙ୍ଗ।
ଭାରତ ଏବଂ ଇଂଲଣ୍ଡ ମଧ୍ୟରେ ଚାଲିଥିବା ୫ ମ୍ୟାଚ୍ ବିଶିଷ୍ଟ ଏହି ଟେଷ୍ଟ ସିରିଜରେ ଇଂଲଣ୍ଡ ୨-୧ରେ ଆଗୁଆ ରହିଛି । ଏହି ସିରିଜ୍ ବଞ୍ଚାଇବାକୁ ହେଲେ ଭାରତ ପାଇଁ ଓଭାଲ ଟେଷ୍ଟ ଜିତିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।