ସାବଧାନ !! ମହାନଦୀ ବନ୍ୟା ପାଣିରେ ବୁଲୁଛି କୁମ୍ଭୀର

କନକ ବ୍ୟୁରୋ : ମହାନଦୀର ବନ୍ୟା ପାଣିରେ ବୁଲୁଛି କୁମ୍ଭୀର। ନଦୀକୁ ଗାଧୋଇବା ପାଇଁ ଯାଉଥିଲେ ହୋଇଯାଅନ୍ତୁ ସାବଧାନ । ବୌଦ୍ଧ ବନଖଣ୍ଡ ଅଧିନସ୍ଥ କରଡ଼ି ମହାନଦୀ ଘାଟରେ ଏକ ଘଡ଼ିଆଳ କୁମ୍ଭୀର ଚଳପ୍ରଚଳ କରୁଥିବା ଦେଖିବାକୁ ମିଳିଛି । କୁମ୍ଭୀରକୁ ଦେଖି ସ୍ଥାନୀୟ ଲୋକେ ଭୟଭୀତ ହୋଇ ପଡ଼ିଛନ୍ତି।

ଅନ୍ୟପଟେ କୁମ୍ଭୀରର ସୁରକ୍ଷା ଦୃଷ୍ଟି କୋଣରୁ ଏହାର ଗତିବିଧି ଅନୁଧ୍ୟାନ ପାଇଁ ବୌଦ୍ଧ ରେଞ୍ଜ କର୍ମଚାରୀମାନେ ଘଟଣା ସ୍ଥଳରେ ପହଁଚି ଏହା ଉପରେ ନଜର ରଖିଛନ୍ତି। କୁମ୍ଭୀରର ସୁରକ୍ଷା ଦୃଷ୍ଟିରୁ ମତ୍ସ୍ୟଜୀବୀମାନଙ୍କୁ ଏହି ଅଞ୍ଚଳରେ ମାଛମରାକୁ ମଧ୍ୟ ବାରଣ କରାଯାଇଛି। ପ୍ରତିବର୍ଷ ସତକୋଶିଆ ଗଣ୍ଡ ଅଭୟାରଣ୍ୟର ସୁନାଖଣିଆ ପ୍ରାକୃତିକ ଆବାସସ୍ଥଳୀରୁ ଏକ ଅଣ୍ଡିରା ଘଡିଆଳ କୁମ୍ଭୀର ବର୍ଷା ଦିନେ ପାଖାପାଖି ୩୦ରୁ ୪୦ କିଲୋମିଟର ଉପରକୁ ଉଠି ଆସି କରଡ଼ି, ମଙ୍ଗଳପୁର, ହାଟଗାଁ, ମରଜାକୁଦ ମହାନଦୀ ଘାଟରେ ଚଳପ୍ରଚଳ କରିଥାଏ।

ଏହା ଘଡିଆଳ ପ୍ରଜାତିର କୁମ୍ଭୀର ଯାହାକି ଦେଶୀ ଭାଷାରେ ଥଣ୍ଟିଆ କୁମ୍ଭୀର ହୋଇଥିବାରୁ ଏହା ମଣିଷ ମାନଙ୍କ କୌଣସି କ୍ଷତି ଘଟାଇନଥାଏ ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି।