କନକ ବ୍ୟୁରୋ: ବାଂଲାଦେଶରେ ଶେଖ୍‌ ହସିନା ସରକାରର ପତନ ପରେ କେତେକ ବାଂଲାଦେଶୀ  ଆତଙ୍କୀ ଗୋଷ୍ଠୀ ଏବେ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସ୍‌ଆଇ ସହ  ହାତ ମିଳାଇଛନ୍ତି । ସେମାନେ ଭାରତର ଉତ୍ତର-ପୂର୍ବରେ ଅଶାନ୍ତି ସୃଷ୍ଟି ପାଇଁ ଲଗାତାର ପ୍ରୟାସ କରୁଛନ୍ତି । ପାକ୍‌-ବାଂଲାଦେଶର ମିଳିତ ଷଡ୍‌ଯନ୍ତ୍ର ସଂପର୍କରେ ପ୍ରମାଣ ମିଳିବା ପରେ ସୁରକ୍ଷା ଏଜେନ୍ସିଗୁଡ଼ିକ ହାଇଆଲର୍ଟରେ ଅଛନ୍ତି । 

Advertisment

ମଣିପୁରର ବିଷ୍ଣୁପୁରରେ ଗତ ସେପ୍ଟେମ୍ବର ୧୯ ତାରିଖରେ ଆସାମ ରାଇଫଲ୍ସ ଉପରେ ହୋଇଥିବା ଆକ୍ରମଣରେ ୨ ଯବାନ ସହିଦ ହୋଇଛନ୍ତି । ସ୍ଥାନୀୟ ଉଗ୍ରପନ୍ଥୀଙ୍କୁ ଅସ୍ତ୍ର ଯୋଗାଣରେ ବିଦେଶୀ ଶକ୍ତିଙ୍କ ହାତ ରହିଥିବାରୁ  ସୀମାରେ ସୁରକ୍ଷା କଡ଼ାକଡ଼ି କରାଯାଇଛି । ବେଆଇନ ଅସ୍ତ୍ରଶସ୍ତ୍ର ଚୋରା ଚାଲାଣ  ବୃଦ୍ଧି ପାଇଥିବାରୁ ସେନା ହାଇ  ଆଲର୍ଟରେ ରହିଛି । ମଣିପୁରରେ ସର୍ଚ୍ଚ ଅପରେସନ ଜାରି ରହିଛି ।  

ଗତ ସେପ୍ଟେମ୍ବର ୧୯ ତାରିଖରେ ଇମ୍ଫାଲରୁ ବିଷ୍ଣୁପୁର ଯାଉଥିବା ଆସାମ ରାଇଫଲ୍ସର ଏକ ମିନି ଟ୍ରକ୍ ଉପରେ ହଠାତ୍ ଅଜ୍ଞାତ ସଶସ୍ତ୍ର ବ୍ୟକ୍ତିମାନେ ଆକ୍ରମଣ କରିଥିଲେ । ଏଥିରେ ନାଏବ ସୁବେଦାର ଶ୍ୟାମ ଗୁରୁଙ୍ଗ ଏବଂ ରାଇଫଲମ୍ୟାନ୍ ରଣଜିତ ସିଂହ କଶ୍ୟପଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା । ଅନ୍ୟ ଆହତମାନଙ୍କୁ ରିମ୍ସ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ସେମାନଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି । ବିଷ୍ଣୁପୁର ଆକ୍ରମଣ ପାଇଁ କୌଣସି ଉଗ୍ରବାଦୀ ଗୋଷ୍ଠୀ ନିଜକୁ ଦାୟୀ କରିନଥିବା ବେଳେ ମଣିପୁରର ନିଷିଦ୍ଧ ଡ୍ରଗ୍ସ ଗ୍ରୁପ୍ ଉପରେ ସନ୍ଦେହ ରହିଛି ।  ଗୁଇନ୍ଦା ସୂତ୍ର ଅନୁଯାୟୀ, ଶେଖ୍‌ହସିନା ସରକାରଙ୍କ ପତନ ପରଠାରୁ ବାଂଲାଦେଶରେ ଜମାତ-ଏ-ଇସଲାମୀ ଏବଂ ଅନ୍‌ସାର ବାଙ୍ଗ୍‌ଲା ପରି ମୌଳବାଦୀ ଇସଲାମିକ ଗୋଷ୍ଠୀର ଶକ୍ତି ବୃଦ୍ଧି ପାଇଛି । ସେମାନେ ପାକିସ୍ତାନର ଆଇଏସ୍‌ଆଇ ସହ ଲଗାତାର ଯୋଗାଯୋଗରେ ରହିଛନ୍ତି । ବାଂଲାଦେଶରୁ ବେଆଇନ ଅସ୍ତ୍ରଶସ୍ତ୍ର ଏବଂ ଗୋଳାବାରୁଦ ଉତ୍ତର-ପୂର୍ବ ରାଜ୍ୟରେ ଅନୁପ୍ରବେଶ କରୁଛି ।  

ଅପରେସନ୍ ସିନ୍ଦୁର ପରେ ପାକିସ୍ତାନ ଏବେ ପୂର୍ବ ସୀମାରେ ଚାପ ସୃଷ୍ଟି କରୁଛି । ପାକିସ୍ତାନୀ ସେନା ମୁଖ୍ୟ ଅସୀମ ମୁନିର  ନିକଟରେ ଦେଇଥିବା କେତେକ ବିବୃତିରୁ ଜଣାପଡ଼ୁଛି ଯେ ଯେ ସେ ବାଂଲାଦେଶୀ ଆତଙ୍କୀଙ୍କ ସହଯୋଗରେ ଉତ୍ତର-ପୂର୍ବରେ ଅଶାନ୍ତି ସୃଷ୍ଟି କରିବାକୁ ଚାହୁଛନ୍ତି । ସୀମାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ହୋଇଥିବା ବେଳେ ଅନୁପ୍ରବେଶ ଉଦ୍ୟମ ପଣ୍ଡ କରିବା ଏବଂ ଅସ୍ତ୍ର ଓ ଡ୍ରଗ୍ସ ଚୋରା ଚାଲାଣକାରୀଙ୍କୁ ରୋକିବାକୁ ନୂଆ ରଣନୀତି ଅବଲମ୍ବନ କରାଯାଇଛି । ସେନା ଓ ସିଆର୍‌ପିଏଫ୍‌ ମିଳିତ ଅପରେସନ ଆରମ୍ଭ କରିଛନ୍ତି ।