ମିନତୀଙ୍କ ନିଆରା ଉଦ୍ୟମ; ସ୍ୱୟଂ ସହାୟକ ଗୋଷ୍ଠୀରୁ ରୁଣ ନେଇ କୁକୁଡ଼ା ଚାଷ କରି ଚଳାଉଛନ୍ତି ପରିବାର

କନକ ବ୍ୟୁରୋ : କଥାରେ ଅଛି, ନାରୀ ତୋର କେତେ ରୂପ କେତେ କାହାଣୀ, ଦିନ ସରେ ରାତି ସରେ କଥା ସରେନି.. ହିଁ ଆଜ୍ଞା କେତବେଳେ ତାକୁ ମା’ ହୋଇ ସନ୍ତାନର କଥା ବଝିବାକୁ ପଡେ ତ ପୁଣି କେତେବେଳେ ସ୍ତ୍ରୀ ପୁଣି କେତେବଳେ ଭଉଣୀ ଭାବେ ଦାୟିତ୍ୱ ନିଭାଇବାକୁ ପଡ଼ିଥାଏ । ଆଉ ପୁଣି କେତେବେଳେ ପରିବାର ଚଳାଇବା ପାଇଁ ରୋଜଗାର କରିବାକୁ ମଧ୍ୟ ସେ ପଛାଇନଥାଏ । ଆମେ କହୁଛୁ ବାଲେଶ୍ୱର ଜିଲ୍ଲା ନାଇଦଳୀ ଗାଁର ମିନତୀ ପ୍ରଧାନଙ୍କ କଥା ।

ବାଲେଶ୍ୱର ନାଇଦଳୀ ଗାଁର ବୋହୁ ମିନତୀଙ୍କ ପ୍ରେରଣାଦାୟୀ କାହାଣୀ । ଦିନେ ପରିବାର ଚଳାଇବା ପାଇଁ ମିନତୀଙ୍କ ସ୍ୱାମୀ ଆରମ୍ଭ କରିଥିଲେ କୁକୁଡ଼ା ପାଳନ । ହେଲେ ସେହି ପଇସାରେ ପରିବାର ଚଳାଇବା ବେଶ କଷ୍ଟକର ଥିଲା । ତେଣୁ ପରିବାରର ଆର୍ଥିକ ସ୍ଥିତିରେ ସୁଧାର ଆଣିବା ପାଇଁ ଆଗେଇ ଆସିଲେ ମିନତୀ । ସ୍ୱୟଂ ସହାୟକ ଗୋଷ୍ଠୀରୁ ମିଳୁଥିବା ରୁଣରେ ଆଧିକ କୁକୁଡ଼ା ଚିଆଁ କିଣି ସ୍ୱାମୀଙ୍କ କୁକୁଡ଼ା ଫାର୍ମକୁ ବଢ଼ାଇଲେ । ଯାହା ଏବେ ପରିବାର ଚଳାଇବାରେ ବେଶ ସହାୟକ ହୋଇଛି । ଅଭାବ ଅନଟନରେ ସୁଧାର ଆସିଛି ।

ବଞ୍ଚିବା ପାଇଁ ରୋଜଗାର କରିବା ତ ନିହାତି ଜରୁରୀ । ତେଣୁ ମିନତୀ ଭୋର ୪ଟାରୁ ଉଠି ଘର କାମ ସାରି ବାହାରି ପଡ଼ନ୍ତି କୁକୁଡ଼ା ଫାର୍ମରେ କାମ କରିବାକୁ । ସକାଳ ୮ଟାରୁ ୯ ଯାଏଁ କୁକୁଡ଼ା ଫାର୍ମରେ କାମ କରି ପୁଣି ଘର କାମରେ ଲାଗିପଡ଼ନ୍ତି । ସେହିପରି ଅପରାହ୍ନ ୫ଟାରୁ କୁକୁଡ଼ା ଫାର୍ମରେ କାମ କରିବାକୁ ପଡ଼ିଥାଏ । ଅଧିକ ଅର୍ଥ ନଥିବାରୁ କୁକୁଡ଼ା ଫାର୍ମଟି ଉନ୍ନତ ମାନର କରିପାରିନାହାନ୍ତି । ତେଣୁ ଏଥିପାଇଁ ସେ ଏକ ରୁଣ ପାଇଁ ଆବେଦନ କରିଛନ୍ତି । ଅଧିକ ରୁଣ ମିଳିଲେ ସେ ଏହି କାମକୁ ଆହୁରି ଆଗକୁ ବଢାଇବେ ବୋଲି କହିଛନ୍ତି ।

ମିନତୀଙ୍କ ଏଭଳି କାମ ସ୍ଥାନୀୟ ଅଂଚଳରେ ଉଦାହରଣ ସୃଷ୍ଟି କରିଛି । ତାଙ୍କ ଉଦ୍ୟମରେ ପରିବାରର ଅର୍ଥିକ ସ୍ଥିତିରେ ଉନ୍ନତି ଆସିପାରିଛି । ସ୍ତ୍ରୀ ଲୋକ ମାନେ ଯେ ଘର ଚାରି କାନ୍ଥ ଭିତରେ ରହିବେ ତାହା ନୁହେଁ, ମହିଳା ମାନେ ନିଜସ୍ୱ ଉଦ୍ୟମରେ ସବୁଥିରେ ସଫଳ ହୋଇପାରନ୍ତି ବୋଲି ପ୍ରମାଣିତ କରିଛନ୍ତି ମିନତୀ ।