ଭୂତଙ୍କ ନାଁରେ ବାବୁ ଖାଉଥିଲେ ଭତ୍ତା ଟଙ୍କା; ଗୁମର ଖୋଲିଦେଲେ ବାଲେଶ୍ବର ସାଂସଦ

କନକ ବ୍ୟୁରୋ: ମଲା ଲୋକଙ୍କୁ ବି ଛାଡ଼ୁ ନାହାନ୍ତି ଦାଗୀ ବାବୁ । ଅସହାୟଙ୍କ ଆଖିରେ ଧୂଳି ଦେଇ ଦୁର୍ନୀତିଗ୍ରସ୍ତ ଅଧିକାରୀ ମାନେ ନିଜ ପକେଟ୍ ଗରମ କରୁଛନ୍ତି । ଏପରିକି ମାସକୁ ମାସ ପାଉଥିବା ଭତ୍ତା ଟଙ୍କାକୁ ଚଳୁ କରି ଦେଇଛନ୍ତି । ପଞ୍ଚାୟତ ସମିତି ବୈଠକରେ ସତ ସାମନାକୁ ଆସିବା ପରେ ପ୍ରଶାସନ ଉପରେ ଉଠିଛି ବଡ଼ ପ୍ରଶ୍ନ । ବର୍ଷ ବର୍ଷ ଧରି ଗରିବ ଅସହାୟ ବୃଦ୍ଧ ବୃଦ୍ଧାଙ୍କ ଭତ୍ତା ଟଙ୍କାକୁ ଚଳୁ କରିଦେଉଥିଲେ ବାଲେଶ୍ବର ବାଲିଆପାଳର କୁଣ୍ଡୁଳି ପଞ୍ଚାୟତ ନିର୍ବାହୀ ଅଧିକାରୀ ବା ପିଇଓ ଗୌତମ ସେଠୀ । ପଚାରିଲେ ନାଲିଆଖି ଦେଖାଉଥିଲେ ନହେଲେ ମୁହଁ ଫେରାଇ ଚାଲିଯାଉଥିଲେ । ହେଲେ ପଞ୍ଚାୟତ ସମିତି ବୈଠକରେ ଏବେ ସାଙ୍ଘାତିକ କେଳେଙ୍କାରୀର ପର୍ଦ୍ଦାଫାସ ହୋଇଛି । କୁଣ୍ଡୁଳି ପଞ୍ଚାୟତର ୩୦ରୁ ଅଧିକମୃତ ବ୍ୟକ୍ତି ଏବଂ ୧୫ ରୁ ଅଧିକ ଅସହାୟ ବୃଦ୍ଧ ବୃଦ୍ଧାଙ୍କ ଭତ୍ତା ଟଙ୍କାକୁ ହଡ଼ପ କରିଛନ୍ତି ପଞ୍ଚାୟତର ପିଇଓ । 

ଦାଗୀ ବାବୁ ଜଣକ ବିଧବା, ଅସହାୟ, ଗରିବ ବୃଦ୍ଧ ଦମ୍ପତିଙ୍କ ଭତ୍ତା ଟଙ୍କାକୁ ବି ଖାଇ ଯାଉଥିଲା । ଯାହାକୁ ନେଇ ଅଭିଯୋଗର ଲମ୍ବା ତାଲିକା ସାଂସଦଙ୍କ ହସ୍ତଗତ ହୋଇଛି । ତେବେ ଖାଲି ପିଇଓ ହଡ଼ପ କରୁଥିଲେ ନା ତାଙ୍କ ପଛରେ ଆଉ କିଏ ବଡ଼ ମୁଣ୍ଡର ହାତ ଅଛି? ସେନେଇ ତଦନ୍ତ କଲେ ସବୁ ସତ ପଦାକୁ ଆସିବ । ସେପଟେ ସୂଚନା ଅଧିକାର ଆଇନ ବଳରେ ସତ ଜଣା ପଡ଼ିବା ପରେ ବାଲିଆପାଳ ବିଡିଓ, ଯୋଗାଣ ଅଧିକାରୀ ଏବଂ ବ୍ଲକ ସାମାଜିକ ସୁରକ୍ଷା ଅଧିକାରୀଙ୍କ ଉପସ୍ଥିତିରେ ଦାଗୀ ପିଇଓଙ୍କୁ ଜେରା କରିଥିଲେ ବାଲେଶ୍ବର ସାଂସଦ ପ୍ରତାପ ଷଡ଼ଙ୍ଗୀ । ଫଳରେ ସତ ମାନି ଟଙ୍କା ଫେରାଇବା ପାଇଁ ରାଜି ହୋଇଛନ୍ତି ଏହି ଦୁର୍ନୀତିଖୋର ବାବୁ ଜଣକ । ଅସହାୟ ବୃଦ୍ଧବୃଦ୍ଧାଙ୍କ ଭତ୍ତା ଟଙ୍କାକୁ ହଡ଼ପ କରିଥିବା ଏହି ଅବିବେକି ବାବୁଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି । 

ଅଧିକ ପଢ଼ନ୍ତୁ--କର୍ଣ୍ଣାଟକ କଂଗ୍ରେସର ତୁଟି ଗଲା କି କଳି ? ଗୋଟିଏ ଟେବୁଲକୁ ଆସିଲେ ଡି.କେ ଓ ସିଦ୍ଧରମୈୟା