କେବେ ମିଳିବ ବଳଙ୍ଗା ପୀଡ଼ିତାଙ୍କୁ ନ୍ୟାୟ?

କନକ ବ୍ୟୁରୋ: ବଳଙ୍ଗା ପୀଡ଼ିତାଙ୍କ ମୃତ୍ୟୁ ଘଟଣାକୁ ଯେମିତି ପୁଲିସ୍ ମନରୁ ପୋଛି ଦେଇଛି । ନା କିଛି ତଦନ୍ତ ଚାଲିଛି, ନା ମାମଲା ଆଗକୁ ବଢ଼ିଛି । ବରଂ ସୋସିଆଲ ମିଡିଆ ମାଧ୍ୟମରେ କେହିଁ ଦାୟୀ ନୁହଁନ୍ତି ବୋଲି କହି ପୁଲିସ୍ ହାତବାନ୍ଧି ବସିପଡିଛି । ଏହାଭିତରେ ୨୨ ଦିନ ବିତିଲାଣି । ବାପାଙ୍କ ଷ୍ଟେଟମେଣ୍ଟ ପରେ ପୁରା ଘଟଣା ଗୋଳମାଳିଆ ହୋଇଯାଇଛି । ପୁରୀ ମହିଳା ଡିଏସପି କଳ୍ପନା କଅଁରଙ୍କ ନେତୃତ୍ବରେ ଏକ ଟିମ୍ ତଦନ୍ତ କରୁଥିଲା । ହେଲେ ଏବେ ତଦନ୍ତ ଆଗକୁ ବଢ଼ୁଥିବାର ନାଁ ଗନ୍ଧ ନାହିଁ । ଅସମୟରେ ଗୋଟିଏ ଜୀବନ ଚାଲିଗଲା, ହେଲେ ଏଥିପାଇଁ କିଏ ଦାୟୀ ଜଣାପଡ଼ିଲାନି । ଆଜି ପର୍ଯ୍ୟନ୍ତ ଜଣେ ବି ଅଭିଯୁକ୍ତ ଗିରଫ ହୋଇନାହାନ୍ତି । ହେଲେ ଅନେକ କିଛି ପ୍ରଶ୍ନର ଉତ୍ତର ଏବେବି ମିଳିପାରିନି ।

Advertisment

୧୯ ଜୁଲାଇର ସେହି କାଳ ଘଟଣା କାହିଁକି ଘଟିଲା?
ଘଟଣା ପଛରେ କିଏ ଥିଲା?
ହଠାତ୍ ବାପାଙ୍କ ଷ୍ଟେଟମେଣ୍ଟକୁ କାହିଁକି ପୁଲିସ୍ ସତ ମାନିନେଲା?
ନିଆଁ ଲଗାଇଥିବା କୁହାଯାଉଥିବା ୩ ଅଭିଯୁକ୍ତଙ୍କ ବିଷୟରେ ଆଉ କାହିଁକି ଖୋଳତାଡ଼ ହେଲାନି?

ବଳଙ୍ଗା ଘଟଣାରେ ପୀଡିତାଙ୍କୁ ନ୍ୟାୟ ଦାବିରେ ବଳଙ୍ଗାଠାରୁ ନିମାପଡା ପର୍ଯ୍ୟନ୍ତ ପଦଯାତ୍ରା କରିଛି କଂଗ୍ରେସ । ପିସିସି ସଭାପତି ଭକ୍ତଚରଣ ଦାସଙ୍କ ସମେତ ଦଳର ଅନେକ ବରିଷ୍ଠ ନେତା ପଦଯାତ୍ରାରେ ସାମିଲ ହୋଇଛନ୍ତି । ପୀଡିତାଙ୍କ ଗାଁ ବଳଙ୍ଗା ବାୟାବରରୁ ପଦଯାତ୍ରା ଆରମ୍ଭ ହୋଇଥିଲା । ସେପଟେ କଂଗ୍ରେସ ପଦଯାତ୍ରା ପାଇଁ ପୀଡ଼ିତାଙ୍କ ଘର ଓ କବର ଦିଆଯାଇଥିବା ସ୍ଥାନରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଥିଲା ।

ଯଦି କେହି ଦୋଷୀ ନୁହଁନ୍ତି, ଯଦି ଏତେ ବଡ଼ ଘଟଣାରେ କାହାରି ହାତ ନାହିଁ, ତାହେଲେ ଜଣେ ନାବାଳିକାର ଜୀବନ କେମିତି ଚାଲିଗଲା, ଏସବୁର ଉତ୍ତର ଖୋଜୁଛି ସାରା ଓଡ଼ିଶା ।