ସରୁନାହିଁ ହାତୀଛୁଆର ଦୁଃଖ, ଅସୁସ୍ଥ ଅବସ୍ଥାରେ ବୁଲୁଛି ଏ ଜଙ୍ଗଲରୁ ସେ ଜଙ୍ଗଲ, ଆହାତ ଛୁଆକୁ ଘେରି ରହିଛନ୍ତି ହାତୀପଲ

କନକ ବ୍ୟୁରୋ :  କେନ୍ଦୁଝର ଏଵଂ ମୟୂରଭଞ୍ଜର ଏ ଜଙ୍ଗଲରୁ ସେ ଜଙ୍ଗଲ ଘୁରି ବୁଲୁଛନ୍ତି ୩୦ ଟିକିଆ ହାତୀପଲ । ୧୨ଟି ମାଈହାତୀ, ୧୧ଟି ଦନ୍ତା ଏଵଂ ୭ଟି ଛୁଆ ହାତୀ । ଏମାନଙ୍କ ମଧ୍ୟର ରହିଛି ଏକ ଆହତ ହାତୀଛୁଆ । ଗୋଡରେ ଆଘାତ ପାଇଁ ମାସେ ହେବ ଛୋଟେଇ ଛୋଟେଇ ଘୂରି ବୁଲୁଛି । ପହଁରି ପହଁରି ନଦୀ ପାର ହେଉଛି । ଯିଏ ଏହି ହାତୀ ଛୁଆର କଷ୍ଟ ଦେଖୁଛି, ମନରୁ ଆପେଆପେ ଆହା ବାହାରି ଆସୁଛି ।

ଏପଟେ ବନ ବିଭାଗ ଆହାତ ଛୁଆ ହାତୀ ଉପରେ ନଜର ରଖିଥିଲେ ବି ତାର ଚିକିତ୍ସା ଆରମ୍ଭ ହୋଇପାରୁନି । କାରଣ ହାତୀପଲ ଆହାତ ଛୁଆକୁ ଜଗି ରହୁଛନ୍ତି ।  ସେମାନଙ୍କ ଭିତରୁ ତାକୁ ଅଲଗା କରିବା କଷ୍ଟକର ହୋଇପଡିଛି ।  ଅନ୍ୟପଟେ ହାତୀ ଛୁଆଟି ମାଆ କ୍ଷୀର ଖାଉଥିବାରୁ ତାକୁ ଅଲଗା କଲେ ହାତୀପଲ ଉଗ୍ର ହୋଇପଡ଼ିବେ ବୋଲି କହିଛନ୍ତି ଡିଏଫଓ ।

 ହାତୀ ଗୋଡ଼ରେ ଆଘାତ ଲାଗିଥିବା ବେଳେ ପାଣି ଲାଗି ତାହା ସଂକ୍ରମଣ ହେବାର ଆଶଙ୍କା ରହିଛି ।  ତେଣୁ ତୁରନ୍ତ ତାକୁ ଉଦ୍ଧାର କରି ଚିକିତ୍ସା ଆରମ୍ଭ କରିବା ଜରୁରୀ।