ଅଯୋଧ୍ୟାରେ ମକର ସଂକ୍ରାନ୍ତି ଉତ୍ସବ: ସରଜୁ ନଦୀରେ ୫ ଲକ୍ଷ ଶ୍ରଦ୍ଧାଳୁଙ୍କ ପବିତ୍ର ବୁଡ଼, ସୁରକ୍ଷା ବ୍ୟବସ୍ଥା କଡ଼ାକଡ଼ି

କନକ ବ୍ୟୁରୋ: ପବିତ୍ର ମକର ସଂକ୍ରାନ୍ତି ଅବସରରେ ଭଗବାନ ଶ୍ରୀରାମଙ୍କ ଜନ୍ମସ୍ଥାନ ଅଯୋଧ୍ୟା ଆଧ୍ୟାତ୍ମିକ ରଙ୍ଗରେ ରଙ୍ଗେଇ ହୋଇଛି । ସୂର୍ଯ୍ୟ ଦେବତା ଧନୁ ରାଶିରୁ ମକର ରାଶିରେ ପ୍ରବେଶ କରୁଥିବା ଏହି ପବିତ୍ର ଦିନରେ ଅଯୋଧ୍ୟାର ସରଜୁ ନଦୀରେ ସ୍ନାନ କରିବା ପାଇଁ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ପରିଲକ୍ଷିତ ହୋଇଛି । ପ୍ରଶାସନିକ ଆକଳନ ଅନୁଯାୟୀ, ଚଳିତ ବର୍ଷ ପ୍ରାୟ ୫ ଲକ୍ଷରୁ ଅଧିକ ଶ୍ରଦ୍ଧାଳୁ ସରଜୁ ନଦୀରେ ପବିତ୍ର ବୁଡ଼ ପକାଇ ପୁଣ୍ୟ ଅର୍ଜନ କରିବାର ସମ୍ଭାବନା ରହିଛି ।
 
ହିନ୍ଦୁ ଧର୍ମରେ ମକର ସଂକ୍ରାନ୍ତିର ଏକ ବିଶେଷ ମହତ୍ତ୍ୱ ରହିଛି। ବିଶେଷକରି ଅଯୋଧ୍ୟାରେ ସରଜୁ ନଦୀରେ ସ୍ନାନ କରିବା ପରେ ଦାନଧର୍ମ କରିବା ଏବଂ ପ୍ରଭୁ ଶ୍ରୀରାମଙ୍କ ଦର୍ଶନ କରିବା ଅତ୍ୟନ୍ତ ପୁଣ୍ୟଦାୟକ ବୋଲି ବିଶ୍ୱାସ କରାଯାଏ । ଭୋର୍‌ ସମୟରୁ ହିଁ ‘ଜୟ ଶ୍ରୀରାମ’ ଏବଂ ‘ହର ହର ଗଙ୍ଗେ’ ଧ୍ୱନିରେ ଅଯୋଧ୍ୟାର ସମସ୍ତ ଘାଟ ପ୍ରକମ୍ପିତ ହୋଇଉଠିଛି । ଶ୍ରଦ୍ଧାଳୁମାନେ ସ୍ନାନ ସାରି ସୂର୍ଯ୍ୟ ଦେବତାଙ୍କୁ ଅର୍ଘ୍ୟ ଅର୍ପଣ କରିବା ସହ ରାମଲଲାଙ୍କ ଦର୍ଶନ ପାଇଁ ଲମ୍ବା ଧାଡ଼ିରେ ଛିଡ଼ା ହୋଇଥିବା ଦେଖିବାକୁ ମିଳିଛି । ଲକ୍ଷ ଲକ୍ଷ ଲୋକଙ୍କ ସମାଗମକୁ ଦୃଷ୍ଟିରେ ରଖି ଅଯୋଧ୍ୟା ପୁଲିସ ଓ ସ୍ଥାନୀୟ ପ୍ରଶାସନ ପକ୍ଷରୁ ଅଭୂତପୂର୍ବ ସୁରକ୍ଷା ବ୍ୟବସ୍ଥା କରାଯାଇଛି । ସମଗ୍ର ସହରକୁ ବିଭିନ୍ନ ସେକ୍ଟର ଓ ଜୋନରେ ବିଭକ୍ତ କରାଯାଇଛି । 

ମେଳା ପରିସରରେ ମୋଟ ୯୬୦ ଜଣ ମେଳା କର୍ମୀ ଏବଂ ୫୨୮ ଜଣ ଅତିରିକ୍ତ କର୍ମଚାରୀଙ୍କୁ ନିୟୋଜିତ କରାଯାଇଛି । ଦିନ ଏବଂ ରାତି ନିରନ୍ତର ସଫାସୁତୁରା ସୁନିଶ୍ଚିତ କରିବା ପାଇଁ ସଫେଇ ପ୍ରକ୍ରିୟାକୁ ତିନୋଟି ସିଫ୍ଟରେ ବିଭକ୍ତ କରାଯାଇଛି। ୧୫ଟି ସ୍ଥାନରେ ପାର୍କିଂ ମଧ୍ୟ ଉପଲବ୍ଧ ହେବ । 

ପ୍ରାୟ ୧୦,୦୦୦ ରୁ ଅଧିକ  ପୁଲିସ କର୍ମଚାରୀଙ୍କୁ ବିଭିନ୍ନ ସ୍ଥାନରେ ମୁତୟନ କରାଯାଇଛି । ସେଥିମଧ୍ୟରେ ପିଏସି, ଆରଏଏଫ ଏବଂ ସାଧା ପୋଷାକଧାରୀ ପୁଲିସ କର୍ମଚାରୀ ସାମିଲ ଅଛନ୍ତି ।   ନଦୀରେ ବୁଡ଼ ପକାଉଥିବା ସମୟରେ କୌଣସି ଅଘଟଣକୁ ରୋକିବା ପାଇଁ ଜଳ ପୁଲିସ ଏବଂ ଏସଡିଆରଏଫ ଟିମକୁ ନୌକା ସହ ମୁତୟନ କରାଯାଇଛି । ସ୍ନାନ ଘାଟଗୁଡ଼ିକରେ ବ୍ୟାରିକେଡିଂ କରାଯାଇ ସୀମା ନିର୍ଦ୍ଧାରଣ କରାଯାଇଛି ।

ସିସିଟିଭି ଓ ଡ୍ରୋନ୍ ନଜର: ସୁରକ୍ଷା ବ୍ୟବସ୍ଥାର ତଦାରଖ ପାଇଁ ସମଗ୍ର ମେଳା ଅଞ୍ଚଳରେ ଶତାଧିକ ସିସିଟିଭି କ୍ୟାମେରା ଲଗାଯାଇଛି। ଏହା ବ୍ୟତୀତ ଡ୍ରୋନ୍ କ୍ୟାମେରା ମାଧ୍ୟମରେ ଭିଡ଼ ନିୟନ୍ତ୍ରଣ ଏବଂ ସନ୍ଦିଗ୍ଧ ଗତିବିଧି ଉପରେ କଡ଼ା ନଜର ରଖାଯାଉଛି  ।
 
ଶ୍ରଦ୍ଧାଳୁଙ୍କ ସୁବିଧା ପାଇଁ ପ୍ରଶାସନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଶୀତ ଦିନ ହୋଇଥିବାରୁ ବିଭିନ୍ନ ସ୍ଥାନରେ ଅଲାଟ (ନିଆଁ) ଜଳାଯିବାର ବ୍ୟବସ୍ଥା ହୋଇଛି । ଯାତ୍ରୀମାନଙ୍କ ରହିବା ପାଇଁ ଧର୍ମଶାଳା ଓ ଆଶ୍ରୟ ସ୍ଥଳୀ ଗୁଡ଼ିକରେ ବ୍ୟାପକ ବ୍ୟବସ୍ଥା କରାଯାଇଛି  । ପାନୀୟ ଜଳ, ଚିକିତ୍ସା ସେବା ଏବଂ ମୋବାଇଲ ଶୌଚାଳୟର ସୁବିଧା ମଧ୍ୟ ଯୋଗାଇ ଦିଆଯାଇଛି । ଟ୍ରାଫିକ ନିୟନ୍ତ୍ରଣ ପାଇଁ ଅଯୋଧ୍ୟା ସହରକୁ ସଂଯୋଗ କରୁଥିବା ପ୍ରମୁଖ ରାସ୍ତାଗୁଡ଼ିକରେ ଭାରିଯାନ ଚଳାଚଳ ଉପରେ କଟକଣା ଜାରି କରାଯାଇଛି ।
 
ମକର ସଂକ୍ରାନ୍ତିର ଏହି ପବିତ୍ର ଅବସର ଅଯୋଧ୍ୟାରେ ଏକ ଅଦ୍ଭୁତପୂର୍ବ ଆଧ୍ୟାତ୍ମିକ ବାତାବରଣ ସୃଷ୍ଟି କରିଛି। ପ୍ରଶାସନର ସତର୍କତା ଏବଂ ସୁରକ୍ଷା ବ୍ୟବସ୍ଥା କାରଣରୁ ଶ୍ରଦ୍ଧାଳୁମାନେ ଶାନ୍ତିଶୃଙ୍ଖଳାର ସହ ସରଯୂ ସ୍ନାନ ଓ ଦର୍ଶନ କରୁଛନ୍ତି। ‘ରାମ ନଗରୀ’ର ଏହି ଉତ୍ସବ ଭାରତୀୟ ସଂସ୍କୃତି ଓ ପରମ୍ପରାର ଏକ ଜ୍ୱଳନ୍ତ ଉଦାହରଣ ଭାବରେ ଉଭା ହୋଇଛି ।