କାଗଜପତ୍ରରେ ସୀମିତ ସ୍ୱାୟତ୍ତ ଶାସନ; ସରକାରଙ୍କ ହାତ ଟେକାକୁ ଅପେକ୍ଷା

କନକ ବ୍ୟୁରୋ: ରାଜ୍ୟ ପାଳୁଛି ସ୍ବାୟତ୍ତ ଶାସନ ଦିବସ, ଆୟୋଜିତ ହେଉଛି ରାଜ୍ୟସ୍ତରୀୟ କାର୍ଯ୍ୟକ୍ରମ । ସରକାର ଏଥିପାଇଁ ମାଳମାଳ ଯୋଜନା ଘୋଷଣା କରୁଛନ୍ତି । ହେଲେ ବଡ଼ ମଞ୍ଚ, ଆଉ ଭାଷଣରେ ସୀମିତ ସ୍ବାୟତ୍ତ ଶାସନ ଦିବସ । କେବଳ ସ୍ଲୋଗାନରେ ରହିଯାଇଛି ସ୍ୱାୟତ୍ତ ଶାସନ । ଅନେକ ଯୋଜନା ଘୋଷଣା ହେଉଛି ସତ, ହେଲେ କାର୍ଯ୍ୟକାରୀ ହେଉନି । ଖାସ୍ କରି ତୃଣମୂଳସ୍ଥଳରେ ସ୍ଥିତି ସମ୍ପୂର୍ଣ୍ଣ ଭିନ୍ନ । ସ୍ୱାୟତ୍ତଶାସନ କେବଳ କାଗଜପତ୍ରରେ ସୀମିତ ରହିଲା ପରେ ଦେଖାଯାଉଥିବାବେଳେ, ଏବେ ବି ଅନେକ ମ୍ୟୁନିସିପାଲଟି ସରକାରୀ ହାତଟେକାକୁ ଅପେକ୍ଷା କରି ବସିଛି । ସରକାରୀ ଅର୍ଥ ବିନା ସତେ ଯେମିତି କିଛି ବି କାମ ଆଗେଇ ପାରୁନି ।

ଆପଣମାନେ ଜାଣିଥିବେ ଯେ, ସ୍ବ-ଆୟତ୍ତ ଅର୍ଥାତ୍‌ ସ୍ବାୟତ୍ତ ହେଉଛି ନିଜେ ନିଜକୁ ଶାସନ କରିବା । ସରକାରୀ ହାତଟେକାକୁ ଅପେକ୍ଷା କରିବାନି । ନିଜେ ନିଜର ଉନ୍ନତୀକରଣ କରିବା ଉଦ୍ଦେଶ୍ୟରେ ହିଁ ଆରମ୍ଭ ହୋଇଥିଲା ସ୍ବାୟତ୍ତ ଶାସନ ବ୍ୟବସ୍ଥା । ଯାହାକୁ କି ଅଗଷ୍ଟ ୩୧ରେ ପାଳନ କରାଯାଉଛି । ଏହି ବ୍ୟବସ୍ଥାରେ ମ୍ୟୁନିସିପାଲିଟି ହାତରେ ସବୁ କ୍ଷମତା ରଖିବାକୁ ଲକ୍ଷ୍ୟ ରଖାଯାଇଥିଲା । ହେଲେଏବେ ଲକ୍ଷ୍ୟଠାରୁ ବହୁଦୂରରେ ସ୍ବାୟତ୍ତ ବ୍ୟବସ୍ଥା । ବଡ଼ କାର୍ଯ୍ୟକ୍ରମରେ ସୀମିତ ସ୍ବାୟତ୍ତ ଶାସନ ଦିବସ, ସହରାଞ୍ଚଳର ବିକାଶ ମଧ୍ୟ ହୋଇପାରୁନି । ଯାହାଫଳରେ କି ନିଜ ଖର୍ଚ୍ଚ ତୁଲାଇପାରୁନି ମହାନଗର ନିଗମ । ରାସ୍ତାଘାଟ ଉନ୍ନତୀକରଣ ପାଇଁ ସରକାରଙ୍କ ଉପରେ ନିର୍ଭରଶୀଳ ମ୍ୟୁନିସିପାଲଟି । ଏମିତି କି ଆଲୋକୀକରଣ ପାଇଁ ମଧ୍ୟ ସରକାରଙ୍କ ହାତଟେକାକୁ ଅପେକ୍ଷା କରିବାକୁ ପଡୁଛି । ଯାହାଦ୍ୱାରା କି ମହାନଗର ହାତରୁ କମୁଛି କ୍ଷମତା ।

ଏବେ ବି ସରକାରଙ୍କ ହାତ ଟେକାକୁ ଅପେକ୍ଷା ଅନେକ ମହାନଗର ନିଗମ । ଆପଣ ଜାଣି ଆଶ୍ଚର୍ଯ୍ୟ ହେବେ, ଖଜଣା ଆଦାୟରେ ଭୁବନେଶ୍ବର ପଛୁଆ  । ଏହାସହ ହୋଲ୍ଡିଂ ଟ୍ୟାକ୍ସ, ଜଳ କରରେ କେଳେଙ୍କାରୀ ଫଳରେ ଆଦାୟ ହୋଇପାରୁନି କର । ଯାହାଫଳରେ କି ଟାର୍ଗେଟ୍ ପୂରଣ ହେଉନି । ଅନ୍ୟପଟେ ଯେଉଁସବୁ ଲକ୍ଷ୍ୟ ରଖି ମହାନଗର ନିଗମ ଗଠନ କରାଯାଇଥିଲା । ସେଥିପାଇଁ ଏବେ ସରକାରଙ୍କ ଉପରେ ନିର୍ଭରଶୀଳ ଅନେକ ମହାନଗର ନିଗମ ।