ଆଲୋଚନା ନକରି ଇରାନ୍ ଉପରେ ଆକ୍ରମଣ କର : ଆତ୍ମହତ୍ୟା ପୂର୍ବରୁ ଟ୍ରମ୍ପଙ୍କୁ ଯୁବକଙ୍କ ଅନୁରୋଧ

କନକବ୍ୟୁରୋ : ଇରାନର ଜଣେ ବ୍ୟକ୍ତି ସୋସିଆଲ ମିଡିଆରେ ଏକ ଭିଡିଓ ପୋଷ୍ଟ କରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଇରାନ ସହିତ କୌଣସି ସାଲିସ ନକରିବାକୁ ଅନୁରୋଧ କରିଛନ୍ତି  ।  ଟ୍ରମ୍ପଙ୍କୁ ଏପରି ନିବେଦନ କରିବା ପରେ ଉକ୍ତ ବ୍ୟକ୍ତି ଜଣକ ଆତ୍ମହତ୍ୟା କରିଥିବା ଜଣାପଡ଼ିଛି ।  ଇରାନର ଏକ ଗଣମାଧ୍ୟମ ରିପୋର୍ଟ ଅନୁଯାୟୀ, ଉକ୍ତ ବ୍ୟକ୍ତି ଜଣକ ହେଉଛନ୍ତି ପୋରିଆ ହମିଦି ।

ଅଧିକ ପଢନ୍ତୁ... ପୁଣି ଜଳିଲା ମଣିପୁର : ୩୦ରୁ ଅଧିକ ଘରେ ଲଗାଇଲେ ନିଆଁ...

ସେ ୧୦ ମିନିଟରୁ ଅଧିକ ଲମ୍ବା ଏକ ଭିଡିଓ ପୋଷ୍ଟ କରିଛନ୍ତି ,  ଯାହା ଇରାନରେ ପ୍ରତିବାଦ ଉପରେ ହୋଇଥିବା ମାରାତ୍ମକ କାର୍ଯ୍ୟାନୁଷ୍ଠାନ ପ୍ରତି ବିଶ୍ୱବ୍ୟାପୀ ଦୃଷ୍ଟି ଆକର୍ଷଣ କରୁଛି ଏବଂ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲି ଖେମିନିଙ୍କ ଶାସନ ବିରୁଦ୍ଧରେ ବିଦେଶୀ ହସ୍ତକ୍ଷେପ ପାଇଁ ଆହ୍ୱାନ କରୁଛି ।  ଇରାନର ଦକ୍ଷିଣ ବନ୍ଦର ସହର ବୁଶହରର ୨୮ ବର୍ଷୀୟ ବାସିନ୍ଦା ହମିଦି ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ କହିଛନ୍ତି, ଯଦି ତୁମେ ଏହା ଦେଖୁଛ, ତେବେ ମୁଁ ଆଉ ଏହି ଦୁନିଆରେ ନାହିଁ, ମରିବା ପୂର୍ବରୁ ମୁଁ କହିରଖୁଛି କି, ଇରାନରେ ୪୦ହଜାରରୁ ଅଧିକ ଲୋକଙ୍କୁ ଗଣହତ୍ୟା କରାଯାଇଛି, ଏହି ମୃତ୍ୟୁ ସଂଖ୍ୟା ରୁଷ-ୟୁକ୍ରେନ ଯୁଦ୍ଧ ଓ ଇସ୍ରାଏଲ-ପାଲେଷ୍ଟାଇନ ଯୁଦ୍ଧ ଅପେକ୍ଷା ଅଧିକ।

ହାମିଦି ସିଧାସଳଖ ଆମେରିକାର ନେତୃତ୍ୱକୁ ସମ୍ବୋଧିତ କରି ଇରାନ ସହିତ କୌଣସି କୂଟନୈତିକ ଚୁକ୍ତି ନକରିବାକୁ ଅନୁରୋଧ କରିଛନ୍ତି। ସେ କହିଛନ୍ତି ଯେ ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲି ଖେମିନିଙ୍କ ସହିତ ଯେକୌଣସି ଚୁକ୍ତି "ମୃତ୍ୟୁବରଣ କରିଥିବା ସମସ୍ତ ଲୋକଙ୍କ ସହିତ ବିଶ୍ୱାସଘାତକତା" ହେବ। ତେଣୁ ମୁଁ ଆପଣଙ୍କୁ ଅନୁରୋଧ କରୁଛି, ଏହି ଚୁକ୍ତିକୁ ବନ୍ଦ କରିବା ପାଇଁ ଯାହା ସମ୍ଭବ କର।

ଆମେରିକା ରାଷ୍ଟ୍ରପତି ଟ୍ରମ୍ପ ଇରାନବାସୀଙ୍କୁ ପ୍ରତିବାଦ ଜାରି ରଖିବାକୁ କହିଥିଲେ, ଏବଂ ଆମେ କରିଥିଲୁ, ଆମେ ତାଙ୍କୁ ବିଶ୍ୱାସ କରିଥିଲୁ, କିନ୍ତୁ ସଶସ୍ତ୍ର ବାହିନୀ ସହିତ ଲଢ଼ିବା ସମ୍ଭବ ନୁହେଁ ଏବଂ ବାହ୍ୟ ସମର୍ଥନ ବିନା ଇରାନୀ ଜନତା ଇସଲାମିକ ଶାସନ ବିରୁଦ୍ଧରେ ଜିତିପାରିବେ ନାହିଁ। ଇରାନ ଉପରେ ଆମେରିକାର ଆକ୍ରମଣ ବର୍ତ୍ତମାନ ଆମର ଏକମାତ୍ର ଆଶା । 

ଆମେ ଏହି ଶାସକ ସହିତ ଏକା ଲଢ଼ିପାରିବୁ ନାହିଁ ।  ଆମ ଲୋକଙ୍କୁ ବିଦେଶୀ ସାହାଯ୍ୟର ଆବଶ୍ୟକତା ଅଛି ।  ଆପଣ ଜାଣନ୍ତି ନାହିଁ ଯେ ଆମର ଲୋକମାନେ ବର୍ତ୍ତମାନ କେତେ ହତାଶ ଅଛନ୍ତି । ମୁଁ ନିଜେ ଖାଇପାରୁନାହିଁ, ମୁଁ ଶୋଇପାରୁନାହିଁ । କାରଣ ଏପରି ସ୍ଥାନରେ ଜନ୍ମ ହେବା ଓ ମୋର କୌଣସି ଭବିଷ୍ୟତ ନ ଥିବା ଅତ୍ୟନ୍ତ ହାସ୍ୟାସ୍ପଦ, କିନ୍ତୁ ମୁଁ ଆଶା କରୁଛି ଯେ ଏସବୁ ପରେ, ମୋ ଦେଶର ଲୋକଙ୍କର ଭବିଷ୍ୟତ ସୁଧୁରି ଯିବ ।"

ସୂଚନା ଅନୁଯାୟୀ, ହାମିଦି ତାଙ୍କ ଜୀବନକୁ ଏକ ଅର୍ଥ ଦେବା ପାଇଁ ଭିଡିଓଟି ବନାଇଥିଲେ ଓ ସେ ଆଶା କରୁଥିଲେ ଯେ ଇରାନବାସୀମାନେ ପରସ୍ପରକୁ ସମର୍ଥନ କରନ୍ତୁ। ରେକର୍ଡିଂ ଶେଷ ହେବା ମାତ୍ରେ, ସେ ପାରସି ଭାଷାରେ କହିଥିଲେ, ଆମେ ଇରାନୀମାନେ ଏକାକୀ ଲୋକ ଏବଂ ଆମର କେହି ନାହାନ୍ତି, ତେଣୁ ଦୟାକରି ପରସ୍ପରକୁ ସମର୍ଥନ କରନ୍ତୁ। ଇରାନ ଦୀର୍ଘଜୀବି ହେଉ। ଭିଡିଓଟି ସେୟାର କରିବା ପରେ, ହାମିଦି ଆତ୍ମହତ୍ୟା କରିଥିବା ଜଣାପଡ଼ିଛି।