ସ୍ବର୍ଣ୍ଣ ମନ୍ଦିରରେ ଆକ୍ରମଣ ; ୫ ଆହତ

କନକ ବ୍ୟୁରୋ: ସ୍ବର୍ଣ୍ଣ ମନ୍ଦିରରେ ଯୁବକର ଉନ୍ମତ୍ତ କାଣ୍ଡ, ୫ ଆହତ । ଅମୃତସରର ସ୍ବର୍ଣ୍ଣ ମନ୍ଦିରରେ  ଜଣେ ଯୁବକ ହଠାତ୍ ଲୁହା ପାଇପରେ ଲୋକମାନଙ୍କୁ ଆକ୍ରମଣ କରିଥିଲା । ଏହି ଘଟଣାରେ ୫ ଜଣ ଆହତ ହୋଇଛନ୍ତି । ଉକ୍ତ ବ୍ୟକ୍ତିକୁ ଗିରଫ କରାଯାଇଛି ଏବଂ ପରିସ୍ଥିତି ନିୟନ୍ତ୍ରଣରେ ରହିଛି । ମନ୍ଦିରର କମ୍ୟୁନିଟି ରୋଷେଇ ଘର ନିକଟରେ ଏହି ଘଟଣା ଘଟିଥିବା ଜଣାପଡ଼ିଛି । ଗୁରୁ ରାମ ଦାସ ଲଙ୍ଗର ନିକଟରେ ହୋଇଥିବା ଆକ୍ରମଣକୁ ନେଇ ସେଠାରେ ଆତଙ୍କ ଖେଳିଯାଇଥିଲା। ଘଟଣାସ୍ଥଳରେ ବହୁ ଶ୍ରଦ୍ଧାଳୁ ଓ ସ୍ଥାନୀୟ ଲୋକେ ଉପସ୍ଥିତ ଥିଲେ। ଆହତଙ୍କ ମଧ୍ୟରେ ଶିରୋମଣି ଗୁରୁଦ୍ୱାର ପ୍ରବନ୍ଧକ କମିଟିର ଦୁଇ ଜଣ ସ୍ୱେଚ୍ଛାସେବୀ ଅଛନ୍ତି। 

ଆହତମାନଙ୍କ ମଧ୍ୟରୁ ଜଣେ ଅମୃତସରସ୍ଥିତ ଶ୍ରୀ ଗୁରୁ ରାମ ଦାସଙ୍କ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଆଣ୍ଡ ରିସର୍ଚ୍ଚରେ ଭର୍ତ୍ତି ହୋଇଛନ୍ତି । ମନ୍ଦିର ପରିସରରେ ଆକ୍ରମଣକାରୀ ଓ ତାଙ୍କ ସହଯୋଗୀଙ୍କୁ ଲୋକେ କାବୁ କରିବା ପରେ ସେମାନଙ୍କୁ ଗିରଫ କରାଯାଇଥିଲା । ଆକ୍ରମଣ ପୂର୍ବରୁ ଅଭିଯୁକ୍ତମାନେ ଉକ୍ତ ଅଞ୍ଚଳର ସର୍ଭେ ମଧ୍ୟ କରିଥିଲେ ବୋଲି ପୁଲିସ କହିଛି ।