ସ୍ୱାସ୍ଥ୍ୟ ସେବା ଛାଡି ଭୁବନେଶ୍ୱର ରାଜରାସ୍ତାରେ ଆଶାକର୍ମୀ; ମାସକୁ ୨୬ ହଜାର ଦରମା ଦାବିରେ ଲୋୟର ପିଏମଜିରେ ଗର୍ଜିଲେ ଦିଦି

କନକ ବ୍ୟୁରୋ : ତାତିଲେ ଆଶାକର୍ମୀ । ୧୮ ଦଫା ଦାବିରେ ଭୁବନେଶ୍ୱର ଲୋୟର ପିଏମଜିରେ କଲେ ବିକ୍ଷୋଭ ପ୍ରଦର୍ଶନ । ଡବଲ ଇଞ୍ଜିନ ସରକାରକୁ କରିଛନ୍ତି ଟାର୍ଗେଟ । ଦାବି ପୂରଣ ନହେବା ଯାଏ ଲୋୟର ପିଏମଜି ନଛାଡିବାକୁ ନିଷ୍ପତ୍ତି ନେଇଛି ସଂଘ ।

ଆଶାକର୍ମୀଙ୍କର ଏପରି ଗର୍ଜନରେ କମ୍ପିଉଠିଛି ରାଜଧାନୀ ଭୁବନେଶ୍ୱରର ମଧ୍ୟସ୍ଥଳ । ୧୮ ଦଫା ଦାବିରେ ସାରା ରାଜ୍ୟର ଆଶା କର୍ମୀ ଲୋୟର ପିଏମଜିରେ ଏକାଠି ହୋଇଛନ୍ତି । ସ୍ଥାୟୀ କର୍ମଚାରୀ ମାନ୍ୟତା, ପ୍ରୋତ୍ସାହନ ରାଶି ପରିବର୍ତ୍ତେ ମାସକୁ ୨୬ ହଜାର ଟଙ୍କା ଦେବାକୁ ଦାବି କରିଛନ୍ତି ଆଶା କର୍ମୀ । ଏହାସହ ମାସିକ ପେନସନ ୧୦ ହଜାର ଟଙ୍କା, ସ୍ମାର୍ଟଫୋନ ପାଇଁ ୧୦ ହଜାର ଟଙ୍କା, ଅବସର ଓ ମୃତ୍ୟୁକାଳୀନ ସହାୟତା ୧୦ ଲକ୍ଷ ଟଙ୍କା, ଇପିଏଫ୍, ଇଏସ୍‌ଆଇ ସହ ଗ୍ରାଚ୍ୟୁଇଟି ଲାଗୁ, ପ୍ରସବକାଳୀନ ସବୈତନିକ ଛୁଟି ଓ ସାମାଜିକ ସୁରକ୍ଷା ଯୋଗାଇବା ପାଇଁ ଓଡିଶା ଆଶାକର୍ମୀ ସଂଘ ଦାବି କରିଛି ।

ଗାଁ ହେଉ କି ସହର, ସ୍ୱାସ୍ଥ୍ୟ ସେବାରେ ନଜର ଆସନ୍ତି ଆଶା କର୍ମୀ । ସ୍ୱାସ୍ଥ୍ୟ ସେବା ସୁଧାରିବାରେ ଥାଏ ଆଶା କର୍ମୀଙ୍କର ବଡ଼ ଭୁମିକା । କିନ୍ତୁ ବିଡମ୍ବନାର କଥା ଏମାନଙ୍କୁ ମିଳେ ନାହିଁ ମାସିକ ଦରମା । କାମ ଅନୁଯାୟୀ ମିଳେ ପ୍ରୋତ୍ସାହନ ରାଶି । କିନ୍ତୁ ଏଥିରେ ସନ୍ତୁଷ୍ଟ ନୁହନ୍ତି ଆଶା କର୍ମୀ । ନୂଆ ସରକାରଠାରୁ ଅନେକ ଆଶା ଥିଲା, କିନ୍ତୁ ଏବେ ହତାଶ ହୋଇଥିବା କହିଛନ୍ତି ଆଶା କର୍ମୀ ।

ନିଜ ହକ ପାଇଁ ରାଜ୍ୟର କୋଣଅନୁକୋଣରୁ ରାଜଧାନୀକୁ ଆସିଛନ୍ତି ଆଶାକର୍ମୀ । ତେବେ ଦାବି ପୂରଣ ନହେବା ଯାଏ ଅହୋରାତ୍ର ଧାରଣା ଜାରି ରଖିବାକୁ ଚେତାବନୀ ଦେଇଛି ସଂଘ ।