ରାସ୍ତା ନଥିବାରୁ ଆସି ପାରିଲାନି ଆମ୍ବୁଲାନ୍ସ । ଚିକିତ୍ସାରେ ବିଳମ୍ବ ଯୋଗୁଁ ଆଖିବୁଝିଲେ ଗର୍ଭବତୀ

କନକ ବ୍ୟୁରୋ : ରାସ୍ତା ନଥିବାରୁ ଠିକ୍‌ ସମୟରେ ହୋଇ ପାରିଲାନି ଚିକିତ୍ସା । ଡାକ୍ତରଖାନାରେ ଆଖି ବୁଝିଲେ ଗର୍ଭବତୀ । ଗଜପତି ମୋହନା ବ୍ଲକ ନିର୍ଲଡିକିଆ ଗାଁରୁ ଆସିଛି ଏଭଳି ଅଭାବନୀୟ ସୂଚନା । ବଳାରାମ ମଲ୍ଲିକଙ୍କ ପତ୍ନୀ ମମତା ୬ ମାସର ଗର୍ଭବତୀ ଥିବା ବେଳେ ଅସୁସ୍ଥ ହୋଇପଡ଼ିଥିଲେ । ପରିବାର ପକ୍ଷରୁ ଆମ୍ବୁଲାନ୍ସ ପାଇଁ ଫୋନ କରାଯାଇଥିଲେ ମଧ୍ୟ ଗାଁକୁ ରାସ୍ତା ନଥିବାରୁ ଆସିପାରି ନଥିଲା ଆମ୍ବୁଲାନ୍ସ । ଫଳରେ ମହିଳାଙ୍କୁ ୨ କିମି ଭାରରେ ବୋହି ନେଇଥିଲେ ପରିବାର ଲୋକେ ।

ମୋହନ ଡାକ୍ତରଖାନାରେ ଚିକିତ୍ସା ପରେ ମହିଳା ଜଣକ ଗୁରୁତର ହୋଇପଡ଼ିବାରୁ ତାଙ୍କୁ ବ୍ରହ୍ମପୁରକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ଚିକିତ୍ସା ବେଳେ ତାଙ୍କର ମୃତ୍ୟୁ ହୋଇଛି । ଆଜି ମଧ୍ୟ ସମାନ ଢଙ୍ଗରେ ମହିଳାଙ୍କ ମୃତଦେହକୁ ଭାରରେ ୨ କିଲୋମିଟର ବୋହି ଗାଁକୁ ଆଣିଛନ୍ତି ପରିବାର ଲୋକେ । ଏ ଘଟଣା ରାଜ୍ୟରେ ହୋଇଥିବା ବିକାଶର ବାସ୍ତବ ଚିତ୍ରକୁ ସାମ୍ନାକୁ ଆଣିଛି । ଗ୍ରାମବାସୀ ବହୁବାର ପ୍ରଶାସନକୁ ଜଣାଇ ଥିଲେ ମଧ୍ୟ ଆଜି ଯାଏ ଗାଁକୁ ରାସ୍ତା ନିର୍ମାଣ ହୋଇପାରିନି । ଯେଉଁଥିପାଇଁ ମହିଳାଙ୍କ ସହ ଦୁନିଆ ଦେଖି ନଥିବା ଶିଶୁର ମଧ୍ୟ ମୃତ୍ୟୁ ଘଟିଛି ।