କ୍ଲାଉଡ୍ ସିଡିଙ୍ଗ୍ ଫେଲ୍ : ଦିଲ୍ଲୀ ସରକାରଙ୍କୁ କେଜ୍ରିୱାଲଙ୍କ କଟାକ୍ଷ ,କହିଲେ..ଏହି ସରକାରର ସମସ୍ତ ଇଞ୍ଜିନ୍ ଫେଲ୍

କନକ ବ୍ୟୁରୋ :  ଦିଲ୍ଲୀର ପ୍ରଦୂଷଣକୁ ମୁକାବିଲା କରିବା ପାଇଁ କୃତ୍ରିମ ବର୍ଷା କରାଇବା ନିମନ୍ତେ କ୍ଲାଉଡ୍ ସିଡିଙ୍ଗ୍ କରାଯାଇଥିଲା କିନ୍ତୁ ଏହା ବିଫଳ ହୋଇଛି । କୃତ୍ରିମ ବର୍ଷା କରାଇବାର ପ୍ରୟାସ ଫେଲ୍‌ ହେବା ପରେ ଆମ୍ ଆଦମୀ ପାର୍ଟିର ମୁଖ୍ୟ ଅରବିନ୍ଦ କେଜ୍ରିୱାଲ୍ ନିଜର ପ୍ରତିକ୍ରିୟା ପ୍ରକାଶ କରିଛନ୍ତି । ସେ ସିଧାସଳଖ ଦିଲ୍ଲୀ ସରକାରକୁ ଟାର୍ଗେଟ୍ କରିଛନ୍ତି । ଅରବିନ୍ଦ କେଜ୍ରିୱାଲ୍ ଦିଲ୍ଲୀରେ କ୍ଲାଉଡ୍ ସିଡିଙ୍ଗ୍ ପରେ କୃତ୍ରିମ ବର୍ଷା ନ ହେବା ଉପରେ କହିଛନ୍ତି, "ବାସ୍ତବରେ ଏହି ସରକାରର ସମସ୍ତ ଇଞ୍ଜିନ୍ ଫେଲ୍ ।" ସେ ତାଙ୍କ ପ୍ରତିକ୍ରିୟାରେ ଆହୁରି ମଧ୍ୟ କହିଛନ୍ତି, "ଏହି ସରକାର ସମ୍ପୂର୍ଣ୍ଣ ରୂପେ ବିଫଳ ହୋଇଛି ।" ସେ ସୋସିଆଲ୍ ମିଡିଆ ପୋଷ୍ଟ୍ ମାଧ୍ୟମରେ ଏହି ବୟାନ ଦେଇଛନ୍ତି । 

କ୍ଲାଉଡ୍ ସିଡିଙ୍ଗ୍ କାହିଁକି ବିଫଳ ହେଲା?

ରାଷ୍ଟ୍ରୀୟ ରାଜଧାନୀ ଦିଲ୍ଲୀକୁ ବର୍ତ୍ତମାନ ଘନ ପ୍ରଦୂଷଣର ଆସ୍ତରଣରେ ଘେରି ରହିଛି ଏବଂ ସରକାର କୃତ୍ରିମ ବର୍ଷା କରାଇବାକୁ ଚେଷ୍ଟା କରିଥିଲେ । ତେବେ, ପାଣିପାଗ ବିଜ୍ଞାନୀମାନେ କହିଛନ୍ତି ଯେ ବର୍ତ୍ତମାନ କ୍ଲାଉଡ୍ ସିଡିଙ୍ଗ୍ ପାଇଁ ଏହା ସଠିକ୍ ସମୟ ନୁହେଁ । ୟୁନିଭର୍ସିଟି ଅଫ୍ ରିଡିଙ୍ଗ୍ (ୟୁକେ) ର ନ୍ୟାସନାଲ୍ ସେଣ୍ଟର୍ ଫର୍ ଆଟମୋସଫେରିକ୍ ସାଇନ୍ସର ରିସର୍ଚ୍ଚ ସାଇଣ୍ଟିଷ୍ଟ ଡ. ଅକ୍ଷୟ ଦେଓରାସ୍ କୁହନ୍ତି ଯେ କ୍ଲାଉଡ୍ ସିଡିଙ୍ଗ୍ ଏକ ଏପରି କୌଶଳ ଯାହା ମାଧ୍ୟମରେ କେବଳ ସେହି ବାଦଲଗୁଡ଼ିକରୁ ବର୍ଷା କରାଯାଇପାରିବ ଯେଉଁଥିରେ ପୂର୍ବରୁ ପର୍ଯ୍ୟାପ୍ତ ଆର୍ଦ୍ରତା ରହିଛି । ତାଙ୍କ ଅନୁଯାୟୀ, ଏହି କୌଶଳ ସ୍ୱଚ୍ଛ ଆକାଶରୁ ବର୍ଷା କରାଇପାରିବ ନାହିଁ ।

ଏହି ପ୍ରକ୍ରିୟାରେ ପ୍ରଥମେ ସେହି ବାଦଲଗୁଡ଼ିକୁ ଚିହ୍ନଟ କରାଯାଏ ଯେଉଁଥିରୁ ବର୍ଷା ହେବାର ସମ୍ଭାବନା ଥାଏ । ଏହା ପରେ ବିମାନରୁ ସିଲଭର୍ ଆୟୋଡାଇଡ୍, ସୋଡିୟମ୍ କ୍ଲୋରାଇଡ୍ କିମ୍ବା କ୍ୟାଲସିୟମ୍ କ୍ଲୋରାଇଡ୍ ପରି ରାସାୟନିକ ପଦାର୍ଥ ବାଦଲ ଭିତରକୁ ଛଡାଯାଏ, ଯାହାଦ୍ୱାରା ଜଳବାଷ୍ପ ଛୋଟ ଛୋଟ ବୁନ୍ଦା ଆକାରରେ ଘନୀଭୂତ ହୋଇ ବର୍ଷା ରୂପ ନେଇଥାଏ ।