ଅଷ୍ଚମ ପାସ୍‌ କରିଥିଲେ ସେନାରେ ଚାକିରି, ଜାଣନ୍ତୁ ଆବେଦନ ପ୍ରକ୍ରିୟା

କନକ ବ୍ୟୁରୋ: ସରକାରୀ ଚାକିରି ଖଣ୍ଡିଏ ପାଇଁ ଦିନରାତି ଏକ କରି ପରିଶ୍ରମ କରୁଛନ୍ତି ଆଶାୟୀ । ଏହି କ୍ରମରେ ଯୁବପିଢ଼ି ଏବେ ଅଗ୍ନିବୀର ଯୋଜନାରେ ସେନାରେ ଭର୍ତ୍ତି ହେବାକୁ ଲକ୍ଷ୍ୟ ରଖିଛନ୍ତି । ଏଥିପାଇଁ ବିଶେଷ କୌଣସି ଡିଗ୍ରୀର ଆବଶ୍ୟକତା ନାହିଁ । ଯେଉଁମାନେ ଦଶମ କିମ୍ବା ଅଷ୍ଟମ ପାସ୍‌ କରିଥିବେ ସେମାନେ ବି ସେନାରେ ସାମିଲ ହେବାକୁ ଆବେଦନ କରି ପାରିବେ । ତେବେ କେଉଁ ପଦବୀ ପାଇଁ ଆଶାୟୀମାନେ ଆବେଦନ କରିବେ ତାହା ଜାଣିବା ଜରୁରି । 

ଏବେ ସେନାରେ ଟେକ୍ନିକାଲ୍‌ ପଦବୀ, କ୍ଲର୍କ, ଷ୍ଟୋର୍‌କିପର୍ ଓ ଅଗ୍ନିବୀର ଟ୍ରେଡ୍‌ସ୍‌ମ୍ୟାନ୍ ପଦବୀ ପାଇଁ ଦଶମ ପାସ୍‌ କରିଥିବା ଯୁବକଯୁବତୀ ମଧ୍ୟ ଆବେଦନ କରିପାରିବେ । କେବଳ ଅଗ୍ନିବୀର ଟ୍ରେଡ୍‌ସ୍‌ମ୍ୟାନ୍ ପଦବୀ ପାଇଁ ଅଷ୍ଟମ ପାସ୍‌ କରିଥିବା ଆଶାୟୀମାନେ ଆବେଦନ କରିବେ । ଏଣୁରେ ସେନାରେ ଭର୍ତ୍ତି ହେବାକୁ ଚାହୁଥିବା ଆଶାୟୀମାନଙ୍କୁ ଏପ୍ରିଲ ୨୫ ତାରିଖ ସୁଦ୍ଧା ଆର୍ମି ପୋର୍ଟାଲ୍‌ ଭିଜିଟ୍‌ କରିବାକୁ ହେବ । ଏହି ନିଯୁକ୍ତି ଆବେଦନ କରିବା ପାଇଁ ଆବେଦକଙ୍କ ବୟସ ୧୭ରୁ ୨୧ ବର୍ଷ ମଧ୍ୟରେ ହୋଇଥିବା ଆବଶ୍ୟକ । ଏଥିପାଇଁ ସମସ୍ତ ଆଶାୟୀ ନିଜ ମୋବାଇଲ ନମ୍ୱର ସହ ଆଧାର ଲିଙ୍କ୍‌ କରାଇବେ । 

ଟେକ୍ନିକାଲ ପଦବୀ ପାଇଁ ଆଶାୟୀ ଆଇଟିଆଇ କରିଥିବା ଆବଶ୍ୟକ । କେବଳ ଏହି ପଦବୀ ପାଇଁ ବୋନସ ମାର୍କ ଲାଗୁ ହେବ । ଅନ୍ୟ କୌଣସି ପଦବୀ ପାଇଁ ବୋନସ ମାର୍କ ଗଣା ଯିବନାହିଁ । ପ୍ରତ୍ୟେକ ଆଶାୟୀ ନିଜ ଯୋଗ୍ୟତା ଅନୁଯାୟୀ ଯେକୌଣସି ଦୁଇଟି ପଦବୀ ପାଇଁ ଆବେଦନ କରି ପାରିବେ । ତେବେ ଏଥିପାଇଁ ଅଲଗା ଅଲଗା ଫର୍ମ ଭରିବାକୁ ହେବ । ଅନୁରୂପ ଭାବରେ ଦୁଇଟି ପ୍ରବେଶିକା ପରୀକ୍ଷା ଦେବେ ଆଶାୟୀ । 

ଯେଉଁମାନେ ଭାରତୀୟ ସେନାରେ ସାମିଲ ହେବାକୁ ଚାହୁଛନ୍ତି, ସେମାନେ www.joinindianarmy.nic.in ଭିଜିଟ୍‌ କରିପାରିବେ । ଏଠାରେ ହିଁ ନିଯୁକ୍ତି ବାବଦରେ ଅଧିକ ସୂଚନା ପାଇ ପାରିବେ ।