କନକ ବ୍ୟୁରୋ: ସ୍ଲୋଗାନରେ ଅଟକିବନି ନିଶାମୁକ୍ତ ଓଡ଼ିଶା ଅଭିଯାନ। ନିଶାମୁକ୍ତ ଗାଁ ଗଠନ ପାଇଁ ବ୍ଲ୍ୟୁ-ପ୍ରିଣ୍ଟ ପ୍ରସ୍ତୁତ କରିଛନ୍ତି ସରକାର। ଗାନ୍ଧୀ ଜୟନ୍ତିରୁ ମାସେ ଧରି ନିଶାମୁକ୍ତ ଅଭିଯାନ ଆରମ୍ଭ କରିବେ ସରକାର। ଅଧିକାଂଶ ବିଭାଗ ଏଥିରେ ସାମିଲ ହୋଇଥିବା ବେଳେ ମଦମୁକ୍ତ ପଞ୍ଚାୟତକୁ ପୁରସ୍କାର ଦେବାକୁ ଘୋଷଣା କରିଛନ୍ତି ରାଜ୍ୟ ସରକାର। 

Advertisment

              ଗାଁ ହେବ ମଦମୁକ୍ତ
              ନିଶା ନ ଖାଇଲେ ପଞ୍ଚାୟତ ହେବ ପୁରସ୍କୃତ

ନିଶାମୁକ୍ତ ଗାଁ ଗଠନ ପାଇଁ ଅଣ୍ଟା ଭିଡ଼ିଛନ୍ତି ସରକାର । ନିଶାକୁ ନା, ଜୀବନକୁ ହଁ କିଛି ଏଭଳି ସଂକଳ୍ପ ନେଇ ଦ୍ବିତୀୟ ପର୍ଯ୍ୟାୟ ସଚେତନତା କାର୍ଯ୍ୟକ୍ରମ ଆରମ୍ଭ ହେବ । ଅକ୍ଟୋବର ୨ରୁ ମାସେ ଧରି ଭୁବନେଶ୍ବରରୁ ସଚେତନତା କାର୍ଯ୍ୟକ୍ରମ ଆରମ୍ଭ ହୋଇ ପଞ୍ଚାୟତସ୍ତରକୁ ଯିବ । ୨ ଅକ୍ଟୋବରରେ ଗ୍ରାମପଞ୍ଚାୟତରେ ଗ୍ରାମସଭା ଡକାଯାଇ ନିଶା ସମସ୍ୟା ଓ ନିବାରଣ ଦିଗରେ ହେବ ଆଲୋଚନା । ନିଶାମୁକ୍ତ ଗାଁ ଗଠନ ପାଇଁ ଗ୍ରାମପଞ୍ଚାୟତକୁ ଉତ୍ସାହିତ କରାଯିବ । ଶ୍ରେଷ୍ଠ ୩ ଗ୍ରାମପଞ୍ଚାୟତକୁ ପୁରସ୍କୃତ କରାଯିବ । ଏଥିପାଇଁ ବିଭିନ୍ନ ବିଭାଗକୁ ଚିଠି ଲେଖି ଦାୟିତ୍ବ ବାଣ୍ଟିଛି ଅବକାରୀ ବିଭାଗ । ମଦ୍ୟପାନ କରି ଗାଡ଼ି ଚାଳନା ରୋକିବାକୁ ପରିବହନ ବିଭାଗ ସଚେତନ କରିବ । ସ୍ୱାସ୍ଥ୍ୟ ଶିବିର, କର୍ମଶାଳା, ସମ୍ମିଳନୀ ଜରିଆରେ ସଚେତନ କରିବ ସ୍ବାସ୍ଥ୍ୟ ବିଭାଗ। ବେଆଇନ ଗଞ୍ଜେଇ ଗଛକୁ ନଷ୍ଟ କରିବ ଜଙ୍ଗଲ ବିଭାଗ । ଗଣଦୌଡ଼ ଜରିଆରେ ‘ତମାଖୁ, ମଦ୍ୟପାନ ଏବଂ ନିଶାମୁକ୍ତ ବିଶ୍ୱ’ ବାର୍ତ୍ତା ପହଞ୍ଚାଇବ କ୍ରୀଡ଼ା ଓ ଯୁବ ବ୍ୟାପାର ବିଭାଗ । ଏସ୍‌ଏଚ୍‌ଜି ମହିଳାଙ୍କୁ ମଧ୍ୟ ଏହି ଅଭିଯାନରେ ଯୋଡ଼ିବ ମିସନ ଶକ୍ତି ବିଭାଗ ।

ଧାର୍ମିକ ଭାବନାକୁ ଦୃଷ୍ଟିରେ ରଖି ଶ୍ରୀମନ୍ଦିରର ୧ କି.ମି ପରିଧି ଭିତରେ ମଦ ଦୋକାନକୁ ନା’ କରିଛନ୍ତି ସରକାର । ବଡ଼ଦାଣ୍ଡରେ କୌଣସି ମଦ ଦୋକାନ ରହିବନି । ବଡ଼ଦାଣ୍ଡକୁ ସଂଯୋଗ କରୁଥିବା ଛୋଟ ରାସ୍ତାରେ ବନ୍ଦ ହେବ ଆମିଷ ବିକ୍ରି। ମଦ ବିକ୍ରି ବନ୍ଦ ନେଇ ଗାଇଡଲାଇନ ଆସିବା ପରେ ଏହାକୁ କଡାକଡି କାର୍ଯ୍ୟକାରୀ କରାଯିବ । ସରକାରଙ୍କ ନିଷ୍ପତ୍ତି, ନିଶାମୁକ୍ତ ଓଡ଼ିଶା ଅଭିଯାନକୁ ଆଉ ପାଦେ ଆଗକୁ ନେଇଛି ।