ଆତ୍ମନିର୍ଭର ଭାରତ ଦିଗରେ ଆଉ ପାଦେ ବଢ଼ିଲା ଦେଶ : ଗୁଜରାଟରେ ବିଶାଲ ଇଭି-ପ୍ଲାଣ୍ଟକୁ ଉଦଘାଟନ କଲେ ପ୍ରଧାନମନ୍ତ୍ରୀ ମୋଦୀ

କନକ ବ୍ୟୁରୋ : ଆତ୍ମନିର୍ଭର ଭାରତରେ ଆଉ ପାଦେ ବଢ଼ିଲା ଦେଶ । ଗୁଜରାଟରେ ଉଦ୍‌ଘାଟିତ ହେଲା ବିଶାଳ ଇଭି ଯାନ ପ୍ଲାଣ୍ଟ ଇ-ଭିଟାରା । ସବୁଠୁ ବଡ଼ କଥା ହେଉଛି ଏଥରକ ଭାରତରେ ନିର୍ମିତ ବ୍ୟାଟେରି ଓ ଇଲେକଟ୍ରିକ କାର ବିଭିନ୍ନ ଦେଶକୁ ରପ୍ତାନି କରାଯିବ । ଏହା ଭାରତ ପାଇଁ ବଡ଼ ଉପଲବ୍ଧି ହେବାକୁ ଯାଉଛି । ଦେଶର ସର୍ବବୃହତ କାର ନିର୍ମାତା ମାରୁତି  ସୁଜୁକିର ନିଜ ପ୍ରଥମ ଇଲେକଟ୍ରିକ୍ ଏସୟୁଭି ମାରୁତି ଇ-ଭିଟାରାକୁ ସେପ୍ଟେମ୍ବର ୩ ତାରିଖରେ ଲଞ୍ଚ୍‌ କରିବାକୁ ଯାଉଛି  ।  

ଲଞ୍ଚ ପୂର୍ବରୁ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦି ଆଜି  ଗୁଜରାଟର ହଂସଲପୁରରେ ଥିବା ମାରୁତି ପ୍ଲାଣ୍ଟକୁ ଉଦ୍‌ଘାଟନ କରିଛନ୍ତି । ଭାରତରେ ନିର୍ମିତ ଏହି କାର କେବଳ ଘରୋଇ ବଜାରରେ ନୁହେଁ ବରଂ ଜାପାନ ଏବଂ ୟୁରୋପ ସମେତ ଶହେରୁ ଅଧିକ ଦେଶକୁ ରପ୍ତାନି କରାଯିବ । କମ୍ପାନି ନିଜର ଏହି ଇଲେକଟ୍ରିକ୍‌ କାରକୁ ଚଳିତ ବର୍ଷ ଜାନୁଆରିରେ ନୂଆଦିଲ୍ଲୀରେ ଆୟୋଜିତ ଭାରତ ମୋବିଲିଟି ଗ୍ଲୋବାଲ ଏକ୍ସପୋ-୨୦୨୫ରେ ପ୍ରଦର୍ଶିତ କରିଥିଲା । ଆଗକୁ ଦେଶରେ ଇଲେକଟ୍ରିକ୍ ଯାନବାହନ ଉତ୍ପାଦନର କ୍ଷେତ୍ରରେ ବଡ଼ ସଫଳତା ଆଣିବ ବୋଲି ଆଶା କରାଯାଉଛି  ।