ପୁଣି ଭୂମିକମ୍ପରେ ଥରିଲା ମିଆଁମାର , ଏଥର ୫.୧ ତୀବ୍ରତାରେ ଭୂମିକମ୍ପ

କନକ ବ୍ୟୁରୋ : ଧ୍ୱଂସର ସ୍ତୁପ ପାଲଟିଥିବା ମିଆଁମାରର ପିଛା ଛାଡୁନି ଭୂମିକମ୍ପ । ଗତକାଲି ଭୂମିକମ୍ପରେ ମିଆଁମାର ଧ୍ୱଂସ ହୋଇଯାଇଥିବା ବେଳେ ପୁଣି ଆଜି ବି ଭୂମିକମ୍ପ ହୋଇଛି । ରିକ୍ଟର ସ୍କେଲରେ ଏହାର ତୀବ୍ରତା ୫.୧ ବୋଲି କୁହାଯାଉଛି । ଏହି ଭୂମିକମ୍ପ ଉତ୍ପତି ସ୍ଥଳି ମିଆଁମାରର ରାଜଧାନୀ ନେପିଣ୍ଡା ନିକଟ ବୋଲି ସୂଚନା ମିଳିଛି । 

ଗତକାଲି ବି ମିଆଁମାରରେ ଦୁଇଥର ଭୂକମ୍ପ ଝଟକା ଦେଇଥିଲା । ଏଥିରେ ବଡ଼ବଡ଼ କୋଠା ସହ ରାସ୍ତାଘାଟ ଭୂଶୁଡି ପଡିଥିଲା । ଲଗାତର ଭୂକମ୍ପ ହେଉଥିବାରୁ ଲୋକମାନେ ଭୟଭୀତ ଅବସ୍ଥାରେ ରହିଛନ୍ତି । 

ଶୁକ୍ରବାର ଦିନ ମିଆଁମାରରେ ୭.୭ ତୀବ୍ରତା ଭୂକମ୍ପ ହୋଇଥିଲା । ରାଷ୍ଟ୍ରୀୟ ଭୂକମ୍ପ ବିଜ୍ଞାନ କେନ୍ଦ୍ର  ମୁତାବକ ଶୁକ୍ରବାର ରାତି ୧୧.୫୬ ମିନିଟ ସମୟରେ ପୁଣି ଏକ ଭୂକମ୍ପ ହୋଇଥିଲା, ଯାହାର ତୀବ୍ରତା ଥିଲା ୪.୨ ।

କେବଳ ମିଆଁମାର ନୁହେଁ ଶନିବାର ସକାଳ ୫.୧୬ ମିନିଟରେ ଆଫଗାନିସ୍ତାନରେ ବି ଭୂକମ୍ପର ପ୍ରଭାବ ଅନୁଭୂତ ହୋଇଛି । ହେଲେ କୌଣସି କ୍ଷୟକ୍ଷତିର ସୂଚନା ମିଳିନାହିଁ ।