ଅନୁଗୁଳ ପୁଲିସକୁ ବଡ଼ ସଫଳତା, ବଡ଼ ସାଇବର ଠକେଇର କଲା ପର୍ଦ୍ଦାଫାଶ, ବାଲେଶ୍ୱରରୁ ଜାଲ ବିଛାଇଥିଲେ ସାଇବର ଠକ

କନକ ବ୍ୟୁରୋ : କ୍ରାଇମ ସ୍ପଟ୍ ଅନୁଗୁଳ, ଅପରେଟ ହେଉଥିଲା ବାଲେଶ୍ଵରରୁ । ବାଲେଶ୍ଵର ସତେ ଯେମିତି ପାଲଟିଯାଇଛି ଓଡ଼ିଶାର ନୂଆ ଜମତାରା । ସୋରୋରୁ ଚାଲୁଥିଲା ଜମତରା ଷ୍ଟାଇଲ ସାଇବର ଅପରାଧର ନେଟୱର୍କ । ଏଭଳି ଏକ ସାଇବର ଅପରାଧ ନେଟୱର୍କର ପର୍ଦ୍ଦାଫାଶ କରିଛି ଅନୁଗୁଳ ସାଇବର ଥାନା। ଅନୁଗୁଳରୁ ଜଣେ ବ୍ୟବସାୟୀଙ୍କ ଠାରୁ ୫୨ ଲକ୍ଷ ଟଙ୍କା ସାଇବର ଲୁଟ ଘଟଣାର ତଦନ୍ତ କରୁ କରୁ ଅନୁଗୁଳ ପୁଲିସ ହାତରେ ଲାଗିଛି ପୂରା ନେଟୱର୍କର ଚେର । ସାଇବର ଠକମାନଙ୍କ ଟାର୍ଗେଟରେ ଥିଲେ ବ୍ୟବସାୟୀ, ଅବସରପ୍ରାପ୍ତ ଅଫିସର, ବ୍ୟାଙ୍କ କର୍ମଚାରୀ ଓ ବୟସ୍କ। ଟ୍ରେଡିଂ ଆପର ଜାଲ ବିଛାଇ ଆଖି ପିଛୁଳାକେ ଲୁଟି ନେଉଥିଲେ ଲକ୍ଷ ଲକ୍ଷ ଟଙ୍କା । ହେଲେ ପୁଲିସର ଛଞ୍ଚାଣ ଆଖିରୁ ବର୍ତ୍ତି ପାରିନାହାନ୍ତି ଏହି ଫ୍ରଡମାନେ। ଏହି ଘଟଣାରେ ପୋଲିସ ମୋଟ ୫ ଜଣଙ୍କୁ ଗିରଫ କରିଛି। ସେମାନଙ୍କ ମଧ୍ୟରୁ ସୋରରୁ ୩ ଜଣ, ଭଦ୍ରକରୁ ଜଣେ ଓ ଅନ୍ୟ ଜଣେ ପଶ୍ଚିମବଙ୍ଗ ଦାର୍ଜିଲିଂରୁ। ସେମାନଙ୍କ ନିକଟରୁ ନଗଦ ୨ ଲକ୍ଷ ୨୮ ହଜାର ଟଙ୍କା, ଏକ ଦାମୀ କାର, ଏକାଧିକ ବ୍ୟାଙ୍କର ପାସବୁକ, ଚେକ୍, ଗୋଟେ ରୋଲେକ୍ସ ଘଣ୍ଟା ଓ ସୁନା ଚେନ ଜବତ ହୋଇଛି। ତେବେ ଏହି ନେଟୱର୍କର ଚେର ଓଡ଼ିଶାରୁ ଆରମ୍ଭ କରି ମହାରାଷ୍ଟ୍ର, ମଧ୍ୟପ୍ରଦେଶ ଓ ଜମ୍ମୁ ପର୍ୟ୍ୟନ୍ତ ଲମ୍ବିଥିବା କହିଛନ୍ତି ଅନୁଗୁଳ ଏସପି । ଏ ଘଟଣାର ମାଷ୍ଟର ମାଇଣ୍ଡ ପାଖରେ ପହଞ୍ଚିବା ପାଇଁ ଜାଲ ବିଛାଇବା ଆରମ୍ଭ କରିଛି ଅନୁଗୁଳ ସାଇବର ଥାନା।