ଥାଇଲାଣ୍ଡ-କମ୍ବୋଡିଆର ସିଜ୍‌ଫାୟାର ଉଲ୍ଲଙ୍ଘନ, ବଡ଼ ଭାଇ ପଣିଆ ଦେଖାଇ ଅପଦସ୍ତ ହେଲେ ଟ୍ରମ୍ପ

କନକ ବ୍ୟୁରୋ: ସବୁଥିରେ ଡୋନାଲ୍ଡ ଟ୍ରମ୍ପ ଦେଖାଉଛନ୍ତି ମୁରବି ପଣିଆ ।  କେହି ନପଚାରିଲେ ବି ନିଜ ଆଡୁ ମଝିରେ ପଶନ୍ତି ଆଉ ଅଯଥାରେ ସୃଷ୍ଟି କରନ୍ତି ବିବାଦ । ଏପରି କହିବାର ଅର୍ଥ ଦୁଇ ଦେଶର ତିକ୍ତତା ମଧ୍ୟରେ ତୃତୀୟ ବ୍ୟକ୍ତି ହୋଇ  ସବୁବେଳେ ହସ୍ତକ୍ଷେପ କରିଥାନ୍ତି ଡୋନାଲ୍ଡ ଟ୍ରମ୍ପ । ଏଇ ଦେଖୁନାହାନ୍ତି ନିକଟରେ ଲାଗି ରହିଥିବା ଥାଇଲାଣ୍ଡ-କମ୍ବୋଡିଆ ବିବାଦ ମଝିରେ ପଶି  କେମିତି ଅସ୍ତ୍ରବିରତି ଘୋଷଣା କରିଦେଲେ । ଆଉ ସାଙ୍ଗେ ସାଙ୍ଗେ ଘୋଷଣା କରି କହିଲେ ଯେ ମୁଁ  ଦୁଇ ଦେଶ ସହ କଥା ହେଲି, ସେମାନେ ଅସ୍ତ୍ରବିରତି ପାଇଁ ରାଜି ହୋଇଯାଇଛନ୍ତି ।  କିନ୍ତୁ ଟ୍ରମ୍ପ ଘୋଷଣା କରିଥିବା ଅସ୍ତ୍ରବିରତିକୁ ୬ ଘଣ୍ଟା ନପୂରୁଣୁ ପୁଣି  ଦୁଇ ଦେଶ ମଧ୍ୟରେ ଆରମ୍ଭ ହୋଇଗଲା ଯୁଦ୍ଧ ।  ଏବେ ସୀମାରେ ଖାଲି ତୋପ ମାଡ, ବିସ୍ଫୋରଣର ଶଦ୍ଦ ।  କିନ୍ତୁ ଏପଟେ ବିଶ୍ବ ଗୁରୁର ଶ୍ରେୟ  ନେବା ପାଇଁ ବଡ଼ ଭାଇପଣିଆ  ହରକତ୍‌ରୁ ବାଦ୍‌ ପଡୁନାହାନ୍ତି ଟ୍ରମ୍ପ ।

ହେଲେ ସବୁଠୁ ଆଶ୍ଚର୍ଯ୍ୟକର  ଏବଂ ହାସ୍ୟାସ୍ପଦ  କଥା ଏହା ଯେ  ଟ୍ରମ୍ପଙ୍କ କଥାକୁ  ଯୁଦ୍ଧରତ ଦେଶ ଖାତିର କରୁନାହାନ୍ତି । ସିଜ୍‌ଫାୟାର ଘୋଷଣା ପରେ ମଧ୍ୟ ଯୁଦ୍ଧ କ୍ଷେତ୍ରକୁ ଓହ୍ଲାଇଛନ୍ତି  ଥାଇଲାଣ୍ଡ-କମ୍ବୋଡିଆ  । ଏଥିରେ କ୍ଷୁବ୍ଧ ହୋଇ ଟ୍ରମ୍ପ ଚେତାବନୀ ଦେଇଛନ୍ତି  ଯଦି ଉଭୟ ଦେଶ ଶାନ୍ତି ପ୍ରତିଷ୍ଠା ନ କରନ୍ତି, ତେବେ ଆମେରିକା ସେମାନଙ୍କ ସହ କୌଣସି ବ୍ୟବସାୟିକ ଚୁକ୍ତି କରିବ ନାହିଁ ।   ଟ୍ରମ୍ପ ସବୁବେଳେ ଚାହାନ୍ତି ମୋ କଥାରେ ଅନ୍ୟ ଦେଶମାନେ ଉଠ୍‌ବସ୍‌ ହୁଅନ୍ତୁ ଆଉ ଯଦି ଏହା ନ ହୁଏ ତାଙ୍କ ଉପରେ ଟାରିଫ୍ ମାଡ କରନ୍ତି ନଚେତ୍‌  ବ୍ୟବସାୟିକ ଚୁକ୍ତିକୁ ନେଇ ଧମକ ଦିଅନ୍ତି ।

ଟ୍ରମ୍ପଙ୍କ ମଧ୍ୟସ୍ଥତା ଖାଲି  ଥାଇଲାଣ୍ଡ- କମ୍ବୋଡିଆ କ୍ଷେତ୍ରରେ ସୀମିତ ନୁହେଁ ଏହା ପୂର୍ବରୁ ଇରାନ୍‌ ଇସ୍ରାଏଲ ସଙ୍ଘର୍ଷରେ ମଧ୍ୟ ଏପରି ବଡ଼ ଭାଇପଣିଆ ଦେଖାଇ ଅପଦସ୍ତ ହୋଇଥିଲେ ।  ତେବେ ସବୁଠାରୁ ଆଶ୍ଚର୍ଯ୍ୟକର କମ୍ବୋଡିଆ ସିଧା ସିଧା କହିଥିଲା ଏହା ଆମର ଦ୍ବିପାକ୍ଷିକ ବିବାଦ ଏଥିରେ ତୃତୀୟ ବ୍ୟକ୍ତି ହସ୍ତକ୍ଷେପ ଲୋଡା ନାହିଁ । ଆଉ ଏମିତିକି କମ୍ବୋଡିଆ  ଟ୍ରମ୍ପଙ୍କ ମଧ୍ୟସ୍ଥତା ପ୍ରସ୍ତାବକୁ  ମନା କରି ଦେଇଥିଲା । ଏହା ପରେ ମଧ୍ୟ ଡୋନାଲ୍ଡ   ଟ୍ରମ୍ପ ଦୁଇ ଦେଶ ମଧ୍ୟରେ ଅସ୍ତ୍ରବିରତି ଘୋଷଣା କରିଥିଲେ କିନ୍ତୁ ଏହା ଫୁ କରିଥିଲେ ଏହି ଦୁଇ ଦେଶ ।  ତେବେ ଏହା ଟ୍ରମ୍ପଙ୍କ ବଡ଼ ଭାଇପଣିଆ ନୁହେଁ ତ ଆଉ କଣ ।    

ଏପଟେ ଦୁଃଖର ବିଷୟ ଯେ କୂଟନୈତିକ ସ୍ତରରେ ଆଲୋଚନା ସତ୍ତ୍ୱେ ସୀମାରେ ସଂଘର୍ଷ ଥମୁ ନାହିଁ ।  ଉଭୟ ପକ୍ଷ ପରସ୍ପର ଉପରେ ଗୁଳିଗୋଳା ଓ ରକେଟ୍ ମାଡ଼ କରିବାର ଅଭିଯୋଗ ଆଣିଛନ୍ତି । ଏହି ସଂଘର୍ଷରେ ୩୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିବା ବେଳେ ୨ ଲକ୍ଷରୁ ଅଧିକ ଲୋକ ବିସ୍ଥାପିତ ହୋଇଛନ୍ତି । ସୀମାନ୍ତ ଅଞ୍ଚଳରେ ଥିବା ପ୍ରାୟ ୫୦୦ଟି ସ୍କୁଲକୁ ମଧ୍ୟ ବନ୍ଦ କରିଦିଆଯାଇଛି । ଏହି ଘଟଣା ଦର୍ଶାଉଛି ଯେ ଦୁଇ ଦେଶ ମଧ୍ୟରେ ଥିବା ଅବିଶ୍ୱାସ ଓ ଐତିହାସିକ ବିବାଦର ସମାଧାନ କେତେ ଜଟିଳ ।