ପ୍ରେମରେ ପଡ଼ିଥିଲେ ପାୱାର୍ : ମନ୍ତ୍ରୀଙ୍କ ଝିଅ ସହ ମିଶିଥିଲା ମନ,ଏମିତି ଥିଲା ଅଜିତଙ୍କ ଲଭ୍ ଷ୍ଟୋରି

କନକ ବ୍ୟୁରୋ : ମହାରାଷ୍ଟ୍ରର ବାରାମତିରେ ସକାଳୁ ସକାଳୁ ଏକ ବଡ଼ ବିମାନ ଦୁର୍ଘଟଣା ଘଟିଗଲା । ସକାଳ ୮.୪୫ ରେ ବିମାନର ଭଗ୍ନାଂଶ ଏଣେତେଣେ ପଡ଼ିଥିବା ବେଳେ ସାଙ୍ଗେ ସାଙ୍ଗେ ଲୋକଙ୍କ ଭିଡ଼ ଜମିଗଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ପ୍ରଥମେ ଧୂଆଁ ଆଉ ତା’ପରେ ହୁତୁହୁତୁ ହୋଇ ସମ୍ପୁର୍ଣ୍ଣ ବିମାନ ଜଳିଗଲା । ଘଟଣା କ’ଣ ଜାଣିଲାବେଳକୁ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ୫ ଜଣ ଲୋକ ସେହି ବିମାନରେ ବସିଥିଲେ ବୋଲି ସୂଚନା ମିଳିଲା । ଆଉ ଏହାର କିଛି ସମୟ ପରେ ଜଣାପଡ଼ିଲା ଯେ ଅଜିତ ପାୱାରଙ୍କ ସମେତ ବିମାନରେ ବସିଥିବା ବାକି ସଦସ୍ୟଙ୍କ ମୃତ୍ୟୁ ହୋଇଯାଇଛି । 

ଆଗକୁ ପଢ଼ନ୍ତୁ : ଆକାଶରୁ ଖସି ଜଳିଗଲା ଚାର୍ଟର ଫ୍ଲାଇଟ୍ : ସ୍ତବ୍ଧ ହୋଇଗଲା ସାରାଦେଶ

୨୦୨୪ ରେ ଷଷ୍ଠଥର ପାଇଁ ମହାରାଷ୍ଟ୍ରର ଡେପୁଟି ସିଏମ୍ ହୋଇଥିବା ଅଜିତ ପାୱାର ମହାରାଷ୍ଟ୍ର ରାଜନୀତିରେ ‘ଦାଦା’ ର ପରିଚୟ ସୃଷ୍ଟି କରିଥିଲେ । ମରାଠୀ ଭାଷାରେ ଦାଦା ଅର୍ଥ ଭାଇ , ପୂରା ମହାରାଷ୍ଟ୍ର ଯେମିତି ତାଙ୍କୁ ବଡ଼ଭାଇର ମର୍ଯ୍ୟାଦା ଦେଉଥିଲା । ନାମୀ ରାଜନୈତିକ ପରିବାରରୁ ଆସିଥିବାରୁ ମରାଠା ମାନୁଷଙ୍କ ମଝିରେ ଅଜିତଙ୍କ ଦବଦବା ଥିଲା । ଏନସିପି ଅଧ୍ୟକ୍ଷ ଶରଦ ପାୱାରଙ୍କ ପୁତୁରା ହୋଇଥିଲେ ମଧ୍ୟ ୨୦୨୪ ରେ ସେ ଦାଦାଙ୍କ ଠାରୁ ଅଲଗା ହୋଇ ବିଜେପି-ଶିବସେନା ଗଠବନ୍ଧନ ସରକାରରେ ସାମିଲ ହୋଇ ଉପମୁଖ୍ୟମନ୍ତ୍ରୀ ହୋଇଥିଲେ । ଅଜିତ ପାୱାରଙ୍କ ପ୍ରୋଫାଇଲ୍ ବିଷୟରେ ଯଦି କଥା ହେବା ତାହେଲେ ସେ କଲେଜ ଡ୍ରପଆଉଟ୍ ଏବଂ ମହାରାଷ୍ଟ୍ର ରାଜନୀତିରେ ଜଣେ ସକ୍ରିୟ ନେତା ଥିଲେ । ୧୯୮୨ ରେ ତାଙ୍କ ପାଦ ରାଜନୀତିର ମାଟିକୁ ପ୍ରଥମଥର ପାଇଁ ଛୁଇଁଥିଲା । ଯେତେବେଳେ ପୁଣେର ଏକ ସହକାରୀ ଚିନି କାରଖାନାର ବୋର୍ଡରେ ତାଙ୍କୁ ମୁଖ୍ୟ ଭାବେ ଚୟନ କରାଯାଇଥିଲା । ଏହା ପରେ ୧୯୯୧ ରେ ପ୍ରଥମ ଥର ବାରାମତି ନିର୍ବାଚନ କ୍ଷେତ୍ରରେ ଲୋକସଭା ପାଇଁ ତାଙ୍କୁ ଚୟନ କରାଗଲା । ତଥାପି ଅଜିତଙ୍କୁ ଏହି ସିଟ୍ ଦାଦା ଶରଦ ପାୱାରଙ୍କ ପାଇଁ ଜଲଦି ଛାଡ଼ିବାକୁ ପଡ଼ିଥିଲା । କାରଣ ଶରଦଙ୍କୁ ପି.ଭି. ନରସିହ୍ମା ରାଓଙ୍କ ସରକାରରେ ପ୍ରତିରକ୍ଷା ମନ୍ତ୍ରୀ ଭାବରେ ନିଯୁକ୍ତ କରାଯାଇଥିଲା । ସେତେବେଳେ ପାୱାର ସାଂସଦ ନଥିଲେ ଏବଂ ୬ ମାସ ଭିତରେ ତାଙ୍କୁ ସାଂସଦ ହେବାକୁ ପଡ଼ିଥିଲା । ତା’ପରେ ଅଜିତ ଦାଦାଙ୍କ ପାଇଁ ଆସନ ଖାଲି କରିଦେଲେ । ସେହି ବର୍ଷ ସେ ବାରାମତୀ ଆସନରୁ ବିଧାନସଭା ନିର୍ବାଚନ ଲଢ଼ି ବିଜୟୀ ମଧ୍ୟ ହେଲେ । ୧୯୯୫, ୧୯୯୯, ୨୦୦୪, ୨୦୦୯, ୨୦୧୪ ଏବଂ ୨୦୧୯ରେ ଏହି ନିର୍ବାଚନମଣ୍ଡଳୀରୁ ନିର୍ବାଚନ ଲଢ଼ି ସେ ବିଜୟୀ ମଧ୍ୟ ହୋଇଥିଲେ ।  

୨୨ ଜୁଲାଇ ୧୯୫୯ ରେ ଜନ୍ମଗ୍ରହଣ କରିଥିବା ଅଜିତ ଅଧିକ ପାଠ ପଢ଼ିନଥିଲେ କାରଣ ଦ୍ୱାଦଶ ଶ୍ରେଣୀ ଶେଷ ହେବା ପରେ କଲେଜରେ ନାମ ଲେଖାଇବାର ମାତ୍ର କିଛି ସମୟ ପରେ ହିଁ ତାଙ୍କ ବାପାଙ୍କ ଦେହାନ୍ତ ହୋଇଥିଲା । ଆଉ ପରିବାରର ଦାୟିତ୍ବ ଅଜିତଙ୍କ କାନ୍ଧ ଉପରକୁ ଚାଲି ଆସିଥିଲା । ତା’ପରେ ଶିକ୍ଷାରୁ ଦୂରେଇ ରାଜନୀତି ଆଡ଼କୁ ଢଳିଥିଲେ ଅଜିତ । ଆଉ ରାଜନୀତିର ଗଳି ଭିତରେ ବୁଲୁ ବୁଲୁ ବାଟବଣା ହୋଇ ପ୍ରେମ ଗଳିରେ ପଡ଼ିଥିଲା ଅଜିତଙ୍କ ପାଦ । ମନ୍ତ୍ରୀଙ୍କ ଝିଅ ସହ ମିଶିଥିଲା ଅଜିତଙ୍କ ମନ । ୧୯୮୫ ରେ ମହାରାଷ୍ଟ୍ରର ପୂର୍ବତନ ମନ୍ତ୍ରୀ ପଦ୍ମସିଂହ ବାଜିରାଓ ପାଟିଲଙ୍କ ଝିଅ ସୁନେତ୍ରାଙ୍କୁ ବିବାହ କରିଥିଲେ ଦାଦା । ଦୁହିଁଙ୍କ ଦୁଇ ପୁଅ ଜୟ ପାୱାର ଏବଂ ପାର୍ଥ ପାୱାର ଅଛନ୍ତି । ପାର୍ଥ ପିତାଙ୍କ ଭଳି ରାଜନୀତିରେ ସକ୍ରିୟ ରହିବା ସହ ୨୦୧୯ ଲୋକସଭା ନିର୍ବାଚନ ଲଢ଼ିଥିଲେ ମଧ୍ୟ ଜିତିପାରିନଥିଲେ । କିନ୍ତୁ ସାନପୁଅ ଜୟ ରାଜନୀତିକୁ ଆଦୌ ପସନ୍ଦ କରନ୍ତି ନାହିଁ ତେଣୁ ଏହି ସାପସିଢ଼ିର ଗଳି ଦେଇ ସେ କେବେ ଅତିକ୍ରମ କରିନାହାନ୍ତି ।