ବାବୁ ବଦଳିବା ପରେ ରାଜଧାନୀରେ ବାଟବଣା ମହିଳା ସୁରକ୍ଷା ଯୋଜନା; ହାଇସିକ୍ୟୁରିଟି ଜୋନ୍‌ରେ ବି ମହିଳା ଅସୁରକ୍ଷିତ

କନକ ବ୍ୟୁରୋ: ବାବୁଙ୍କ ବଦଳି ପରେ ବାଟବଣା ହୋଇଯାଇଛି ଯୋଜନା, କାର୍ଯ୍ୟକାରୀ ହେଉନି ସରକାରୀ ନିଷ୍ପତ୍ତି । ନିକଟରେ ରାଜ୍ୟ ସରକାରଙ୍କ ୪୯ ଅଧିକାରୀଙ୍କ ବଦଳି ନିର୍ଦ୍ଦେଶନାମା ପରେ ଯୋଜନାର କାର୍ଯ୍ୟକାରିତା ଉପରେ ପ୍ରଶ୍ନବାଚୀ ଉଠିଛି । ଏପରିକି ସାଧାରଣ ମହଲରେ ଚର୍ଚ୍ଚା ମଧ୍ୟ ହେଉଛି । ଯେମିତିକି ମହିଳା ସୁରକ୍ଷା ପାଇଁ ୨୦୨୪ ଏପ୍ରିଲ୍‌ରେ ହାଇ ଏଫିସିଏନ୍‌ସି ରେସପନ୍ସ ବା ‘ହର୍’ ଟିମ୍ ଗଠନ କରାଯାଇଥିଲା । ମାତ୍ର ଉଦ୍‌ବେଗର ବିଷୟ ଏବେ ସେହି ଟିମ୍ କୋମାରେ ଥିବା ବାରି ହୋଇପଡୁଛି ।

ରାଜଧାନୀରେ କୌଣସି ସ୍ଥାନରେ କେହି ମହିଳାଙ୍କୁ କମେଣ୍ଟ ବା ଅଶ୍ଳୀଳ ଇଂଗିତ କଲେ କି ଗାଳି କଲେ, ଦୃଢ଼ କାର୍ଯ୍ୟାନୁଷ୍ଠାନ ନିଆଯିବା କୌଣସି ପରିସ୍ଥିତିରେ ବି ମହିଳାଙ୍କ ପ୍ରତି ହେଉଥିବା ଦୁବ୍ୟବହାର ବରଦାସ୍ତ କରାଯିବ ନାହିଁ । ଏଥିପାଇଁ ଗଠନ ହୋଇଥିଲା ‘ହର୍ ଟିମ୍’ । ହେଲେ ଏବେ ରାଜଧାନୀର ରାସ୍ତାଘାଟରେ ମହିଳାଙ୍କ ସୁରକ୍ଷା ବିପଜ୍ଜନକ ସ୍ଥିତିରେ ପହଞ୍ଚିଥିଲେ ହେଁ ହର୍ ଟିମକୁ ଦେଖିବାକୁ ମିଳୁନାହିଁ । ବର୍ତ୍ତମାନ ଏହି ଟିମ୍ ଏକପ୍ରକାର ନିଷ୍କ୍ରିୟ ହୋଇଯାଇଛି । ଆଗ ଭଳି ଆଉ ହର୍ ଟିମରେ ଧରପଗଡ଼ ନାହିଁ । ଆରମ୍ଭରୁ ରାଜଧାନୀରେ ରୋଡ୍ ରୋମିଓଙ୍କୁ ସାବାଡ଼ କରି ହଇଚଇ ସୃଷ୍ଟି କରିଥିବା ‘ହର୍ ଟିମ୍’ ଏବେ ଯେମିତି ଗାୟବ୍ ହୋଇଯାଇଛି ।

ମଙ୍ଗଳବାର ସନ୍ଧ୍ୟାରେ ଜଣେ ଲୁଟେରା ଏଜି ଛକ ନିକଟରେ ଜଣେ ଯୁବତୀଙ୍କୁ ଟଣାଓଟରା କରି ମୋବାଇଲ୍ ଛଡ଼ାଉଥିଲେ । ରାଜଧାନୀର ଏଜି ଛକ, ଯାହାକି ହାଇସିକ୍ୟୁରିଟି ଜୋନ୍ ଭାବେ ଜଣାଶୁଣା । କୌଣସି ଉପାନ୍ତ କି ଅପହଞ୍ଚ ଅଞ୍ଚଳ ନ ଥିଲା । ରାଜଧାନୀର ଏହି ହାଇସିକ୍ୟୁରିଟି ଜୋନ୍, ଯେଉଁଠି ଲୋକସେବାଭବନକୁ ପାହୁଣ୍ଡେ ବାଟ, ପୁଣି ଯେଉଁଠି ମୁଖ୍ୟମନ୍ତ୍ରୀଙ୍କ ଆବାସଠାରୁ ଆରମ୍ଭ କରି ଅନେକ ମନ୍ତ୍ରୀଙ୍କ ଘର ରହିଛି, ସେଇଠି ଘଟିଥିଲା ଅଘଟଣ । କଡ଼ା ସୁରକ୍ଷା କଥା କୁହାଯାଉଥିବା ଭିଭିଆଇପି ଅଞ୍ଚଳରେ ଜଣେ ଯୁବତୀଙ୍କୁ ଲୁଟେରା ଟଣାଓଟରା କଲା ଏବଂ ମୋବାଇଲ୍ ଛଡ଼ାଇ ଫେରାର ହୋଇଯାଉଥିଲା । ସୌଭାଗ୍ୟକୁ ଲୋକେ ଲୁଟେରାକୁ କାବୁ କଲେ । ହେଲେ ଏଠି କୌଣସି ମହିଳା ପୁଲିସ କି ହର୍ ଟିମ୍ ସଦସ୍ୟଙ୍କୁ ଦେଖିବାକୁ ମିଳିନଥିଲା । ଯଦି ଏଭଳି ସମ୍ବେଦନଶୀଳ ଜାଗାରେ ହର୍ ଟିମ୍ ନିଷ୍କ୍ରିୟ, ତେବେ ଟିମ୍ କରୁଛି କଣ, କେଉଁ କାମରେ ଲାଗୁଛି, ଟିମ୍ ଅଛି କି ଭାଙ୍ଗିଯାଇଛି, ଏମିତି ମାଳମାଳ ପ୍ରଶ୍ନବାଚୀ ସୃଷ୍ଟି ହୋଇଛି ।

ମହିଳା ଓ ଯୁବତୀମାନେ କର୍ମକ୍ଷେତ୍ରରୁ ବା ଶିକ୍ଷାନୁଷ୍ଠାନରୁ ଫେରିବା ସମୟରେ ଅସାମାଜିକ ବ୍ୟକ୍ତି ମାନେ ରାସ୍ତାରେ ସେମାନଙ୍କୁ କମେଣ୍ଟ କରିବା, ଅଶ୍ଳୀଳ ଇଂଗିତ କରିବା ଭଳି ଘଟଣା ରାଜଧାନୀରେ ଏକ ସାଧାରଣ ଘଟଣା ଥିଲା । ସେମିତି ମନ୍ଦିର ବା ପୂଜାପର୍ବ ସମୟରେ ଗହଳିର ସୁଯୋଗ ନେଇ ଦୁର୍ବୃତ୍ତମାନେ ମହିଳାଙ୍କୁ ଦୁର୍ବ୍ୟବହାର କରିବା ମଧ୍ୟ ସାଧାରଣ ଘଟଣା ଥିଲା । ତେଣୁ ମହିଳାଙ୍କ ସୁରକ୍ଷା ନେଇ ବାରମ୍ବାର ଏଭଳି ଅଭିଯୋଗ ଆସିବା ପରେ ତତ୍କାଳୀନ କମିସନର ସଂଜୀବ ପଣ୍ଡା ଏହି ଯୋଜନା ଆରମ୍ଭ କରିଥିଲେ । ଟିମରେ ରେ ଜଣେ ଏସିପି ବ୍ୟାଙ୍କର ଅଧିକାରୀ ଥିବା ବେଳେ ଜଣେ ଆଇଆଇସି, ୨ଜଣ ଏସ୍‌ଆଇଙ୍କୁ ମିଶାଇ ମୋଟ୍ ୧୪ଜଣିଆ ମହିଳା ପୁଲିସ ଟିମ୍ ଗଠନ କରାଯାଇଥିଲା । ବିଶେଷକରି ବଜାର, ଗହଳି ଅଞ୍ଚଳ, ଶିକ୍ଷାନୁଷ୍ଠାନ, ବ୍ୟବସାୟିକ ପ୍ରତିଷ୍ଠାନ, ଧର୍ମାନୁଷ୍ଠାନ ଆଦି ଅଞ୍ଚଳ ଉପରେ ନଜର ରଖିବାକୁ ଏହି ଟିମକୁ ନିର୍ଦ୍ଦେଶ ଦିଆଯାଇଥିଲା । କିନ୍ତୁ ଏବେ ଲାଗୁଛି, ଯେମିତି କମିସନର ବଦଳିବା ପରେ ଯୋଜନା ବଦଳିଯାଇଛି । ଅପରାଧ ବଢ଼ି ଚାଲିଛି କିନ୍ତୁ ଅପରାଧିଙ୍କ ମନରୁ ଯେମିତି ଭୟ କମି କମି ଯାଉଛି ।