ସଂସଦରେ ୱାକଫ୍‌ ସଂଶୋଧନ ବିଲ୍‌ ପାରିତ: ମାନୁ ନାହାଁନ୍ତି ବିରୋଧୀ, ଯିବେ ସୁପ୍ରିମ୍‌କୋର୍ଟ

କନକ ବ୍ୟୁରୋ: ସଂସଦର ଉଭୟ ଗୃହରେ ୱାକଫ ସଂଶୋଧନ ବିଲ ପାରିତ ହେବା ପରେ ରାଷ୍ଟ୍ରପତିଙ୍କ ମୋହର ବାଜିବା ପରେ ଆଇନରେ ପରିଣତ ହେବ । ଏହାପୂର୍ବରୁ ସୁପ୍ରିମକୋର୍ଟ ଯିବା ପାଇଁ ପ୍ରସ୍ତୁତ ହେଲେଣି ବିରୋଧୀ । ଦୀର୍ଘଘଣ୍ଟାର ଚର୍ଚ୍ଚା, ଆଲୋଚନା ଓ ଦୁଇଦିନର ଘମାସାନ ବିତର୍କ ପରେ ଶେଷରେ ସଂସଦର ଉଭୟ ଗୃହରେ ପାରିତ ହୋଇଛି ୱାକଫ ସଂଶୋଧନ ବିଲ । ଯଦିଓ ବିଲକୁ ପାରିତ କରିବାରେ ସଫଳ ହୋଇଛନ୍ତି ସରକାର ତଥାପି ସରୁନି ବିରୋଧୀଙ୍କ ବିରୋଧ । ବିଲ୍‌କୁ ସମ୍ବିଧାନ ବିରୋଧୀ କହି ସୁପ୍ରିମକୋର୍ଟ ଯିବାକୁ ବିରୋଧୀ ନିଷ୍ପତ୍ତି ନେଇଛନ୍ତି । ବିଲ୍‌ ବିରୋଧରେ କୋର୍ଟରେ ଆବେଦନ ଦାୟର କରିବ କଂଗ୍ରେସ । ଏହା ପୂର୍ବରୁ ସମାନ ଘୋଷଣା କରିସାରିଛନ୍ତି ତାମିଲନାଡୁର ଡିଏମକେ ସରକାର ।

ବିଲ୍‌କୁ ନେଇ ସରକାର ବିରୋଧୀ ନିଜ ନିଜର ଯୁକ୍ତି ରଖୁଛନ୍ତି । ସରକାରଙ୍କ ଯୁକ୍ତି ହେଉଛି,  ମୁସଲିମ୍‌ ଭାଇ,ଭଉଣୀଙ୍କୁ ହିତରେ ଏହି  ବିଲ୍‌ । ଏହା ଗରିବ ଓ ମହିଳାଙ୍କ ଅଧିକ ସୁରକ୍ଷା ଦେବ । ୱାକଫ୍ ସମ୍ପତ୍ତିରେ ପରିଚାଳନାରେ ସଂସ୍କାର ଆସିବ। ସେପଟେ ବିରୋଧୀଙ୍କ ଯୁକ୍ତି ହେଉଛି, ମୁସଲମାନ୍‌ଙ୍କ ମଧ୍ୟରେ ଏହା ଭୟ ସୃଷ୍ଟି କରିବ । ସଂଶୋଧିତ ବିଲ୍‌ ଦ୍ୱାରା ସେମାନେ ମୁଖ୍ୟ ସ୍ରୋତରୁ ଦୂରେଇ ଯିବେ । ଏହା ଏକ ମୁସଲିମ୍‌ ବିରୋଧୀ ବିଲ୍‌ । 

ସେପଟେ ୱାକଫ ବିଲକୁ ନେଇ ଜେଡିୟୁ ମଧ୍ୟରେ କଳହ ଦେଖାଯାଇଛି । ସଂଶୋଧନ ବିଧେୟକ ଉପରେ ଆପତ୍ତି ପ୍ରକାଶ କରି ୪ଜଣ ନେତା ଇସ୍ତଫା ଦେବା ଦଳର ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛି ।ଆଗକୁ ତାଲିକା ବଢ଼ିବା ସମ୍ଭାବନା ରହିଛି ।