କନକ ବ୍ୟୁରୋ: ୨ ବର୍ଷ ପରେ ପୁଣିଥରେ ବହୁଚର୍ଚ୍ଚିତ ନବ ଦାସ ହତ୍ୟାର ଫାଇଲ ଖୋଲିଛି । ଆଜିଠାରୁ ପୁଣିଥରେ ହତ୍ୟାର ସାନି ତଦନ୍ତ ଆରମ୍ଭ କରିଛି କ୍ରାଇମବ୍ରାଞ୍ଚ। କ୍ରାଇମବ୍ରାଞ୍ଚର ଦୁଇ ଜଣିଆ ଟିମ୍ ନବ ଦାସଙ୍କ ଝାରସୁଗୁଡା ସ୍ଥିତ ବାସଭବନରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ନବ ଦାସଙ୍କ ପତ୍ନୀ ମିନତି ଦାସ,  ପୁଅ ବିଶାଳ ଦାସ ଓ ଝିଅ ଦୀପାଳି ଦାସଙ୍କ ବୟାନ ରେକର୍ଡ କରିଛନ୍ତି। ପ୍ରାୟ ୭ ଘଣ୍ଟା ଧରି ନବଦାସଙ୍କ ଘରେ ରହିଥିଲା କ୍ରାଇମବ୍ରାଞ୍ଚ ଟିମ୍।  ପୂର୍ବରୁ ଏ ନେଇ ସେମାନଙ୍କୁ ନୋଟିସ ହୋଇଥିଲା । ତେବେ ବିଶାଳ କହିଛନ୍ତି, ଏବେ ବି ତାଙ୍କ ପରିବାର ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଚାହୁଁଛନ୍ତି । 

Advertisment
  • ପୁଣି ଖୋଲିଲା ନବ ଦାସ ହତ୍ୟା ଫାଇଲ
  • ନବଙ୍କ ଘରେ କ୍ରାଇମବ୍ରାଞ୍ଚ୍ ଟିମ୍
  • ପରିବାର ଲୋକଙ୍କ ବୟାନ ରେକର୍ଡ

ନବ ଦାସଙ୍କ ହତ୍ୟା ମାମଲାର ସାନି ତଦନ୍ତ ନେଇ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିଧାନସଭାରେ ସୂଚନା ଦେଇଛନ୍ତି ।  ପୂର୍ବ ବିଜେଡି ସରକାରକୁ ଟାର୍ଗେଟ୍ କରି ମନ୍ତ୍ରୀ କହିଛନ୍ତି, ହତ୍ୟା ନେଇ ଯେଉଁଭଳି ତଦନ୍ତ ହେବା କଥା ହୋଇନାହିଁ । ନବ ଦାସଙ୍କ ପରିବାର ତଦନ୍ତରେ ସନ୍ତୁଷ୍ଟ ନଥିଲେ। ସରକାରଙ୍କୁ ଲେଖିକି ଦେବା ପରେ ପୁଣି ତଦନ୍ତ ଆରମ୍ଭ ହୋଇଛି । ନବ ଦାସଙ୍କୁ କିଏ ଓ କାହିଁକି ହତ୍ୟା କଲା? ତାର ରହସ୍ୟ ଲୋକେ ଜାଣିବା ଉଚିତ । ଅନ୍ୟପଟେ ବିଜେଡି ସରକାରଙ୍କ ସାନି ତଦନ୍ତକୁ ସ୍ୱାଗତ କରିଛି । ଆଉ କଂଗ୍ରେସ କହିଛି ସତ ସାମ୍ନାକୁ ଆସୁ।

ତେବେ ଦୁଇବର୍ଷର ତଦନ୍ତରେ କ୍ରାଇମବ୍ରାଞ୍ଚର ଭୂମିକା ଉପରେ ଅନେକ ପ୍ରଶ୍ନ ଉଠିଛି । l ତଥ୍ୟ ପ୍ରମାଣକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି । ନବଙ୍କ ରକ୍ତଭିଜା ସାର୍ଟ କୁଆଡେ ଗଲା ତାକୁ ନେଇ ବିବାଦ ହୋଇଛି । କ୍ରାଇମବ୍ରାଞ୍ଚ ରିପୋର୍ଟ ଓ ଏସଏଫଏସଲ ରିପୋର୍ଟର ତାଳମେଳ ନ ରହିବା ସନ୍ଦେହ ସୃଷ୍ଟି କରିଛି। ମୁଖ୍ୟସାକ୍ଷୀଙ୍କ ସାର୍ଟର ରଙ୍ଗ ବି ବଦଳିଥିବା ଅଭିଯୋଗ ହୋଇଛି । ଏବେ ପ୍ରଶ୍ନ ଉଠୁଛି, ଆଗକୁ କାହାକୁ ସନ୍ଦେହ ଘେରକୁ ନେବ କ୍ରାଇମବ୍ରାଞ୍ଚ? ବଡ଼ ବଡ଼ିଆ ତଦନ୍ତ ପରିସରଭୁକ୍ତ ହେବେ କି? ଠିକ୍ ବାଟରେ ଯିବ ତ ତଦନ୍ତ?