କନକ ବ୍ୟୁରୋ : ଗୁଣାତ୍ମକ ଶିକ୍ଷା, କେନ୍ଦ୍ରୀୟ ବିଦ୍ୟାଳୟ ଢାଞ୍ଚାରେ ଶିକ୍ଷାଦାନ ନିମନ୍ତେ ଗତ ସରକାରଙ୍କ ସମୟରେ ପ୍ରତି ବ୍ଲକରେ ଗୋଟିଏ ଲେଖାଏଁ ଓଡ଼ିଶା ଆଦର୍ଶ ବିଦ୍ୟାଳୟ ଖୋଲିଥିଲା । ଏଥିପାଇଁ ଖର୍ଚ୍ଚ ହୋଇଥିଲା କୋଟିକୋଟି ଟଙ୍କା । ସୁନ୍ଦର ଶ୍ରେଣୀଗୃହ ସାଙ୍ଗକୁ ଇ-ଲାଇବ୍ରେରି, ଲାବ୍ରୋଟୋରି, କମ୍ପ୍ୟୁଟର ସହ ଅନ୍ୟାନ୍ୟ ସାମଗ୍ରୀ ଯୋଗାଇଥିଲେ । ହେଲେ ବିଦ୍ୟାଳୟରେ ଶିକ୍ଷକ ଅଭାବ ଛାତ୍ରଛାତ୍ରୀ ଓ ଅଭିଭାବକଙ୍କ ଚିନ୍ତା ବଢ଼ାଇଛି । 

Advertisment

ନାହାନ୍ତି ଶିକ୍ଷକ , ହୋଇପାରୁନି ପାଠପଢ଼ା । ଆସିକା ବ୍ଲକର ନିମିନା ଠାରେ ରହିଛି ଓଡ଼ିଶା ଆଦର୍ଶ ବିଦ୍ୟାଳୟ । ବ୍ଲକର ୨୭ ପଞ୍ଚାୟତର ୯୦୦ରୁ ଅଧିକ ପିଲା ଏଠାରେ ପାଠ ପଢ଼ନ୍ତି । ଷଷ୍ଠରୁ ଦ୍ବାଦଶ ପର୍ଯ୍ୟନ୍ତ ଥିବା ଏହି ବିଦ୍ୟାଳୟରେ ୨୦ ଜଣଙ୍କ ସ୍ଥାନରେ ଅଛନ୍ତି ମାତ୍ର ୧୩ ଜଣ ଶିକ୍ଷକ । ଗଣିତ, ଭୌତିକ ବିଜ୍ଞାନ ଓ ରସାୟନ ବିଜ୍ଞାନ ଭଳି ଗୁରୁତ୍ବପୂର୍ଣ୍ଣ ବିଭାଗରେ ଶିକ୍ଷକ ନାହାଁନ୍ତି । ଫଳରେ +୨ ବିଜ୍ଞାନରେ ପରୀକ୍ଷା ଦେଇଥିବା ୬୯ ଛାତ୍ରଛାତ୍ରୀଙ୍କ ମଧ୍ୟରୁ ୬ ଜଣ ସମ୍ପୂର୍ଣ୍ଣ ଫେଲ୍‌ ହୋଇଯାଇଛନ୍ତି  । ୨୦ ଜଣଙ୍କର ଗୋଟିଏ ଲେଖାଏଁ ପେପର୍‌ରେ ବ୍ୟାକ୍‌ ଲାଗିଛି । 

+୨ ବିଜ୍ଞାନରେ ଶିକ୍ଷକ ନଥିବାରୁ ପିଲା ଫେଲ୍ ହେବା ଅଭିଯୋଗକୁ ସ୍ବୀକାର କରିଛନ୍ତି ପ୍ରଧାନଶିକ୍ଷକ । ଖାଲି ସେତିକି ନୁହେଁ, ବିଦ୍ୟାଳୟରେ ଇଂରାଜୀ, ଗଣିତ ଶିକ୍ଷକ ନାହାଁନ୍ତି । ଖେଳ, ଗୀତ, ଲାଇବ୍ରେରି ପରି ଅନେକ ବିଭାଗରେ ଶିକ୍ଷକ ପଦବୀ ଖାଲି ପଡ଼ିଛି । ଉପର ଅଧିକାରୀଙ୍କ ସହ କଥା ହୋଇ ଖାଲିପଡ଼ିଥିବା ପଦବୀ ପୂରଣ ନେଇ ପ୍ରତିଶ୍ରୁତି ଦେଇଛନ୍ତି ଭଞ୍ଜନଗର ଉପଜିଲ୍ଲାପାଳ । କେବଳ ଆସିକା ନୁହେଁ, ଗଞ୍ଜାମର ଧରାକୋଟ, ପୋଲସରା, ଶେରଗଡ଼ ଓ ଅନ୍ୟ ବ୍ଲକରେ ଥିବା ଆଦର୍ଶ ବିଦ୍ୟାଳୟରେ ବି ସମାନ ସ୍ଥିତି । ତୁରନ୍ତ ଶିକ୍ଷକ ପଦବୀ ପୂରଣ କରାନଗଲେ ଚଳିତ ଥର ବି ପିଲାଙ୍କ ପରୀକ୍ଷା ଫଳ ପ୍ରଭାବିତ ହେବାର ଆଶଙ୍କା ରହିଛି ।