ସ୍ୱାସ୍ଥ୍ୟକେନ୍ଦ୍ରରେ ଜଳ ନିଅଣ୍ଟ ! ରୋଗୀ ହେଉଛନ୍ତି ହନ୍ତସନ୍ତ

କନକ ବ୍ୟୁରୋ : ମାଲକାନଗିରି ଜିଲା ଦ୍ୱିତୀୟ ହୃଦୟ କୁହାଯାଉଥିବା ମାଥିଲି ସବଡିଭିଜନ ମେଡିକାଲରେ ସ୍ୱାସ୍ଥ୍ୟକେନ୍ଦ୍ରରେ ଜଳ ସଙ୍କଟ । ବର୍ଷ ବର୍ଷ ଧରି ଲାଗି ରହିଛି ପାନୀୟ ଜଳ ଅଭାବ । ବିଭାଗୀୟ ବାବୁ ଆସି ସ୍ୱାସ୍ଥ୍ୟକେନ୍ଦ୍ରର ସମସ୍ୟା ସମାଧାନ କରିବାକୁ ପ୍ରତିଶ୍ରୁତି ଦେଉଛନ୍ତି । ହେଲେ କିଛି ପୂରଣ ହେଉନି ।

ମାଲକାନଗିରି ଜିଲ୍ଲା ମାଥିଲି ସଦରରେ ଥିବା ଉପଖଣ୍ତ ସ୍ୱାସ୍ଥ୍ୟକେନ୍ଦ୍ରରେ ଦେଖାଦେଇଛି ପାଣି ସମସ୍ୟା । ନା ଟୋପେ ପିଇବା ପାଣି ମିଳୁଛି । ନା ଶୌଚାଳୟରେ ପାଣିର ବ୍ୟବସ୍ଥା ଅଛି। ଚିକିତ୍ସା ପାଇଁ ଆସି ହଇରାଣ ହେଉଛନ୍ତି ରୋଗୀ । ବିକଳ୍ପ ବ୍ୟବସ୍ଥା ନଥିବାରୁ ମାଥିଲି ସବଡିଭିଜନ ସମ୍ମୁଖରେ ଥିବା ହାତଧୁଆ ବେସିନରୁ ପିଇବା ପାଣିଠାରୁ ଆରମ୍ଭ କରି ଶୌଚାଳୟ ପାଇଁ ପାଣି ସଂଗ୍ରହ କରିବାକୁ ପଡ଼ୁଛି । ଦେହ ଭଲ କରିବାକୁ ଆସି ରୋଗ କିଣିନେବା ଭଳି ପରିସ୍ଥିତି ସୃଷ୍ଟି ହୋଇଛି ।

ଅଧିକ ପଢ଼ନ୍ତୁ : ରାସ୍ତା ପାଇଁ ଖୁଣ୍ଟ ଭାଙ୍ଗିଦେଲା ଠିକାସଂସ୍ଥା; ୭ ମାସ ହେଲା ଅନ୍ଧାରରେ ଗଜପତିର ଗାଁ

ମାଥିଲି ସମେତ ଖଇରପୁଟ ଓ କୁଡୁମୁଲୁଗୁମ୍ମା ଅଞ୍ଚଳର ହଜାର ହଜାର ଲୋକଙ୍କ ଭରସା ଉପଖଣ୍ତ ଚିକିତ୍ସାଳୟ । କିନ୍ତୁ ପାନୀୟ ଜଳ ସମସ୍ୟା ସ୍ୱାସ୍ଥ୍ୟକେନ୍ଦ୍ରରେ ଶିରୋନାମା ପାଲଟିଛି । ସ୍ୱାସ୍ଥ୍ୟକେନ୍ଦ୍ର ପରିସରରେ ଥିବା ପୁରୁଷ ଓ ମହିଳା ଶୌଚାଳୟରେ ପାଣି ଆସୁନି । ଏନେଇ ବାରମ୍ବାର ପ୍ରଶାସନକୁ ଅବଗତ କରାଯାଇଛି। ଜିଲ୍ଲାପାଳ ସମସ୍ୟାର ସମାଧାନ ପାଇଁ ନିର୍ଦ୍ଦେଶ ବି ଦେଇଛନ୍ତି । କିନ୍ତୁ ଜଳ ଓ ପରିମଳ ବିଭାଗର ଖାମଖିଆଲ ନୀତି ଯୋଗୁ ଆଜି ପାଣି ପାଇଁ ହନ୍ତସନ୍ତ ରୋଗୀ! ଯାହାକୁ ମାନିଛନ୍ତି ଖୋଦ ମାଥିଲି ଡାକ୍ତର ।

ଡାକ୍ତରଖାନା ଭଳି ସ୍ଥାନରେ ପିଇବା ପାଣିର ବ୍ୟବସ୍ଥା କାହିଁକି ନାହିଁ ? ସ୍ୱାସ୍ଥ୍ୟ ଭିତ୍ତିଭୂମି ସଜାଡ଼ିବାକୁ ଆସୁଥିବା ଟଙ୍କା ଖର୍ଚ୍ଚ ହେଉଛି କେଉଁଠି ? ଏପରି ସାଂଘାତିକ ଅବହେଳା ପାଇଁ ଦାୟୀ କିଏ ? ପାନୀୟ ଜଳ ସଙ୍କଟର ଚିତ୍ର ଦେଖିଲା ପରେ ଲାଗୁଛି ସ୍ୱାସ୍ଥ୍ୟସେବା ନାଁ ସରକାର କହୁଥିବା ପ୍ରତ୍ୟେକଟି କଥା କେବଳ ଭାଷଣ ମାତ୍ର ।