ବାଣ ବିକୁଥିବା ବେଳେ ହେଲା ବିସ୍ଫୋରଣ । ବାଲିଅନ୍ତାରେ ଜଳିଗଲା ଯଜ୍ଞ ମଣ୍ଡପ ।

କନକ ବ୍ୟୁରୋ: ପୁରୀ ସଦର ବାଟ ଗାଁ ରାଉତ ସାହିରେ ବାଣ ବିସ୍ପୋରଣ । ବାଣ ବିସ୍ପୋରଣରେ ଦୁଇ ନାବାଳକ ସହ ୩ ଜଣ ଗୁରୁତର ଆହତ ହୋଇଛନ୍ତି । ୩ ଆହତଙ୍କୁ ପ୍ରଥମେ ପୁରୀ ସଦର ମୁଖ୍ୟ ଚିକିତ୍ସାଳୟ ଓ ପରେ କଟକ ସ୍ଥାନାନ୍ତରିତ କରାଯାଇଛି । ମିଳିଥିବା ସୂଚନା ମୁତାବକ, ଆହତ ବୁଲା ନିଜ ଘରେ ବାଣ ବିକୁଥିବା ବେଳେ ଏହି ବିସ୍ଫୋରଣ ହୋଇଛି । ବାଣ କିଣିବାକୁ ଯାଇଥିବା ସଞ୍ଜୟ ଜେନା ମଧ୍ୟ ଗୁରୁତର ଆହତ ହୋଇଛନ୍ତି ।  

ସେହିଭଳି ଆଲୋକର ପର୍ବ ଦୀପାବଳି ପାଳନ ଭିତରେ ଅନେକ ଅଘଟଣ ଖବର ସାମ୍ନାକୁ ଆସୁଛି । ବାଣ ନିଆଁ ପଡି ଯଜ୍ଞ ମଣ୍ଡପ ଜଳି ପାଉଁଶ ହୋଇ ଯାଇଛି । ବାଲିଅନ୍ତା ବ୍ଲକ ଜାଗେଶ୍ୱରୀ ମନ୍ଦିର ସମ୍ମୁଖରେ ଥିବା ଯଜ୍ଞ ମଣ୍ଡପ ତୁଳିରେ ବାଣ ପଡି ଯାଇଥିଲା । ଫଳରେ ଯଜ୍ଞ ବେଦୀରେ ନିଆଁ ଲାଗି ସମ୍ପୂର୍ଣ୍ଣ ମଣ୍ଡପ ଜଳି ଯାଇଥିଲା । ବାଲିପାଟଣା ଅଗ୍ନିଶମ ବାହିନୀ ପହଁଞ୍ଚି ନିଆଁକୁ ଆୟତ୍ତ ପାଇଁ ଚେଷ୍ଟା ଜାରି ରଖିଛି । 

ସେପଟେ ଦୀପାବଳିରେ ରାୟଗଡାରେ ଘଟିଛି ଅଘଟଣ । ବାଣ ନିଆଁରେ ଜଳିଗଲା ପୂରା ଦୋକାନ । ରାଜ୍ୟ ରାଜପଥ ନିକଟ ଜଗନ୍ନାଥ ମନ୍ଦିର ସାହିରେ ଥିବା ସନ୍ତୋଷ ବେହେରାଙ୍କ ପାନ ଦୋକାନରେ ଖୋଲା ପେଟ୍ରୋଲ ବିକ୍ରି ସମୟରେ ଏଭଳି ଅଘଟଣ ହୋଇଛି ।  ବାଣ ନିଆଁ ପଡି ପୂରା ଦୋକାନ ଜଳି ଯାଇଛି । ଦୋକାନରେ ଥିବା ସମସ୍ତ ସାମଗ୍ରୀ ପୋଡି ପାଉଁଶ ହୋଇଯାଇଛି । ଘଟଣାସ୍ଥଳରେ ରାୟଗଡା ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଛି ।