କନକ ବ୍ୟୁରୋ : ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ସଂପୃକ୍ତ ଥିବା ୩ ଜଣ ଆତଙ୍କବାଦୀଙ୍କୁ ସୁରକ୍ଷାକର୍ମୀମାନେ ଜୁଲାଇ ୨୮ ତାରିଖରେ ଗୁଳି କରି ମାରିଦେଇଛନ୍ତି । ଏନେଇ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହା ଲୋକସଭାରେ ସୂଚନା ଦେଇଛନ୍ତି । 

Advertisment

ଗୃହମନ୍ତ୍ରୀ କହିଛନ୍ତି କି, ଅପରେସନ୍ ମହାଦେବରେ ଆତଙ୍କୀ ସୁଲେମାନ ଓରଫ ଫୈଜଲ ଜଟ, ଜିବରାନ ଓ ଅବୁ ହମଜାଙ୍କୁ ସୁରକ୍ଷାକର୍ମୀମାନେ ମାରିଦେଇଛନ୍ତି  । ଏହି ୩ ଜଣ ଆତଙ୍କବାଦୀମାନେ ପହଲଗାମ ଆକ୍ରମଣରେ ସଂପୃକ୍ତି ଥିବା କଥା ଗୃହମନ୍ତ୍ରୀ କହିଛନ୍ତି ।

ହେଲେ ଅପରେସନ ମହାଦେବର ଟାଇମିଂକୁ ନେଇ ସମାଜବାଦୀ ପାର୍ଟି ପ୍ରଶ୍ନ ଉଠାଇଛି । ଦଳର ପ୍ରମୁଖ ଅଖିଳେଶ ଯାଦବ କହିଛନ୍ତି କି, ୯୦ ଦିନ ତଳେ ପହଲଗାମ ଆକ୍ରମଣ ହୋଇଥିଲା । ହେଲେ ସଂସଦରେ ଅପରେସନ ସିିନ୍ଦୂରକୁ ନେଇ ଆଲୋଚନା ହେବାର ପୂର୍ବଦିନ କିଭଳି ଆତଙ୍କବାଦୀମାନେ ଧରାପଡ଼ିଲେ । 

କେବଳ ଅଖିଳେଶ ଯାଦବ ନୁହଁନ୍ତି ସମାଜବାଦୀ ପାର୍ଟି ବିଧାୟକ ଅବୁ ଆଜମୀ କହିଛନ୍ତି କି, ପହଲଗାମ ଆକ୍ରମଣ ଏତେ ଦିନ ବିତିଥିଲେ ବି ଆତଙ୍କବାଦୀମାନେ ମିଳୁନଥିଲେ । ଯେତେବେଳେ ଅପରେସନ୍ ସିନ୍ଦୂରକୁ ନେଇ ଗୃହରେ ଆଲୋଚନା ଚାଲିଛି ଠିକ୍ ସେତିକି ବେଳେ ଆତଙ୍କବାଦୀ ଚିହ୍ନଟ ହେଉଛନ୍ତି ଓ ତାଙ୍କୁ ଗୁଳି କରାଯାଉଛି । ଏହା ସଂଯୋଗ ନା ପ୍ରୟୋଗ ବୋଲି ସେ ପ୍ରଶ୍ନ କରିଛନ୍ତି ।  ସେ ଆହୁରି କହିଛନ୍ତି କି, ସରକାର ଯାହା କହୁଛନ୍ତି ସେନା ତାହା କହୁଛି । ତିନିଜଣ ଆତଙ୍କବାଦୀ ଏକାସାଙ୍ଗରେ ମିଳୁଛନ୍ତି ଓ ସେମାନଙ୍କୁ ଏନକାଉଣ୍ଟର କରାଯାଉଛି । ଏହା ପଛରେ ଥିବା ସତ୍ୟ ଦେଶବାସୀ ଜାଣିବାକୁ ଚାହୁଁଛନ୍ତି ।

ସୂଚନା ଥାଉ କି, ଏପ୍ରିଲ ୨୨ ତାରିଖରେ ପହଲଗାମର ବୈସରନ ଘାଟିରେ ଆତଙ୍କବାଦୀମାନେ ଆକ୍ରମଣ କରିଥିଲେ । ଏଥିରେ ୨୬ ଜଣ ଭାରତୀୟଙ୍କର ମୃତ୍ୟୁ ହୋଇଥିଲା । ଏହାପରେ ସରକାର ଆତଙ୍କବାଦୀଙ୍କ ଉର୍ଦ୍ଦେଶ୍ୟରେ ଅପରେସନ ସିନ୍ଦୂର କରିଥିଲେ । ଏହାକୁ ନେଇ ଏବେ ସଂସଦରେ ଆଲୋଚନା ଚାଲିଛି ।