ପ୍ରେମ କରି ନ୍ୟାୟ ଅପେକ୍ଷାରେ ଯୁବତୀ, ଗଞ୍ଜାମ ପ୍ରୟାଗିରେ ପ୍ରେମିକ ଘର ସାମନାରେ ଧାରଣା

କନକ ବ୍ୟୁରୋ:  ପ୍ରଥମେ ପ୍ରେମ ଆଉ ତାପରେ ପ୍ରତାରଣା । ଇନ୍‌ଷ୍ଟାଗ୍ରାମରୁ ଆରମ୍ଭ ହୁଏ ପ୍ରେମ । ଆଉ ତାପରେ  ବିବାହର ପ୍ରତିଶ୍ରୁତି ଦେଇ ସମ୍ପର୍କ ରଖିବା ପରେ ଯବୁତୀଙ୍କୁ ମିଳିଲା ଧୋକା। ଏହିଭଳି ଅଭିଯୋଗ ଆଣି ମାସେ ହେଲା ପ୍ରେମିକ ଘର ଆଗରେ ଧାରଣାରେ ବସିଛି ପ୍ରତାରିତା ପ୍ରେମିକା । ମନରେ ଗୋଟିଏ ଜିଦ ପୁଅ ଘରକୁ ନନେଲେ ଆତ୍ମହତ୍ୟା କରିବି । ଗଞ୍ଜାମ ଜିଲ୍ଲା ପ୍ରୟାଗି ଗାଁରେ ଏହି ଘଟଣା ଏବେ ଚର୍ଚ୍ଚାକୁ ଆସିଛି। ଅଭିଯୋଗକାରୀ ଯୁବତୀ ଜଣକ ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଉଠାଣିକୁଦା ଗାଁର । ଇନଷ୍ଟାରେ  ସମୀର ତରାଇଙ୍କ ସହ ସମ୍ପର୍କ ପରେ ଏବେ ଘର ସାମନାରେ ନ୍ୟାୟ ଅପେକ୍ଷାରେ ।

ପୁଅ ଘର ସାମନାରେ ଯୁବତୀ ବସିଥିବା ବେଳେ ଏହାର ପରିଣାମ ଭୋଗୁଛନ୍ତି ପୁଅର ପରିବାର ଲୋକ । ଝିଅ ଅନ୍ୟ ଜାତିର ହୋଇଥିବାରୁ ପରିବାରକୁ ବାସନ୍ଦ କରିଛନ୍ତି । ଘରର କୌଣସି କର୍ମ  କ୍ରିୟାରେ ମଧ୍ୟ ସାମିଲ ହେଉନାହାନ୍ତି । ସମସ୍ୟା ନେଇ ପୁଅ ପରିବାର ଥାନାର ଦ୍ୱାରସ୍ଥ ହୋଇ ନ୍ୟାୟ ମାଗିଛନ୍ତି । ସେପଟେ ଘଟଣାର ସମାଧାନ ପାଇଁ ଦୁହିଁଙ୍କୁ ନେଇ କାଉନସେଲିଂ କରାଯାଉଛି । ଉଭୟକୁ ଥାନାକୁ ନେଇ ସମାଧାନ କରାଯିବାକୁ ମିଳିଛି ପ୍ରତିଶ୍ରୁତି । 

ଏକ ମାସ ଧରି ପ୍ରେମିକ ଘରେ ଧାରଣାରେ ବସି ରହିଥିଲେ ବି ପହଂଚିନି ପ୍ରେମିକ । ସେପଟେ ଯୁବତୀଙ୍କ ପାଇଁ ପୁରା ପରିବାର ଭୋଗୁଛି ବାସନ୍ଦ ଦଣ୍ଡ । ଏନେଇ ଖୁବଶୀଘ୍ର ସମାଧାନ ଦାବି କରିଛି ପରିବାର ।