କନକ ବ୍ୟୁରୋ : ମହିଳାଙ୍କ ସାହସ ପାଇଁ ବଞ୍ଚିଗଲା ଜୀବନ । ତିନି ଡକାୟତଙ୍କୁ ଏକାକି ଅଟକାଇଦେଲେ ମହିଳା, ସିସିଟିଭିରେ କଏଦ ହୋଇଛି ରୋମାଞ୍ଚକର ଦୃଶ୍ୟ । ଏଭଳି ଘଟଣା ସାମ୍ନାକୁ ଆସିଛି ପଂଜାବ ଅମୃତସରରୁ ।  ତିନି ଡକାୟତ ମହିଳାଙ୍କ ଘରେ ପଶିବାକୁ ଉଦ୍ୟମ କରୁଥିବାବେଳେ ସେ ଏକାକି କବାଟକୁ ଠେଲିଧରି ଚିତ୍କାର କରିବା ଫଳରେ ସେମାନେ ପଳାୟନ କରିଛନ୍ତି । ଏ ଘଟଣାର ସିସିଟିଭି ପୁଟେଜ ଏବେ ଭାଇରାଲ ହେବାରେ ଲାଗିଛି । ଏହି ସାହସୀ ମହିଳାଙ୍କ ନାଁ ମଣିଦୀପ କୌର। ତାଙ୍କ ସ୍ୱାମୀ ବାହାରେ ଥିଲେ । ଘରେ ସେ ଓ ତାଙ୍କର ଦୁଇ ପିଲା ଥିଲେ । ଏହି ସମୟରେ ତିନି ଜଣ ଡକାୟତ ତାଙ୍କ ଘରେ ପଶିବାକୁ ଉଦ୍ୟମ କରିଥିଲେ । ହେଲେ ସାହସ ଦେଖାଇ ମହିଳା ଜଣକ ନିଜର ସମସ୍ତ ବଳ ପ୍ରୟୋଗ କରି କବାଟକୁ ଭିତର ପଟୁ ବନ୍ଦ କରିବାକୁ ଚେଷ୍ଟା କରିଥିଲେ । ବାହାରପଟୁ ଡକାୟତମାନେ ମଧ୍ୟ କବାଟ ଠେଲି ଭିତରକୁ ଆସିବାକୁ ଉଦ୍ୟମ ଚଳାଇଥାନ୍ତି । ମାତ୍ର, ମିହଳା ଜଣକ ନଡରି ନିଜ ଉଦ୍ୟମ ଜାରି ରଖିଥିଲେ ଓ କୌଣସି ପ୍ରକାରେ କବାଟର କିଳିଣି ଲଗାଇ ଦେଇଥିଲେ । ଏହା ସହିତ ସେ ନିଜ ଶରୀରକୁ କାବଟରେ ଚାପି ରଖି ପାଖରେ ଥିବା ଗୋଟିଏ ସୋଫା ଆଣି କବାଟକୁ ଲଗାଇ ଦେଇଥିଲେ । ପରେ ବିଫଳ ହୋଇ ସେଠାରୁ ଚମ୍ପଟ ମାରିଥିଲେ ଡକାୟତ ମାନେ । ମହିଳାଙ୍କ ଏଭଳି ସାହସକୁ ଚାରୁଆଡୁ ପ୍ରସଂଶା କରାଯାଉଛି ।