ପାହାଡ଼ି ମଣିଷଙ୍କ ସଂଘର୍ଷ କାହାଣୀ ; ଜୀବନକୁ ପାଣି ଛଡ଼ାଇ ବିପଦପୂର୍ଣ୍ଣ ଜଳଯାତ୍ରା

କନକ ବ୍ୟୁରୋ : ବର୍ଷାଦିନେ ବାଜିରେ ଲାଗେ ଜୀବନ । ଜୀବନକୁ ପାଣି ଛଡ଼ାଇ ହାଣ୍ଡିରେ ନଦୀ ପାର ହୁଅନ୍ତି ମାଲକାନଗିରି ଜିଲ୍ଲା ଗୋବିନ୍ଦପାଲି ପଞ୍ଚାୟତର ବଡ଼ଘାଟ ଗ୍ରାମବାସୀ । କାରଣ ପ୍ରଶାସନ ନିକଟରେ ବାରମ୍ବାର ଜଣାଇବା ପରେ ବି ଆଜି ଯାଏଁ ପୋଲଟିଏ କରାଯାଇ ପାରିନାହିଁ । ଫଳରେ ଯାତାୟାତରେ ପ୍ରତିଦିନ ସଂଘର୍ଷ କରୁଛି ପାହାଡ଼ି ମଣିଷ । 

ଅକାତକାତ ପାଣି , ହାଣ୍ଡି ଧରି ନଦୀ ପାର ହେଉଛନ୍ତି ଛୋଟ ପିଲାଠୁ ବୟସ୍କ । ଏ କଷ୍ଟ ଗୋଟିଏ ଦିନର ନୁହେଁ, ବର୍ଷ ବର୍ଷ ଧରି ଏମିତି ଚାଲେ । ବର୍ଷା ୪ ମାସ ଏମାନଙ୍କ ପାଇଁ ଏସବୁ ଦେହସୁହା , ବିକଳ୍ପ ବ୍ୟବସ୍ଥା ନାହିଁ । ତେଣୁ ଲୋକେ ଏମିତି ଧର୍ମଗାଡ଼ ନଦୀ ପାର ହୁଅନ୍ତି । ଯେ ପର୍ଯ୍ୟନ୍ତ ଲୋକମାନେ ମୌଳିକ ସୁବିଧା ପାଇଁ ଯନ୍ତ୍ରଣା ଭୋଗୁଥିବେ ସେପର୍ଯ୍ୟନ୍ତ ବିକଶିତ ଓଡ଼ିଶା ବା ବିକଶିତ ଭାରତ ପରିକଳ୍ପନା କେବଳ ସ୍ୱପ୍ନ ଛଡ଼ା ଆଉ କିଛି ନୁହେଁ ।  

ଗୋବିନ୍ଦପାଲି ଠାରୁ ୧୦ କିଲୋମିଟର ଗଲେ ପଡ଼େ ବଡ଼ଘାଟ ଗାଁ । ସ୍ବାସ୍ଥ୍ୟକେନ୍ଦ୍ର, ପଞ୍ଚାୟତ ଓ ବ୍ଲକକୁ ଯିବା ପାଇଁ ନଈ ପାରିହେବାକୁ ପଡ଼େ । ବର୍ଷତମାମ ନିଜେ ତିଆରି କରିଥିବା କାଠ ପୋଲରେ ଯା’ଆସ କରନ୍ତି । ହେବେ ବର୍ଷାଦିନେ ସେ ପୋଲ ଭାସିଯାଏ ଆଉ ଏମିତି ଜଳଯାତ୍ରା କରିବାକୁ ପଡ଼େ । ଏନେଇ ବାରମ୍ବାର ଅଭିଯୋଗ ପରେ କଂକ୍ରିଟ ପୋଲ ତିଆରି ହେଉଛି, ହେଲେ କେବେ ସରିବ ତା’ କାହାରିକୁ ଜଣାନାହିଁ । କଙ୍କ୍ରିଟ୍‌  ପୋଲ ନିର୍ମାଣ ସରୁନି, କାଠ ପୋଲ ଭାସି ଯାଇଛି । ଧର୍ମଗାଡ଼ ନଦୀ ପାଇଁ ତେଣୁ ବର୍ଷାଦିନେ ବଡ଼ଘାଟ ଗାଁ ଲୋକଙ୍କୁ ହାଣ୍ଡି ଭରସା ।