ମନେପଡ଼ନ୍ତି କାରଗିଲ୍‌ର ଓଡ଼ିଆ ବୀର ; ସହିଦ ଗୋପୀନାଥଙ୍କୁ ଏବେ ବି ଝୁରୁଛନ୍ତି ମାଆ

କନକ ବ୍ୟୁରୋ : ୧୯୯୯, ଜୁଲାଇ ୨୬ ...ପ୍ରାୟ ୨ ମାସ ଧରି କାରଗିଲ୍‌ର ଉଚ୍ଚ ଶିଖର ପାହାଡ଼ରେ ଶତ୍ରୁ ରାଷ୍ଟ୍ର ସହ ଲଢ଼େଇ କରି ଏହି ଦିନରେ ବିଜୟ ହାସଲ କରିଥିଲେ ଭାରତୀୟ ଯବାନ । ଏହି ଅବସରରେ ଦିଲ୍ଲୀ ଅମର ଯବାନ ଜ୍ୟୋତିରେ ବୀର ଯବାନଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ । ଭାରତର ସୀମାନ୍ତ ଟାଇଗର ହିଲ୍ ଓ ତୋଲୋଲିଙ୍ଗ ହିଲ୍‌ରେ କବ୍‌ଜା ଜମାଇ ଥିବା ପାକିସ୍ତାନ ସେନାକୁ ମାତ ଦେଇ ବିଜୟ ପତାକା ଉଡ଼ାଇଥିଲେ ଭାରତୀୟ ସେନା । ଅନେକ ବୀର ଯବାନ ପାକ୍‌ ସେନା ସହ ଲଢ଼େଇରେ ସହିଦ ହୋଇଥିଲେ । ଏହି ବୀରଙ୍କୁ ଆଜି ମନେ ପକାଇଛି ସାରା ଦେଶରେ ବିଜୟ ଦିବସ ପାଳିତ ହେଉଛି । 

କାରଗିଲ୍‌ ଯୁଦ୍ଧରେ ଓଡିଶାରୁ ପ୍ରଥମ ସହିଦ ହୋଇଥିଲେ ଗଞ୍ଜାମ ଜଗଦଲପୁରର ଶ୍ରୀନିବାସ ପାତ୍ର । ବିବାହର ୪ ଦିନ ପରେ  ସେ ଯୁଦ୍ଧକ୍ଷେତ୍ରକୁ ଚାଲିଯାଇଥିଲେ । ଆଉ  କାରଗିଲ୍‌ ଯୁଦ୍ଧରେ ଦେଶ ପାଇଁ ଜୀବନ ଦେଇଥିଲେ । କାରଗିଲ୍‌ ବିଜୟ ଦିବସରେ ଶ୍ରୀନିବାସଙ୍କୁ ବ୍ରହ୍ମପୁରରେ ଶ୍ରଦ୍ଧାଞ୍ଜଳି ଦିଆଯାଇଛି । ଆଉ ଜଣେ ବୀର ସହିଦ ହେଉଛନ୍ତି କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକ ଜନାରର୍ଦ୍ଦନପୁର ଗାଁର ଗୋପୀନାଥ ମହାରଣା । ମାତ୍ର ୨୩ ବର୍ଷ ବୟସରେ ଗୋପୀନାଥ ଦେଶ ପାଇଁ ସହିଦ ହୋଇଥିଲେ ।  ଅନେକ ବର୍ଷ ବିତିଗଲାଣି ହେଲେ ଗୋପୀନାଥଙ୍କ ମାଆଙ୍କ ଆଖିରୁ ଲୁହ ଶୁଖିନି । ପୁଅ ଯେ ସବୁଦିନ ପାଇଁ ଆରପାରିରେ ଏକଥା ଭାବି ପୁଣି ଥରେ କାନ୍ଦି ପକାନ୍ତି ଗୋପୀନାଥଙ୍କ ମାଆ । ପ୍ରତ୍ୟେକ ବର୍ଷ କାରଗିଲ ବିଜୟ ଦିବସ ଅବସରରେ ଏଠାରେ ଶ୍ରଦ୍ଧାଞ୍ଜଳି ସଭାର ଆୟୋଜନ କରାଯାଇଥାଏ । ଆଜି କାରଗିଲ ବିଜୟ ଦିବସରେ ସମସ୍ତେ ସଦିଦଙ୍କୁ ଝୁରୁଛନ୍ତି ଓ ସେମାନଙ୍କ ବୀରତ୍ୱର  ଗାଥା ବଖାଣୁଛନ୍ତି ।