ସାର ପାଇଁ ସରୁନି ସଂଗ୍ରାମ ; କୋରାପୁଟରୁ ଗଞ୍ଜାମ ୟୁରିଆ ବସ୍ତା ପାଇଁ ଚାଷୀ ହିନସ୍ତା

କନକ ବ୍ୟୁରୋ : ଜୟପୁର ରାଜନୀତିରେ ୟୁରିଆ ସାର । ଧାନ ବିଲରେ ସାର ପକାଇବା ପାଇଁ ସକାଳୁ ସଞ୍ଜ ଯାଏଁ ସମବାୟ ସମିତି ଆଗରେ ଲମ୍ବା ଧାଡ଼ିରେ ଅପେକ୍ଷା କରି ରହୁଛନ୍ତି ଚାଷୀ । ଗୋଟିଏପଟେ ଲଗାଣ ବର୍ଷା ଅନ୍ୟପଟେ ସାର ପାଇଁ ଆନ୍ଦୋଳନ , ଏସବୁ ସଂଗ୍ରାମ ସାର ପାଇଁ । କାରଣ ଠିକଣା ସମୟରେ ଚାଷୀଙ୍କୁ ମିଳୁନି ସାର । ୟୁରିଆ ସାର ପାଇଁ ହନ୍ତସନ୍ତ ହେଉଛନ୍ତି ଜୟପୁରର ଚାଷୀ । ଘଣ୍ଟା ଘଣ୍ଟା ଧରି ଅପେକ୍ଷା କରିବା ପରେ ସାର ମିଳୁନାହିଁ । ସେପଟେ ୟୁରିଆ ସଙ୍କଟକୁ ତେଜିଲାଣି ରାଜନୀତି । ବିଜେଡି ନେତା ଚାଷୀକୁ ନେଇ ଆନ୍ଦୋଳନର ଡାକରା ଦେଇ କୃଷି ବିଭାଗ ଅଫସକୁ ଘେରାଉ କରିଛନ୍ତି ।

ସାମ୍ବାଦିକ ସମ୍ମିଳନୀ କରି ଚାଷୀଙ୍କ ସହ ଥିବା ଆଶ୍ୱାସନା ଦେଇଛନ୍ତି ଜୟପୁର ବିଧାୟକ ତାରା ପ୍ରସାଦ ବାହିନୀପତି । ଏ ସବୁ ଭିତରେ ବିଭାଗୀୟ ଅଧିକାରୀ କହିଛନ୍ତି ୪ଦିନ ଭିତରେ ୟୁରିଆ ସାର ଆସିବ । ପୂର୍ବରୁ ଯାହା ଆସିଥିଲା ତାହା ମକା ଚାଷ ପାଇଁ ଦିଆଯାଇଛି । ଚାଷୀ ଆଗୁଆ ସାର ନେଇ ଘରେ ରଖିବା କଥା । ସେପଟେ ଚାଷୀ କହୁଛନ୍ତି ମିଛ କହି ଚାଷୀଙ୍କୁ ଭୁଆଁ ବୁଲାଉଛନ୍ତି  ବିଭାଗୀୟ ଅଧିକାରୀ ।