ସୁବର୍ଣ୍ଣରେଖା ବାଲି ଉଠାଣକୁ ନେଇ ଅଭାବନୀୟ ଘଟଣା; ଗାଡ଼ି ଅଟକାଇଲେ ଶହ ଶହ ମହିଳା

କନକ ବ୍ୟୁରୋ : ବସ୍ତା ଜଳେଶ୍ୱର ମାଙ୍କଡିଆ ପଞ୍ଚାୟତ ନିକଟରେ ସୁବର୍ଣ୍ଣରେଖା ନଦୀରୁ ବାଲି ଉତ୍ତୋଳନକୁ ସ୍ଥାନୀୟ ଲୋକଙ୍କ ବିରୋଧ ଦ୍ବିତୀୟ ଦିନରେ ପହଞ୍ଚିଛି । ଆଜି ବି ଉତ୍ତୋଳନକୁ ନେଇ ସେଠାରେ ଚାପା ଉତ୍ତେଜନା ଲାଗିରହିଛି । ସରକାର ଏହି ଖାଦାନକୁ ନିଲାମ ଦେଇଥିଲେ ମଧ୍ୟ ବାଲି ବ୍ୟବସାୟୀ ମାନେ ସରକାରୀ ନିୟମକୁ ବେଖାତିର କରି ଜେସିବି ଏବଂ ଟ୍ରାକ୍ଟର ଲଗାଇ ଉତ୍ତୋଳନ କରୁଥିବାରୁ ଗାଁ ପ୍ରତି ବିପଦ ରହିଛି । ତେଣୁ ଏହାକୁ ବିରୋଧ କରି ଗତକାଲି ରାତିରେ ୨ଟି ଜେସିବି ଏବଂ ୧୦ଟି ଟ୍ରାକ୍ଟର ଅଟକ ରଖିଥିଲେ ଗାଁ ଲୋକେ । ଘଟଣା ସ୍ଥଳରେ ରାଇବଣିଆ ପୋଲିସ ପହଞ୍ଚି ଗାଡ଼ିଗୁଡିକୁ ଜବତ କରିଥିଲା ।

ଜଳେଶ୍ବରରେ ବାଲି ଉତ୍ତେଳନ ଦ୍ବାରା ମାଙ୍କଡିଆ ନିକଟରେ ସୁବର୍ଣ୍ଣ ରେଖା ନଦୀ ପାଖାପାଖି ୧୮ ଶହ ମିଟର କୂଳ ଖାଇଛି । ଯାହାଫଳରେ ମାଙ୍କଡିଆ ଓ କୁଆଁରପୁର ଦୁଇଟି ଗାଁ ନଦୀ ଗର୍ଭରେ ଲୀନ ହୋଇଯାଇଛି । ସରକାରଙ୍କ ତରଫରୁ ପଥର ପ୍ୟାକିଂ କରାଯାଇଥିଲେ ବି ବାଲିଖନନ ଦ୍ବାରା ଏହି ପଥର ପ୍ୟାକିଂ ନଷ୍ଟ ହୋଇ ଗାଁ ପ୍ରତି ବିପଦ ସୃଷ୍ଟି ହେବା ସମ୍ଭାବନା ଥିବାରୁ ସଂପୃକ୍ତ ଅଂଚଳରେ ବାଲିଖନନକୁ ବିରୋଧ କରୁଛନ୍ତି ଗ୍ରାମବାସୀ । ଗାଁରେ ଉତ୍ତେଜନା ଲାଗି ରହିଥିବାରୁ ଜଳେଶ୍ବର ଜୁନିୟର ଖଣି ଅଧିକରୀ, ତହସିଲଦାର ଏବଂ ରାଣିବଣିଆ ଥାନା ଅଧିକାରିଣୀ ଲୋକଙ୍କୁ ବୁଝାସୁଝା କରିଛନ୍ତି । ବାଲିଖାଦାନକୁ ଯାଇ ସ୍ଥିତି ତଦାରଖ କରିଛନ୍ତି ।

ଲୋକଙ୍କ ସହ ଆଲୋଚନା କରି ସମାଧାନର ପ୍ରତିଶ୍ରୁତି ଦେଇଛନ୍ତି ପ୍ରଶାସନିକ ଅଧିକରୀ । ଏବେ ଅପେକ୍ଷା ଲୋକଙ୍କୁ ନ୍ୟାୟ ମିଳୁଛି କେବେ ।