କନକ ବ୍ୟୁରୋ: ସେଦିନ ମୁମ୍ବାଇର ଆଜାଦ ମୈଦାନରେ ଯେତେବେଳେ ଦୁଇଜଣ କୁନି ପୁଅ ୬୬୪ ରନର ବିଶାଳ ପାର୍ଟନରସିପ୍ କରିଥିଲେ, ସାରା ଦୁନିଆ ଭାବିଥିଲା କ୍ରିକେଟ ଜଗତକୁ ଦୁଇଟି ଅମୂଲ୍ୟ ରତ୍ନ ମିଳିଗଲେ । ଜଣେ ଥିଲେ 'କ୍ରିକେଟର ଭଗବାନ' ସଚିନ ତେନ୍ଦୁଲକର ଏବଂ ଅନ୍ୟଜଣେ ତାଙ୍କର ଅନ୍ତରଙ୍ଗ ବନ୍ଧୁ ବିନୋଦ କାମ୍ବଲି ।
ଆଶ୍ଚର୍ଯ୍ୟର କଥା ହେଉଛି, କ୍ୟାରିୟରର ଆରମ୍ଭ ସମୟରେ କାମ୍ବଲିଙ୍କ ବ୍ୟାଟ୍ ସଚିନଙ୍କ ଠାରୁ ବି ଅଧିକ ଗର୍ଜୁଥିଲା । ମାତ୍ର ୨୧ ବର୍ଷ ବୟସରେ ଦୁଇଟି କ୍ରମାଗତ ଦ୍ୱିଶତକ ହାସଲ କରି ସେ ବିଶ୍ୱ କ୍ରିକେଟରେ ହଇଚଇ ସୃଷ୍ଟି କରିଥିଲେ । ପରିସଂଖ୍ୟାନ କହେ, ନିଜର ପ୍ରଥମ କିଛି ଟେଷ୍ଟ ମ୍ୟାଚରେ କାମ୍ବଲିଙ୍କ ହାରାହାରି ଏବଂ ରନ୍ କରିବାର ଗତି ସଚିନଙ୍କ ଠାରୁ ମଧ୍ୟ ଅଧିକ ଥିଲା । ଲୋକେ କହୁଥିଲେ, କାମ୍ବଲି ହେଉଛନ୍ତି ସେହି ଜାଦୁଗର ଯିଏ କ୍ରିକେଟର ସବୁ ରେକର୍ଡ ଭାଙ୍ଗିଦେବେ।

Advertisment

କିନ୍ତୁ କୁହାଯାଏ ନା, "ସଫଳତା ପାଇବା ଯେତିକି କଷ୍ଟ, ତାକୁ ବଜାୟ ରଖିବା ତା'ଠାରୁ ଅଧିକ କଷ୍ଟ"। ଯେଉଁ ସମୟରେ ସଚିନ ନିଜର ଶୃଙ୍ଖଳା ଏବଂ କଠିନ ପରିଶ୍ରମ ବଳରେ ଶିଖର ଛୁଉଁଥିଲେ, ସେହି ସମୟରେ କାମ୍ବଲି ନିଜର ରଙ୍ଗୀନ ଜୀବନଶୈଳୀ, ବିଳାସପୂର୍ଣ୍ଣ ଶଉକ ଏବଂ ବିବାଦ ଭିତରେ ହଜିଯାଇଥିଲେ।

ଆଜି ଆସନ୍ତୁ ଜାଣିବା କିଭଳି ଜଣେ ଅସାଧାରଣ ପ୍ରତିଭାବାନ ଖେଳାଳି କ୍ୟାରିୟରର ଶୀର୍ଷରୁ ସିଧା ଶୂନ୍ୟକୁ ଖସିପଡ଼ିଲେ ଏବଂ କେଉଁ ସେହି ମାମଲା ଯେଉଁଥିରେ ସେ ଆଜି ବି ସଚିନଙ୍କ ଠାରୁ ଆଗରେ ରହିଛନ୍ତି...।

ଆଜି ଭାରତୀୟ କ୍ରିକେଟ୍ ଦଳର ଅନ୍ୟତମ ଉଜ୍ଜ୍ୱଳ ତାରକା ଭାବରେ ପରିଚିତ ବିନୋଦ କାମ୍ବଲି ଆଜି ୫୩ ବର୍ଷରେ ପଦାର୍ପଣ କରିଛନ୍ତି । ଦିନେ ଏକ ଅସାଧାରଣ ପ୍ରତିଭା ଭାବରେ ପରିଚିତ କାମ୍ବଲିଙ୍କ ଜୀବନ ବର୍ତ୍ତମାନ ଚମକ-ଧମକଠାରୁ ଦୂରେଇ ଯାଇଛି । ୧୮ ଜାନୁଆରୀ ୧୯୭୨ରେ ମୁମ୍ବାଇରେ ଜନ୍ମଗ୍ରହଣ କରିଥିଲେ ବିନୋଦ କାମ୍ୱଲି । ଆଜି ତାଙ୍କ ଜନ୍ମଦିନ ଅବସରରେ ଆଜି ଆମେ ତାଙ୍କର ଏକ ଏପରି ରେକର୍ଡ ବିଷୟରେ କହିବାକୁ ଯାଉଛୁ, ଯେଉଁଥିରେ ସେ ତାଙ୍କ ବନ୍ଧୁ ତଥା ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କୁ ମଧ୍ୟ ପଛରେ ପକାଇ ଦେଇଛନ୍ତି ।

ଆହୁରି ପଢ଼ନ୍ତୁ... ଅଷ୍ଟ୍ରେଲିଆ ଗସ୍ତ ଲାଗି ଭାରତୀୟ ମହିଳା ଦଳ ଘୋଷିତ: ଟ୍ବେଣ୍ଟି-୨୦ ଦଳକୁ ଫେରିଲେ ଶ୍ରୀୟଙ୍କା

କାମ୍ବଲି ଭାରତ ପାଇଁ ମାତ୍ର ୧୭ଟି ଟେଷ୍ଟ ଖେଳିଛନ୍ତି ଏବଂ ଏଥିରେ ୫୪.୨୦ ହାରରେ ୧୦୮୪ ରନ୍ ସଂଗ୍ରହ କରିଛନ୍ତି । ଏହି ସମୟ ମଧ୍ୟରେ ସେ ଚାରୋଟି ଶତକ ଏବଂ ତିନୋଟି ଅର୍ଦ୍ଧଶତକ ହାସଲ କରିବାରେ ସଫଳ ହୋଇଥିଲେ। ସେ ଭାରତ ପକ୍ଷରୁ ଦ୍ରୁତତମ ଏକ ହଜାର ଟେଷ୍ଟ ରନ୍ ପୂରଣ କରିଥିଲେ ଏବଂ ଏଥିପାଇଁ ସେ ମାତ୍ର ୧୪ଟି ଇନିଂସ ଖେଳିଥିଲେ। ଏହା ଏପରି ଏକ ରେକର୍ଡ ଯାହାକୁ ଆଜି ପର୍ଯ୍ୟନ୍ତ ସଚିନଙ୍କ ସମେତ କୌଣସି ଭାରତୀୟ ବ୍ୟାଟର ଭାଙ୍ଗି ପାରିନାହାନ୍ତି । ତାଙ୍କର ଏହି ରେକର୍ଡ ଭାଙ୍ଗିବା ପାଖାପାଖି ଯଶସ୍ୱୀ ଜୈସୱାଲ ପହଞ୍ଚିଥିଲେ, କିନ୍ତୁ ସେ ମଧ୍ୟ ଏକ ହଜାର ରନ୍ କରିବା ପାଇଁ ୧୬ଟି ଇନିଂସ ନେଇଥିଲେ ।

ମାତ୍ର ୨୧ ବର୍ଷ ବୟସରେ ଦ୍ୱିଶତକ ଏବଂ ୨ଟି ଶତକ ମାରିଥିବା କାମ୍ବଲି ଟିକେ ଜିଦିଆ ସ୍ୱଭାବର ଥିଲେ, ଏହା ସହିତ ମଦ ସହିତ ମଧ୍ୟ ତାଙ୍କର ସମ୍ପର୍କ ରହିଥିଲା । ତାଙ୍କର ଏହି ସ୍ୱଭାବ ଏବଂ ନିଶା ପାଇଁ ତାଙ୍କ କ୍ରିକେଟ୍ କ୍ୟାରିୟର ବେଶି ଦିନ ଚାଲିପାରିଲା ନାହିଁ । ଦିନିକିଆରେ ଏହି ବ୍ୟାଟର ୧୦୪ଟି ମ୍ୟାଚରେ ୨୪୭୭ ରନ୍ କରିଛନ୍ତି, ଯେଉଁଠାରେ ତାଙ୍କର ହାର ୩୨.୫୯ ରହିଥିଲା । ଏଥିରେ ଦୁଇଟି ଶତକ ଏବଂ ୧୪ଟି ଅର୍ଦ୍ଧଶତକ ଅନ୍ତର୍ଭୁକ୍ତ ରହିଛି । ସେ ଶେଷଥର ପାଇଁ ୨୦୦୦ ମସିହାରେ ଭାରତ ପାଇଁ ଦିନିକିଆ ମ୍ୟାଚ୍ ଖେଳିଥିଲେ ।