ପିଲାଙ୍କୁ ଭରସା ଭଙ୍ଗା ବାଉଁଶ ସେତୁ,  ୫ କିଲୋମିଟର ବୁଲି ଯାଉଛନ୍ତି ବିଦ୍ୟାଳୟ

କନକ ବ୍ୟୁରୋ: ଗମନା ଗମନ ପାଇଁ ଗାଁରେ ତିଆରି ହୋଇଥିଲା ବାଉଁଶ ସେତୁ । ହେଲେ ପାଣିରେ ଭାସିଗଲା ସେତୁ । କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ଖଡିଅଣ୍ଟା ଗାଁର  ଗୋବରୀ ନଦୀରେ ତିଆରି ହୋଇଥିଲା ବ୍ରିଜ୍ । ଦିର୍ଘଦିନ ଦାବି ପରେ ଏହି ବାଉଁଶ ସେତୁ କରାଯାଇଥିଲା। ଖଡ଼ିଅଣ୍ଟା ସହିତ ଆଖପାଖ ଅଞ୍ଚଳର  ଛାତ୍ର ଛାତ୍ରୀଙ୍କଠାରୁ ନେଇ ଗାଁ ର ଲୋକ ଏହି ବାଉଁଶ ସେତୁ ଦେଇ ନଦୀ ଆରପଟକୁ ଯାଇଥାନ୍ତି । ହେଲେ ସେତୁଟି ଏବେ ଭାଙ୍ଗିଯାଇଥିବା ବେଳେ କାହାର ନଜର ପଡୁନି ।

ଭଙ୍ଗା ପୋଲ ଯୋଗୁ ପିଲାମାନେ ପ୍ରା ୫ କିଲୋମିଟର ବୁଲି ବୁଲି ଯାଉଛନ୍ତି । ଏନେଇ ଅଭିଯୋଗ କରିଥିଲେ ବି ଶୁଣିବାକୁ ଯେମିତି କେହିନାହିଁ  । ବାଉଁଶ ସେତୁ ଭାଙ୍ଗିଯିବା ଫଳରେ ଖଡ଼ିଅଣ୍ଟା, ସୁଗଲ, ଦତ୍ତପୁର, ରଡିଆ ଗାଁର ଲୋକମାନେ ଅନେକ  ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରାୟ ୩ ମାସ ହେବ ସେତୁଟି ଭାଙ୍ଗି ଯାଇଥିବା ବେଳେ ଆଜିପର୍ଯ୍ୟନ୍ତ ଗ୍ରାମ ପଂଚାୟତ ଏହାର ମରାମତି କରୁନଥିବାର ଅଭିଯୋଗ କରିଛନ୍ତି ଖଡ଼ିଅଣ୍ଟା ଗ୍ରାମବାସୀ । ଭଙ୍ଗା ଭାଉଁଶ ସେତୁକୁ ତୁରନ୍ତ ମରାମତି କରିବାକୁ ଜିଲ୍ଲା ପ୍ରଶାସନ ନିକଟରେ ଦାବି କରିଛନ୍ତି ଖଡିଅଣ୍ଟା ଗ୍ରାମବାସି ଓ ଛାତ୍ର ଛାତ୍ରୀ ।