କନକ ବ୍ୟୁରୋ: ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଜଣେ ୧୩ ବର୍ଷୀୟ ବାଳକ କାବୁଲରୁ ଏକ ବିମାନର ଲ୍ୟାଣ୍ଡିଂ ଗିଅରରେ ଲୁଚି ଭାରତ ପହଞ୍ଚିଥିଲା । ଘଟଣାଟି ସେପ୍ଟେମ୍ବର ୨୧ ତାରିଖ ସକାଳ ପ୍ରାୟ ୧୧:୧୦ ସମୟରେ ଘଟିଥିଲା ।  KAM ଏୟାରଲାଇନ୍ସର ବିମାନ ଦିଲ୍ଲୀ ବିମାନବନ୍ଦରରେ ଅବତରଣ କରିଥିଲା। ବିମାନ ସୁରକ୍ଷା କର୍ମଚାରୀମାନେ ପିଲାଟିକୁ ବିମାନ ନିକଟରେ ବୁଲୁଥିବାର ଲକ୍ଷ୍ୟ କରିଥିଲେ। ପଚରାଉଚରା କରିବା ପରେ ସେମାନେ ଜାଣିବାକୁ ପାଇଲେ ଯେ ପିଲାଟି ଆଫଗାନିସ୍ତାନର କୁନ୍ଦୁଜରୁ ଆସିଥିଲା ଏବଂ ସେ ଲ୍ୟାଣ୍ଡିଂ ଗିଅରରେ ଲୁଚି ବିନା ଟିକେଟରେ ଆସିଥିଲା ।

Advertisment

ତଦନ୍ତ ସମୟରେ, ଏୟାରଲାଇନ୍ସର ସୁରକ୍ଷା ଏବଂ ଇଞ୍ଜିନିୟରିଂ ଦଳ ଲ୍ୟାଣ୍ଡିଂ ଗିଅର ପାଖରେ ଏକ ଛୋଟ ଲାଲ ସ୍ପିକର ମଧ୍ୟ ପାଇଥିଲେ । ଏହି ଆଶ୍ଚର୍ଯ୍ୟଜନକ ଘଟଣା ପରେ, ପିଲାଟିକୁ ତୁରନ୍ତ ପଚରାଉଚରା ପାଇଁ ସମ୍ପୃକ୍ତ ଏଜେନ୍ସିଗୁଡ଼ିକୁ ଅଣାଯାଇଥିଲା । ସମସ୍ତ ପ୍ରକ୍ରିୟା ସମାପ୍ତ କରିବା ପରେ, ତାକୁ ସେହି ଦିନ ଅପରାହ୍ନରେ KAM ଏୟାରଲାଇନ୍ସର ଏକ ଫେରସ୍ତ ବିମାନ (RQ-4402)ରେ କାବୁଲକୁ ଫେରାଇ ନିଆଯାଇଥିଲା ।

ଜୀବନ ଏବଂ ମୃତ୍ୟୁ ମଧ୍ୟରେ ୯୪ ମିନିଟର ଯୁଦ୍ଧ
ଏକ ରିପୋର୍ଟ ଅନୁଯାୟୀ, KAM ଏୟାରଲାଇନ୍ସର  ବିମାନଟି  ୯୪ ମିନିଟ୍‌ରେ କାବୁଲରୁ ଦିଲ୍ଲୀ ଯାତ୍ରା କରିଥିଲା । ଏହି ସମୟ ମଧ୍ୟରେ ଜଣେ ଆଫଗାନ କିଶୋର ବିମାନର ପଛ ଚକ ଉପରେ ଏକ ସଂକୀର୍ଣ୍ଣ ବଗିରେ ଲୁଚି ରହିଥିଲା । ବିମାନଟି ସକାଳ ୮:୪୬ ରେ କାବୁଲରୁ ଉଡାଣ ଭରିଥିଲା । ଏବଂ  ଦିଲ୍ଲୀର ଟର୍ମିନାଲ ୩ରେ ସକାଳ ୧୦:୨୦ରେ ଅବତରଣ କରିଥିଲା ।

ବିମାନର ହ୍ବିଲ୍‌ ବେଲ୍‌ରେ ବସି   ଯାତ୍ରା କରିବା ପ୍ରାୟ ଅସମ୍ଭବ ଏବଂ ବିପଦ ପୂର୍ଣ୍ଣ ।  କାରଣ ବିମାନ ଉଡ଼ାଣ ଭରିବା ମାତ୍ରେ, ଅମ୍ଳଜାନ ସ୍ତର ଦ୍ରୁତ ଗତିରେ ହ୍ରାସ ପାଏ ଏବଂ ତାପମାତ୍ରା ଶୂନ୍ୟତାଠାରୁ ବହୁତ ତଳେ ଖସିଯାଏ । ବିଶେଷଜ୍ଞମାନେ କୁହନ୍ତି ଯେ ଚକ ମଧ୍ୟରେ ଫସି ରହିଥିବା ବ୍ୟକ୍ତି ଚକ ଦ୍ୱାରା ଚାପି ହୋଇଗଲେ ମୃତ୍ୟୁ ମଧ୍ୟ ହୋଇପାରେ ।

ବିମାନ ଚାଳନା ବିଶେଷଜ୍ଞ କ୍ୟାପଟେନ ମୋହନ ରଙ୍ଗନାଥନ କୁହନ୍ତି ଯେ ଉଡ଼ାଣ ପରେ ଯେତେବେଳେ ଚକଗୁଡ଼ିକ ପଛକୁ ହଟିଯାଏ, ସେହି ସ୍ଥାନଟି ସମ୍ପୂର୍ଣ୍ଣ ଭାବରେ ବନ୍ଦ୍‌ ହୋଇଯାଏ । ଏହା ସମ୍ଭବ ଯେ ଜଣେ ଯାତ୍ରୀ ଭିତରେ ଏକ କୋଣରେ ଫସି କିଛି ସମୟ ପାଇଁ ବଞ୍ଚି ରହିଥାଇପାରନ୍ତି, କିନ୍ତୁ ୩୦,୦୦୦ ଫୁଟ ଉଚ୍ଚତାରେ ନିଶ୍ୱାସ ନେବା ଏବଂ ବଞ୍ଚିବା ପ୍ରାୟ ଅସମ୍ଭବ ।  ତେବେ ଏହି ୧୩ ବର୍ଷର ପିଲାଟି କିପରି ଚକରେ ବସି ଯାତ୍ରା କଲା ଆଉ ସୁରୁକ୍ଷିତ ପହଞ୍ଚିଲା ତାହା ଏବେ ସମସ୍ତୁଙ୍କୁ ଆଶ୍ଚର୍ଯ୍ୟ କରିଛି ।