କନକ ବ୍ୟୁରୋ : କେନ୍ଦ୍ର ସରକାରୀ କର୍ମଚାରୀମାନେ ଅଷ୍ଟମ ବେତନ କମିସନ ଲାଗୁ ହେବାକୁ ଉତ୍କଣ୍ଠାର ସହ ଅପେକ୍ଷା କରିଛନ୍ତି । ଏହି ନୂଆ ବେତନ ଆୟୋଗ ଲାଗୁ ହେଲେ କର୍ମଚାରୀଙ୍କ ଦରମାରେ ବଡ଼ ଧରଣର ବୃଦ୍ଧି ହେବାର ସମ୍ଭାବନା ରହିଛି । ଅଷ୍ଟମ ବେତନ ଆୟୋଗ ୨୦୨୬ ମସିହା ଶେଷ ଭାଗରେ କିମ୍ବା ୨୦୨୭ ଆରମ୍ଭରେ ଲାଗୁ ହେବାର ସମ୍ଭାବନା ରହିଛି ।  ସାଧାରଣତଃ ପ୍ରତି ୧୦ ବର୍ଷରେ ନୂଆ ବେତନ ଆୟୋଗ ଗଠନ କରାଯାଇଥାଏ ଏବଂ ଏହାର ସୁପାରିଶ ଲାଗୁ ହେବାକୁ ପ୍ରାୟ ଦେଢ଼ ବର୍ଷ ସମୟ ଲାଗିଥାଏ । ସପ୍ତମ ବେତନ ଆୟୋଗର କାର୍ଯ୍ୟକାଳ ୩୧ ଡିସେମ୍ବର ୨୦୨୫ରେ ଶେଷ ହେଉଛି । ତେଣୁ ନୂଆ ଆୟୋଗ ୧ ଜାନୁଆରୀ ୨୦୨୬ରୁ ଲାଗୁ ହେବାର ଆଶା କରାଯାଉଛି । ସରକାର ବର୍ତ୍ତମାନ ଏହାର ଟର୍ମ୍ସ ଅଫ୍ ରେଫରେନ୍ସ ଚୂଡ଼ାନ୍ତ କରିବା ପ୍ରକ୍ରିୟାରେ ଅଛନ୍ତି ଏବଂ ଏପର୍ଯ୍ୟନ୍ତ ଆୟୋଗର ଅଧ୍ୟକ୍ଷ ଓ ସଦସ୍ୟଙ୍କ ନିଯୁକ୍ତି ହୋଇନାହିଁ । କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ସଂସଦରେ କହିଛନ୍ତି ଯେ ଏନେଇ ବିଭିନ୍ନ ପକ୍ଷଙ୍କ ସହ ଆଲୋଚନା ଜାରି ରହିଛି ।

କେତେ ବଢ଼ିପାରେ ଦରମା?

Advertisment

ସବୁଠାରୁ ବଡ଼ ପ୍ରଶ୍ନ ହେଉଛି କର୍ମଚାରୀଙ୍କ ଦରମା କେତେ ବଢ଼ିବ। ସୂଚନା ଅନୁସାରେ , କର୍ମଚାରୀଙ୍କ ମୂଳ ଦରମାରେ ୩୦ରୁ ୩୪ ପ୍ରତିଶତ ପର୍ଯ୍ୟନ୍ତ ବୃଦ୍ଧି ହେବାର ଅନୁମାନ କରାଯାଉଛି । ବର୍ତ୍ତମାନ ଥିବା ସର୍ବନିମ୍ନ ମୂଳ ଦରମା ୧୮,୦୦୦ ଟଙ୍କାରୁ ବୃଦ୍ଧି ପାଇ ପ୍ରାୟ ୩୦,୦୦୦ ଟଙ୍କା ହୋଇପାରେ । ଫିଟମେଣ୍ଟ ଫ୍ୟାକ୍ଟର ୧.୮ ରହିପାରେ । ତେବେ କିଛି ରିପୋର୍ଟରେ ଏହା ୨.୮୬ ପର୍ଯ୍ୟନ୍ତ ଯାଇପାରେ ବୋଲି ମଧ୍ୟ କୁହାଯାଉଛି, ଯଦି ଏହା ହୁଏ ତେବେ ସର୍ବନିମ୍ନ ମୂଳ ଦରମା ୫୧,୪୮୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇପାରେ । ସପ୍ତମ ବେତନ ଆୟୋଗରେ ଫିଟମେଣ୍ଟ୍‌ ଫ୍ୟାକ୍ଟର ୨.୫୭ ଥିଲା ।

ଏହି ବେତନ ବୃଦ୍ଧି ଦ୍ୱାରା ପ୍ରାୟ ୫୦ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଏବଂ ୬୫ ଲକ୍ଷ ପେନସନ୍‌ଭୋଗୀ ଉପକୃତ ହେବେ । ଏହା ସରକାରୀ ରାଜକୋଷ ଉପରେ ୨.୪ରୁ ୩.୨ ଲକ୍ଷ କୋଟି ଟଙ୍କାର ଅତିରିକ୍ତ ବୋଝ ପକାଇପାରେ, ଯାହା ଦେଶର ଜିଡିପିର ପ୍ରାୟ ୦.୬ରୁ ୦.୮ ପ୍ରତିଶତ ହେବ । ଦରମା ବୃଦ୍ଧି ଯୋଗୁଁ ବଜାରରେ ଚାହିଦା ବଢ଼ିବ ଏବଂ ଲୋକଙ୍କ ସଞ୍ଚୟ ଓ ନିବେଶ ମଧ୍ୟ ବୃଦ୍ଧି ପାଇବ ବୋଲି ଆଶା କରାଯାଉଛି ।