ରାଗିଛନ୍ତି କି ପିତୃପୁରୁଷ ? ୭ ସଂକେତ ଦେଖିଲେ ହୁଅନ୍ତୁ ସତର୍କ , ଅଣଦେଖା ନ କରିବାକୁ କୁହେ ଗରୁଡ଼ ପୁରାଣ

କନକ ବ୍ୟରୋ : ପିତୃପକ୍ଷ ହେଉଛି ପୂର୍ବପୁରୁଷମାନଙ୍କୁ ସ୍ମରଣ କରିବା ଏବଂ ସେମାନଙ୍କର ଆଶୀର୍ବାଦ ପାଇବାର ସମୟ । ଯାହା ବର୍ତ୍ତମାନ ଚାଲିଛି । ଏହି ସମୟରେ ପିତୃପୁରୁଷମାନେ ନିଜ ବଂଶଜଙ୍କ ଉପରେ ଦୃଷ୍ଟି ପକାଇବାକୁ ଆସିଥା’ନ୍ତି ବୋଲି କୁହାଯାଏ, କିନ୍ତୁ ଅନେକ ଥର ସେମାନେ ସଂକେତ ମାଧ୍ୟମରେ ଏହା ଦର୍ଶାଇଥା’ନ୍ତି ଯେ ସେମାନେ ସନ୍ତୁଷ୍ଟ ନୁହଁନ୍ତି । ଧର୍ମଶାସ୍ତ୍ର ଏବଂ ଗରୁଡ଼ ପୁରାଣ ଅନୁସାରେ ଯଦି ଘରେ କିଛି ବିଶେଷ ଘଟଣା ବାରମ୍ବାର ଘଟେ, ତେବେ ବୁଝିବାକୁ ହେବ ଯେ ପିତୃପୁରୁଷମାନେ କ୍ରୋଧିତ ଅଛନ୍ତି ଏବଂ ସେମାନଙ୍କୁ ଶ୍ରାଦ୍ଧ କିମ୍ବା ତର୍ପଣର ଆବଶ୍ୟକତା ଅଛି । ତେବେ ଆସନ୍ତୁ ଜାଣିବା ପିତୃଲୋକଙ୍କ ସହ ଜଡ଼ିତ ସେହି ୭ଟି ସଙ୍କେତ ଯାହାକୁ ଅଣଦେଖା କରିବା ଉଚିତ୍ ନୁହେଁ ।

କାଉମାନଙ୍କର ଲଗାତାର କାଆ-କାଆ ଶବ୍ଦ   

ହିନ୍ଦୁ ପରମ୍ପରାରେ କାଉକୁ ପିତୃପୁରୁଷଙ୍କ ପ୍ରତିନିଧି ବୋଲି କୁହାଯାଏ । ଯଦି ପିତୃପକ୍ଷରେ ଘରର ଛାତ କିମ୍ବା ଅଗଣାରେ କାଉମାନଙ୍କର ବାରମ୍ବାର ଆଗମନ ଏବଂ କାଆ-କାଆ ଶବ୍ଦ କରିବା ଆରମ୍ଭ ହୁଏ, ତେବେ ଏହା ଏକ ସଙ୍କେତ ଯେ ପିତୃପୁରୁଷମାନେ ଭୋଜନ ଏବଂ ତର୍ପଣ ପାଇଁ ଅପେକ୍ଷା କରିଛନ୍ତି ।

ସ୍ୱପ୍ନରେ ପିତୃପୁରୁଷଙ୍କୁ ଦେଖିବା  

ଗରୁଡ଼ ପୁରାଣ ଅନୁସାରେ ଯଦି ପୂର୍ବପୁରୁଷମାନେ ସ୍ୱପ୍ନରେ ବାରମ୍ବାର ଦେଖାଯାଆନ୍ତି ଏବଂ ଭୋଜନ କିମ୍ବା ଜଳ ମାଗନ୍ତି ତେବେ ଏହା ଏକ ସଙ୍କେତ ଯେ ସେମାନେ ତୃପ୍ତ ହୋଇନାହାଁନ୍ତି । ଏହା ଏକ ସ୍ପଷ୍ଟ ବାର୍ତ୍ତା ଯେ ସେମାନଙ୍କୁ ତର୍ପଣର ଆବଶ୍ୟକତା ଅଛି ।

ଅଚାନକ ଆର୍ଥିକ ସଙ୍କଟର ଆଗମନ  

ଯଦି ପରିବାରରେ ବିନା କାରଣରେ ଧନହାନି ହୁଏ କିମ୍ବା ହଠାତ୍ ଆର୍ଥିକ ସଙ୍କଟ ବଢ଼ିଯାଏ, ତେବେ ଏହାକୁ ମଧ୍ୟ ପିତୃପୁରୁଷଙ୍କ ଅସନ୍ତୋଷ ବୋଲି କୁହାଯାଏ । ମାନ୍ୟତା ଅନୁସାରେ ଅସନ୍ତୁଷ୍ଟ ପିତୃପୁରୁଷମାନେ ମା’ଲକ୍ଷ୍ମୀଙ୍କ କୃପାରେ ବାଧା ସୃଷ୍ଟି କରନ୍ତି ।

ଲଗାତାର ରୋଗ ବଢ଼ିବା  

ଯଦି ଘରେ ସଦସ୍ୟମାନେ ବାରମ୍ବାର ଅସୁସ୍ଥ ହୁଅନ୍ତି ଏବଂ ଚିକିତ୍ସାରେ ମଧ୍ୟ ଆରାମ ନ ମିଳେ ତେବେ ଏହା ମଧ୍ୟ ଏକ ସଙ୍କେତ ଭାବରେ ବିବେଚନା କରାଯାଏ । ଶାସ୍ତ୍ର କୁହେ ଯେ ଅସନ୍ତୁଷ୍ଟ ପିତୃପୁରୁଷମାନେ ନିଜ ବଂଶଧରମାନଙ୍କୁ ରୋଗ କିମ୍ବା ଦୁଃଖ ମାଧ୍ୟମରେ ସଙ୍କେତ ଦିଅନ୍ତି ।

ଦୀପ ଆପେ ଆପେ ଲିଭିଯିବା  

ଯଦି ଘରର ମନ୍ଦିରରେ କିମ୍ବା ଶ୍ରାଦ୍ଧକର୍ମ ସମୟରେ ଜଳାଯାଇଥିବା ଦୀପ ବିନା କାରଣରେ ବାରମ୍ବାର ଲିଭିଯାଏ, ତେବେ ଏହାକୁ ମଧ୍ୟ ପିତୃପୁରୁଷମାନଙ୍କ ଅସନ୍ତୋଷର ସଙ୍କେତ ଭାବରେ ଦେଖାଯାଏ ।  

ପୂଜା-ପାଠରେ ବାଧା ଆସିବା 

ବାରମ୍ବାର ପୂଜା ସମୟରେ ଅସୁବିଧା ଆସିବା କିମ୍ବା ସାମଗ୍ରୀ ହଜିଯିବାକୁ ଶାସ୍ତ୍ରରେ ପିତୃପୁରୁଷମାନଙ୍କର ଇସାରା ବୋଲି କୁହାଯାଏ । ସେମାନେ ନିଜ ବଂଶଧରମାନଙ୍କୁ ମନେ ପକାନ୍ତି ଯେ ସେମାନଙ୍କର ଶ୍ରାଦ୍ଧ ସମ୍ପୂର୍ଣ୍ଣ ହୋଇନାହିଁ ।

ତୁଳସୀ ଗଛ ଶୁଖିଯିବା 

ଯଦି ଘରର ଅଗଣାରେ ତୁଳସୀ ଗଛ ହଠାତ୍ ଶୁଖିବାକୁ ଲାଗେ କିମ୍ବା ମନ୍ଦିରରେ ରଖାଯାଇଥିବା ଫୁଲ ଶୀଘ୍ର ମଉଳି ଯାଏ, ତେବେ ଏହା ମଧ୍ୟ ପିତୃପୁରୁଷମାନଙ୍କ ଅସନ୍ତୋଷର ସଙ୍କେତ ଅଟେ । ଏହାକୁ ବହୁତ ଗମ୍ଭୀରତାର ସହିତ ନେବା ଉଚିତ୍ । ତେବେ ଶାସ୍ତ୍ର କୁହେ ଯେ ଯଦି ଏହି ସଙ୍କେତଗୁଡ଼ିକ ବାରମ୍ବାର ଦେଖାଯାଏ ତେବେ ପିତୃପୁରୁଷମାନଙ୍କୁ ତର୍ପଣ କରିବା ଉଚିତ୍ । ବ୍ରାହ୍ମଣ ଭୋଜନ, ଗୋ ଦାନ ଏବଂ ଜଳ ତର୍ପଣ ଦ୍ୱାରା ପିତୃପୁରୁଷମାନେ ପ୍ରସନ୍ନ ହୁଅନ୍ତି ଏବଂ ଘରେ ସୁଖ-ସମୃଦ୍ଧି ଫେରିଆସେ ।