ନିଆଁର ଆଁରେ ଆମେରିକା : ୩୧ ହଜାର ଲୋକଙ୍କୁ ଘର ଛାଡ଼ିବାକୁ ନିର୍ଦ୍ଦେଶ

କନକ ବ୍ୟୁରୋ: ଦିନ ଗଡୁଛି, ଆମେରିକାର ନିଆଁ ଭୟଙ୍କର ରୂପ ନେଉଛି । ସ୍ଥିତି ତ ଏମିତି ହେଲାଣି ଯେ ଲୋକେ ଘରୁ ବାହାରିବାକୁ ବି ଡରିଲେଣି । ଖାସ କରି ଆମେରିକାର ଲସଆଞ୍ଜେଲସ ସହର ସର୍ବାଧିକ କ୍ଷତି ହୋଇଛି । ବୁଧବାର ରାତିରୁ ସହରର ପୁଣି ଏକ ନୂଆ ଜଙ୍ଗଲକୁ ନିଆଁ ବ୍ୟାପିଛି । ଯାହା ପ୍ରଶାସନର ମୁଣ୍ଡବ୍ୟଥାର କାରଣ ସାଜିଛି । ଗୋଟିଏ ପଟେ ଅଗ୍ନିଶମ ବାହିନୀ ଦିନରାତି ଏକ କରି ନିଆଁ ଲିଭା କାର୍ଯ୍ୟରେ ସାମିଲ ଅଛି, ଅନ୍ୟପଟେ ଗୋଟିଏ ପରେ ଗୋଟିଏ ଜଙ୍ଗଲକୁ ନିଆଁ ବ୍ୟାପିବାରେ ଲାଗିଛି । ଆମେରିକାର ଗଣମାଧ୍ୟମର ରିପୋର୍ଟ ଅନୁସାରେ,ମାତ୍ର କିଛି ସେକେଣ୍ଡରେ ୩୨ ଶହ ହେକ୍ଟର ପର୍ଯ୍ୟନ୍ତ ଜଙ୍ଗଲ ନିଆଁ ବ୍ୟାପିଯାଉଛି । ଯେହେତୁ ପବନର ବେଗ ଅଧିକ ରହିଛି । ତେଣୁ ଖୁବକମ୍‌ ସମୟ ମଧ୍ୟରେ ନିଆଁ ଜଙ୍ଗଲରେ ବ୍ୟାପିଯାଉଛି । 

ଆମେରିକାରେ ନିଆଁ ଜଳୁଛି
ଲସଆଞ୍ଜେଲସ୍‌ ସ୍ଥିତି ସଙ୍ଗୀନ
୩୧ ହଜାର ଲୋକଙ୍କୁ ଘର ଛାଡ଼ିବାକୁ ନିର୍ଦ୍ଦେଶ
ସ୍ଥାନୀୟ ଲୋକଙ୍କ ପାଇଁ ଜାରି ହେଲା ଜରୁରୀକାଳୀନ ଆର୍ଲଟ
ନିଆଁ ବ୍ୟାପୁଥିବାରୁ ଘର ଛାଡ଼ିବାକୁ ନିର୍ଦ୍ଦେଶ

୧୫ ଦିନ ହେଲାଣି ଆମେରିକାରେ ନିଆଁ ଲାଗିଛି । ପ୍ରଶାସନର ପ୍ରାଣମୂର୍ଚ୍ଛା ଉଦ୍ୟମ ପରେ ବି ନିଆଁ ଆୟତ୍ତ ହେଉନି । ପରିସ୍ଥିତିକୁ ନଜରରେ ରଖି, ଲସଆଞ୍ଜେଲସରେ ଜରୁରୀକାଳୀନ ଆଲର୍ଟ ଜାରି କରାଯାଇଛି । ପ୍ରଶାସନ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ନିଆଁର ଭୟାଭୟତା ଦେଖି ଲୋକଙ୍କୁ ଘର ଛାଡ଼ିବାକୁ ନିର୍ଦ୍ଦେଶ ଦିଆଯାଇଛି । କେଉଁ ମୁହୂର୍ତ୍ତରେ ବି ଘର ଭିତରେ ନିଆଁ ପଶିଯିବ ତାହା କହିବା ମୁସ୍କିଲ । ତେଣୁ ନିଆଁ ଘରେ ପହଞ୍ଚିବା ପୂର୍ବରୁ ଆପଣ ଘର ଛାଡିଦିଅନ୍ତୁ ବୋଲି ପ୍ରଶାସନ କହିଛି ।

ନିଆଁ ଲିଭା କାମରେ ରୋବର୍ଟ
ଆଖି ଆଗରେ ଛାରଖାର ହେଉଛି କୋଟି କୋଟି ସମ୍ପତ୍ତି

ଆମେରିକାରେ ଲାଗିଥିବା ନିଆଁକୁ ଦେଖି ପ୍ରଶାସନ ମୁଣ୍ଡ କାମ କରୁନଥିବା ସ୍ଥିତିରେ । ପୂର୍ବରୁ ଏତେ ଭୟଙ୍କର ନିଆଁ କେବେ ଦେଖିବାକୁ ମିଳିନଥିଲା । ହେଲେ ଏବେର ନିଆଁ ପୁରା ଆମେରିକାରେ ହା ହା କାର ସ୍ଥିତି କରିଦେଇଛି । ନିଆଁର ମାତ୍ରା ଏତେ ଅଧିକ ରହିଛି ଯେ ଉଭୟ ଆକାଶ ଓ ସ୍ଥଳଭାଗରୁ ନିଆଁ ଲିଭା କାର୍ଯ୍ୟ ଚାଲିଛି ସତ ହେଲେ ନିଆଁ ଲିଭୁନି । ନିଆଁ ଧାସରେ ମଣିଷ ପଶିବା ସମ୍ଭବ ହେଉନଥିବାରୁ ରୋବର୍ଟ ମଧ୍ୟ ନିଆଁ ଲିଭା କାର୍ଯ୍ୟରେ ସାମିଲ ହୋଇଛି । 

ନିଆଁର ଆଁରେ ଆମେରିକା

ବିକଶିତ ରାଷ୍ଟ୍ର ଆମେରିକା । କିନ୍ତୁ ଗତ କିଛିଦନ ତଳେ ଲାଗିଥିବା ନିଆଁ ପାଇଁ ଆମେରିକା ପ୍ରଶାସନ ଚିନ୍ତାରେ । କେମିତି ନିଆଁକୁ ଆୟତ୍ତ କରାଯିବ ସେନେଇ ଯେତେ ରଣନୀତି ପ୍ରସ୍ତୁତି କଲେ ବି ନିଆଁ ଲିଭୁନି । ବର୍ତ୍ତମାନ ସୁଦ୍ଧା ନିଆଁରେ ୨୫ରୁ ଉର୍ଦ୍ଧ୍ବ ଲୋକଙ୍କ ଜୀବନ ଯାଇଥିବା ବେଳେ ଅନେକ ବ୍ୟକ୍ତି ନିଖୋଜ ଅଛନ୍ତି । ତେବେ ସେମାନେ ଜୀବିତ କି ମୃତ ସେନେଇ କାହା ପାଖରେ ବି କିଛି ସୂଚନା ନାହିଁ । ଏପଟେ, ନିଆଁ କିନ୍ତୁ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ବ୍ୟାପିବାରେ ଲାଗିଛି । ଏମିତି ସ୍ଥିତିରେ ଆମେରିକା ସରକାର କେମିତି ନିଆଁକୁ ଆୟତ୍ତ କରୁଛନ୍ତି, କେମିତି ଲୋକଙ୍କୁ ସୁରକ୍ଷିତ ରଖୁଛନ୍ତି ତାହା ଦେଖିବାକୁ ବାକି ରହିଲା ।