ନିର୍ମାଣର ବର୍ଷେ ନପୁରୁଣୁ ଭୁଶୁଡିବାକୁ ବସିଲାଣି ୩୦ ଲକ୍ଷର ପୋଲ; ଭାଙ୍ଗିଗଲାଣି ଗାର୍ଡୱାଲ୍

କନକ ବ୍ୟୁରୋ : ନିର୍ମାଣର ବର୍ଷେ ନପୁରୁଣୁ ଭୁଶୁଡିବାକୁ ବସିଲାଣି ୩୦ ଲକ୍ଷର ପୋଲ । ଯାତାୟତ କରିବାକୁ ଭୟ କରୁଛନ୍ତି ଲୋକେ । ଦୀର୍ଘ ଦିନର ଦାବି ପରେ ୬ ଖଣ୍ଡ ଗ୍ରାମର ଲୋକଙ୍କ ଯାତାୟତ ପାଇଁ ନିର୍ମାଣ ହୋଇଥିଲା ପୋଲ । ନିମ୍ନମାନର କାର୍ଯ୍ୟ ଯୋଗୁଁ ଅଳ୍ପ ଦିନରେ ଦୁର୍ବଳ ହୋଇପଡ଼ଥିବା ଅଭିଯୋଗ ହୋଇଛି ।

ବାଲେଶ୍ୱର ବସ୍ତା ବ୍ଲକ ବରୁଣଗଡ଼ିଆ ପଞ୍ଚାୟତ ମୁଣ୍ଡିମାରି ଗାଁକୁ ସଂଯୋଗ କରୁଥିବା ରାସ୍ତାର ପେଜଗଳା ଠାରେ ଡ୍ରେନେଜ ବିଭାଗ ପକ୍ଷରୁ ପୋଲ ତିଆରି ହୋଇଛି । ୨୦୨୨ରେ ୩୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହୋଇଛି । ୧୧ ମାସ ତଳେ ନିର୍ମାଣ ଶେଷ ହୋଇଥିବା ପୋଲ ଏବେ ଭଗ୍ନ ଅବସ୍ଥାରେ । ଅତ୍ୟନ୍ତ ନିମ୍ନମାନର କାର୍ଯ୍ୟ ଯୋଗୁଁ ଅନେକ ସ୍ଥାନରେ ଫାଟ ସୃଷ୍ଟି ହୋଇଛି । ସେଫ୍ଟି ଗାର୍ଡ ସବୁ ଭାଙ୍ଗି ଗଲାଣି । ଦେଖିଲେ ଭୟ ଲାଗୁଛି । କେତେବେଳେ ପୋଲଟି ଭୁଶୁଡି ପଡିବ, ଏହି ଆଶଙ୍କା ସ୍ଥାନୀୟ ଲୋକଙ୍କ ମନକୁ ଆସୁଛି ।

ଏହି ରାସ୍ତା ଉପରେ ୬ଟି ଗାଁର ଲୋକ ନିର୍ଭର କରନ୍ତି । ଆଗରୁ ଯାତାୟତ ପାଇଁ ରାସ୍ତା ଖଣ୍ଡିଏ ନଥିଲା । ବାରମ୍ବାର ଦାବି ପରେ ରାସ୍ତା ଓ ପୋଲ ନିର୍ମାଣ ହୋଇଥିଲା । ମାତ୍ର ବର୍ଷେ ନପୁରୁଣୁ ପୋଲର ଅବସ୍ଥା ଦେଖି, ସ୍ଥାନୀୟ ଲୋକେ ଠିକାଦାରଙ୍କୁ ଦାୟୀ କରିଛନ୍ତି । ବିଭାଗୀୟ ଅଧିକାରୀ କହିଛନ୍ତି, ପୋଲ ଉପରେ ଭାରିଯାନ ଯାତାୟତ କରିବାରୁ ଏଭଳି ଦୁର୍ବଳ ସ୍ଥିତି ସୃଷ୍ଟି ହୋଇଛି ।