କୁକୁର ଚାଟିଦେଲା , ଶିଶୁର ଜୀବନ ଗଲା ! କୁକୁର ଲାଳ ପାଲଟିଲା ଭୟଙ୍କର ଭୂତାଣୁ , ଡାକ୍ତର ଦେଲେ ଚେତାବନୀ

କନକ ବ୍ୟୁରୋ : ସୁପ୍ରିମକୋର୍ଟ ଦିଲ୍ଲୀ-ଏନସିଆରରେ ଥିବା ସମସ୍ତ ବୁଲା କୁକୁରଙ୍କୁ ରାସ୍ତାରୁ ହଟାଇ ଡଗ୍ ସେଲ୍ଟର ହୋମକୁ ପଠାଇବା ପାଇଁ ନିର୍ଦ୍ଦେଶ ଦେଇଥିଲେ, ଯାହାକୁ କୁକୁରପ୍ରେମୀ ବିରୋଧ କରୁଥିଲେ । କିନ୍ତୁ ଏହି ସମୟରେ ଏକ ଏପରି ହୃଦୟ ବିଦାରକ ଖବର ସାମ୍ନାକୁ ଆସିଛି ଯେ ସମସ୍ତେ ସ୍ତବ୍ଧ ହୋଇଯାଇଛନ୍ତି । କୁକୁର କାମୁଡ଼ିବା ଦ୍ୱାରା ହେଉଥିବା ବିପଦଜନକ ରୋଗ ଏବଂ ମୃତ୍ୟୁ ଖବର ଆପଣ ଅନେକ ଥର ଶୁଣିଥିବେ । କିନ୍ତୁ କୁକୁର କେବଳ ଚାଟିବା ଦ୍ୱାରା ଜଣେ ଦୁଇ ବର୍ଷର ନିରୀହ ଶିଶୁର ମୃତ୍ୟୁ ଖବର ସମସ୍ତଙ୍କୁ ଦୋହଲାଇ ଦେଇଛି । ବଦାୟୁଁର ସହସବାନ ଅଞ୍ଚଳରେ ସେତେବେଳେ ଶୋକର ଛାୟା ଖେଳିଯାଇଥିଲା, ଯେତେବେଳେ ଅଦନାନ ନାମକ ୨ ବର୍ଷର ଶିଶୁର ରେବିଜ୍‌ରେ ମୃତ୍ୟୁ ହୋଇଥିଲା । କୁକୁରଟି ପିଲାଟିକୁ କାମୁଡ଼ି ନଥିଲା, କେବଳ ତା'ର ପୁରୁଣା ଆଘାତକୁ ଚାଟିଥିଲା । କିନ୍ତୁ ଏହି ଅବହେଳା ଯୋଗୁଁ ଶିଶୁଟିର ଜୀବନ ଚାଲିଗଲା । କୁକୁରଟି ୧ ମାସ ପୂର୍ବେ ମହମ୍ମଦ ଅଦନାନର ଗୋଡ଼ର ଘା'କୁ ଚାଟିଥିଲା । ଯାହା ପରଠାରୁ ପିଲାଟି ପାଣିକୁ ଡରିବା ଏବଂ ପିଇବାକୁ ମନା କରିବା ଭଳି ଲକ୍ଷଣ ଦେଖାଦେଇଥିଲା, ଯାହାକୁ ହାଇଡ୍ରୋଫୋବିଆ କୁହାଯାଏ । ଶିଶୁଟିର ଅବସ୍ଥା ବିଗିଡ଼ିବାରୁ ତାକୁ ପରିବାର ହସ୍ପିଟାଲକୁ ନେଇ ଯାଇଥିଲେ , ଯେଉଁଠାରେ ପିଲାଟିର ଜୀବନ ଚାଲିଯାଇଥିଲା । ଏହି ଘଟଣା ପରେ ସମଗ୍ର ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ଏବଂ ଗାଁର ପ୍ରାୟ ୧୫ ରୁ ଅଧିକ ଲୋକଙ୍କୁ ସତର୍କତାମୂଳକ ପଦକ୍ଷେପ ସ୍ୱରୂପ ହସ୍ପିଟାଲରେ ପହଞ୍ଚି ସମସ୍ତଙ୍କୁ ରେବିଜ୍ ଇଞ୍ଜେକ୍ସନ ଦିଆଯାଇଛି । ଡାକ୍ତରୀ ଦଳ ଗାଁକୁ ଯାଇ ପରିସ୍ଥିତି ଯାଞ୍ଚ କରି ଲୋକଙ୍କୁ ସଚେତନ କରାଇଥିଲେ ଯେ କୁକୁର କାମୁଡ଼ିଲେ କିମ୍ବା ଆଘାତକୁ ଚାଟିଲେ ତୁରନ୍ତ ଆଘାତ ସ୍ଥାନକୁ ଧୋଇବା ଏବଂ ରେବିଜ୍ ଟିକା ନେବା ଜରୁରୀ ।

ଏହି ଘଟଣା ଉପରେ ବଦାୟୁଁ ଜିଲ୍ଲା ହସ୍ପିଟାଲର ମେଡିକାଲ ସୁପରିଟେଣ୍ଡେଣ୍ଟ ଡାକ୍ତର ପ୍ରଶାନ୍ତ ତ୍ୟାଗୀ କହିଛନ୍ତି ଯେ କୁକୁର କାମୁଡ଼ିବା କିମ୍ବା ଚାଟିବାକୁ କେବେ ବି ହାଲୁକା ଭାବେ ନେବା ଉଚିତ ନୁହେଁ, କାରଣ ଏହାଦ୍ୱାରା ରେବିଜ୍ ହେବାର ଆଶଙ୍କା ରହିଛି । କେବଳ କୁକୁର ନୁହେଁ, ବିଲେଇ ଏବଂ ମାଙ୍କଡ଼ କାମୁଡ଼ିଲେ ଏବଂ ଚାଟିଲେ ମଧ୍ୟ ତୁରନ୍ତ ରେବିଜ୍ ଟିକା ନେବା ଉଚିତ୍ ଏହାକୁ ଆଦୌ ଅଣଦେଖା କରିବା ଉଚିତ ନୁହେଁ । ରେବିଜ୍ ଏକ ଏପରି ରୋଗ ଯାହା ମସ୍ତିଷ୍କ ଏବଂ ସ୍ନାୟୁ ସିଷ୍ଟମକୁ ପ୍ରଭାବିତ କରିଥାଏ । ଏହି ରୋଗ ଭାଇରସ ଦ୍ୱାରା ହୋଇଥାଏ, ଯାହାର ନାମ ହେଉଛି ରାପ୍‌ଟୋ ଭାଇରସ । ପଶୁମାନଙ୍କ କାମୁଡ଼ିବା କିମ୍ବା ଚାଟିବା ଦ୍ୱାରା ଏହି ରୋଗ ମଣିଷମାନଙ୍କୁ ବ୍ୟାପିଥାଏ ଏବଂ ଏହା ଜୀବନ ପ୍ରତି ମଧ୍ୟ ବିପଦ ସୃଷ୍ଟି କରିପାରେ । ଏହା ସଂକ୍ରମିତ ପଶୁମାନଙ୍କ କାମୁଡ଼ିବା କିମ୍ବା ଆଞ୍ଚୁଡ଼ିବା ଦ୍ୱାରା ମଣିଷମାନଙ୍କୁ ବ୍ୟାପିଥାଏ । ସଂକ୍ରମିତ ପଶୁମାନଙ୍କ ମଧ୍ୟରେ ସାଧାରଣତଃ କୁକୁର, ବାଦୁଡ଼ି ଏବଂ ଜଙ୍ଗଲୀ ଜନ୍ତୁମାନେ ସାମିଲ୍ ହୋଇଥା’ନ୍ତି । କାମୁଡ଼ିବା କିମ୍ବା ଆଞ୍ଚୁଡ଼ିବା ବ୍ୟତୀତ, ଯଦି ସଂକ୍ରମିତ ପଶୁର ଲାଳ କୌଣସି ଖୋଲା ଘା' କିମ୍ବା ଆଖି, ନାକ ଏବଂ ପାଟି ବାଟ ଦେଇ ଶରୀର ଭିତରକୁ ଚାଲିଯାଏ ତେବେ ମଧ୍ୟ ଭାଇରସ ବ୍ୟାପିପାରେ ।

କୁକୁରର ଲାଳରେ ରେବିଜ୍ ଭାଇରସ ଥାଏ, ଯାହା ଘା' କିମ୍ବା ମ୍ୟୁକସ୍ ମେମ୍ବ୍ରେନ (ଆଖି, ପାଟି, ନାକ) ସହିତ ସଂସ୍ପର୍ଶରେ ଆସିବା ଦ୍ୱାରା ମଣିଷ ଶରୀରରେ ସଂକ୍ରମଣ ବ୍ୟାପିପାରେ । ଏହି ସଂକ୍ରମଣ ଅଧିକାଂଶ ସମୟରେ ଘା' ଉପରେ କାମୁଡ଼ିବା କିମ୍ବା ଚାଟିବା ଦ୍ୱାରା ହୋଇଥାଏ । ରେବିଜ୍ ଭାଇରସ ଦ୍ୱାରା ହୋଇଥାଏ କିନ୍ତୁ କୁକୁରର ପାଟିରେ ଅନେକ ପ୍ରକାରର ବ୍ୟାକ୍ଟେରିଆ ମଧ୍ୟ ରହିଥାଏ ଯାହା ମଣିଷମାନଙ୍କ ଶରୀରରେ ସଂକ୍ରମଣ ବଢ଼ାଇପାରେ । ଏହି ବ୍ୟାକ୍ଟେରିଆ ଯଦି ଘା', ଆଞ୍ଚୁଡ଼ା କିମ୍ବା ଚର୍ମର କଟା ଅଂଶ ସହିତ ସଂସ୍ପର୍ଶରେ ଆସେ ତେବେ ଗମ୍ଭୀର ସମସ୍ୟା ସୃଷ୍ଟି କରିପାରେ ।

କୁକୁରମାନଙ୍କ ଲାଳରେ ଦେଖାଯାଉଥିବା ବ୍ୟାକ୍ଟେରିଆ

ପାସ୍ତୁରେଲା ମଲ୍ଟୋସିଡା : ପାସ୍ତୁରେଲା ମଲ୍ଟୋସିଡା ଏକ ସାଧାରଣ ବ୍ୟାକ୍ଟେରିଆ, ଯାହା କୁକୁର ଏବଂ ବିଲେଇମାନଙ୍କ ଲାଳରେ ଦେଖାଯାଏ । ଏହା ଛୋଟ ଘା'କୁ ମଧ୍ୟ ଗମ୍ଭୀର କରିପାରେ ।

କ୍ୟାପ୍‌ନୋସାଇଟୋଫାଗା କାନିମୋରସସ୍ : ଦୁର୍ବଳ ଇମ୍ୟୁନ ସିଷ୍ଟମ ଥିବା ଲୋକଙ୍କ ରକ୍ତରେ ସଂକ୍ରମଣ (ସେପ୍ସିସ୍), ଜ୍ୱର ଏବଂ ଗମ୍ଭୀର ରୋଗ ସୃଷ୍ଟି କରିପାରେ ।

ଷ୍ଟାଫିଲୋକୋକସ୍ ଅରିୟସ୍ : ଆଘାତକୁ ସଂକ୍ରମିତ କରିଥାଏ, ବେଳେବେଳେ ଏହା ଏମଆରଏସଏ ନାମକ ଏକ ବିପଦଜନକ ଆଣ୍ଟିବାୟୋଟିକ୍-ରେଜିଷ୍ଟାଣ୍ଟ ଜୀବାଣୁ ଦ୍ବାରା ମଧ୍ୟ ହୋଇଥାଏ ।

ଷ୍ଟ୍ରେପ୍ଟୋକୋକସ୍ : ଚର୍ମ ଏବଂ ଗଳାରେ ସଂକ୍ରମଣର କାରଣ ହୋଇଥାଏ, ଘା'ରେ ଫୁଲା ଏବଂ ପୁଜ କରିପାରେ ।

ଏନାରୋବିକ୍ ବ୍ୟାକ୍ଟେରିଆ : ଯେପରିକି ବ୍ୟାକ୍ଟେରଏଡ୍ସ ଏବଂ ଫ୍ୟୁସୋବ୍ୟାକ୍ଟେରିୟମ । ଏଗୁଡ଼ିକ ଗଭୀର ଘା'ରେ ବଢ଼ିଥା’ନ୍ତି ଏବଂ ମାଂସପେଶୀ ଏବଂ ଟିସୁକୁ ସଢ଼ାଇବାର ସକ୍ଷମ ରଖିଥା’ନ୍ତି ।