ଜୁନାଗଡ ଗଣଦୁଷ୍କର୍ମ ମାମଲା : ପୀଡିତା କହିଲେ ପୂରା କାହାଣୀ । ପ୍ରଶ୍ନ କଲେ କାହିଁକି ମୁଖ୍ୟ ଆସାମୀ ବସ୍ ଡ୍ରାଇଭରକୁ ଛାଡିଦେଲା ପୁଲିସ । ବିଜେପି ମାଗିଲା ଗୃହରାଷ୍ଟ୍ରମନ୍ତ୍ରୀଙ୍କ ଉତ୍ତର ।
କନକ ବ୍ୟୁରୋ : ଜୁନାଗଡ ଗଣଦୁଷ୍କର୍ମ ମାମଲାରେ ମୁହଁ ଖୋଲିଛନ୍ତି ପୀଡିତା । ଆଉ ସେ ମୁହଁ ଖୋଲିବା ପରେ ଗଣଦୁଷ୍କର୍ମ ଓ ଭିଡିଓ ଭାଇରାଲ ଘଟଣା ନୂଆ ମୋଡ ନେଇଛି । ପୋଲିସର ରାଜସାକ୍ଷୀ ପାଲଟିଥିବା ଡ୍ରାଇଭର ଲଳିତେନ୍ଦ୍ର ଶବର ହିଁ ଏଭଳି ଜଘନ୍ୟ କାଣ୍ଡର ମୁଖ୍ୟ ଖଳନାୟକ ବୋଲି ପୀଡିତା କହିଛନ୍ତି । ଡ୍ରାଇଭରଙ୍କୁ କାହିଁକି ପୁଲିସ ଛାଡି ଦେଲା ବୋଲି ପୀଡିତା ପ୍ରଶ୍ନ କରିଥିବା ବେଳେ ପୀଡ଼ିତାଙ୍କ ବୟାନକୁ ନେଇ ଶାସକ ଦଳକୁ ଘେରିିଛି ବିଜେପି । ସେପଟେ ଏଭଳି ଏକ ସମ୍ବେଦନଶୀଳ ପ୍ରସଙ୍ଗକୁ ରାଜନୀତିକରଣ କରାନଯାଉ ବୋଲି ଅନୁରୋଧ କରିଛନ୍ତି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ।
Kanak News is now on WhatsApp
Join and get latest news updates delivered to you via WhatsApp
ତେବେ ଯେଉଁ ଡ୍ରାଇଭରକୁ ପୋଲିସ ରାଜସାକ୍ଷୀ କରିଛି, ସେ ହିଁ ଗଣଦୁଷ୍କର୍ମର ମୁଖ୍ୟ ଖଳନାୟକ ବୋଲି ଦର୍ଶାଇଛନ୍ତି ପୀଡ଼ିତା । ପୂରା ଘଟଣାକ୍ରମ ବର୍ଣ୍ଣନା କରିବା ସହ କିପରି ବସ ଡ୍ରାଇଭର ଲଳିତେନ୍ଦ୍ର ଶବର ବାଇକରେ ଲିଫ୍ଟ ଦେଇ ଜୁନାଗଡ଼ ଅଭିମୁଖେ ନେଇଥିଲା ଓ ବାଟରେ ବାଇକ୍ ଅଟକାଇଥିଲା, ଏସବୁ ବର୍ଣ୍ଣନା କରିଛନ୍ତି ପୀଡ଼ିତା । କେବଳ ଗଣଦୁଷ୍କର୍ମ ପାଇଁ ସୁଯୋଗ ସୃଷ୍ଟି କରିବା ନୁହେଁ, ନିଜେ ପ୍ରଥମେ ଦୁଷ୍କର୍ମ କରିଥିବା ପୀଡ଼ିତା ଅଭିଯୋଗ କରିଛନ୍ତି ।
ପୀଡ଼ିତାଙ୍କ ବୟାନ ସୋସିଆଲ୍ ମିଡିଆରେ ଭାଇରାଲ ହେବା ପରେ ଜୁନାଗଡ଼ ଗଣଦୁଷ୍କର୍ମ ମାମଲା ଭିନ୍ନ ମୋଡ଼ ନେଇଛି । ପୀଡ଼ିତାଙ୍କ ବୟାନକୁ ନେଇ ଶାସକ ଦଳକୁ ଘେରିଛି ବିଜେପି । କାହା ଚାପରେ ଡ୍ରାଇଭର ଲଳିତେନ୍ଦ୍ର ଶବରକୁ ଘଂଟ ଘୋଡ଼ାଯାଉଛି ବୋଲି ପ୍ରଶ୍ନ ଉଠାଇଛି ଦଳ । ଲଳିତେନ୍ଦ୍ର ଯେଉଁ ବସ ଚଳାଉଥିଲେ, ତା’ର ମାଲିକ କଳାହାଣ୍ଡି ଜିଲ୍ଲା ବିଜେଡି କାର୍ଯ୍ୟକାରୀ ସଭାପତି ପ୍ରବୋଧ ରଥଙ୍କ ସହ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଘନିଷ୍ଠ ସଂପର୍କ ରହିଥିବା ଅଭିଯୋଗ କରିଛନ୍ତି ବିଜେପି ରାଜ୍ୟ ସଂପାଦିକା ଲେଖାଶ୍ରୀ ସାମନ୍ତସିଂହାର ।
ତେବେ ଏହି ସମ୍ବେଦନଶୀଳ ପ୍ରସଙ୍ଗକୁ ନେଇ ରାଜନୀତି କରାନଯାଉ ବୋଲି ଅନୁରୋଧ କରିଛନ୍ତି ଦିବ୍ୟଶଙ୍କର । ଘଟଣାରେ ଯେଉଁମାନଙ୍କର ସଂପର୍କ ରହିଛି, କାହାକୁ ଛଡ଼ା ଯିବନି ବୋଲି କହିଛନ୍ତି ଗୃହ ରାଷ୍ଟ୍ରମନ୍ତ୍ରୀ ।
ଜୁନାଗଡ଼ ଗଣଦୁଷ୍କର୍ମ ମାମଲାରେ ୬ଜଣ ଓ ଭିଡିଓ ଭାଇରାଲ ଘଟଣାରେ ୩ ଜଣଙ୍କୁ ଗିରଫ କରି କୋର୍ଟଚାଲଣ କରିଛି ପୋଲିସ । ସେଥିମଧ୍ୟରେ ଥିବା ଜଣେ ଦୁଷ୍କର୍ମ ଅଭିଯୁକ୍ତ ନାବାଳକ ହୋଇଥିବାରୁ ତାକୁ ଜୁଭେନାଇଲ କୋର୍ଟକୁ ପଠାଇ ଦିଆଯାଇଛି ।